Efesios 6
6
Pũnarẽ, pacʉsʉmʉãrẽ “abiro tiya” ĩ wedere
1Mʉjã pũna, Nirũpʉ̃ Jesucristomena ĩcãrõ nirã ninirã mʉjã pacʉsʉmʉã dotirere ñurõ yʉya. Tairo tire ñurẽ ña. 2Manigʉ̃ye wederucũrẽrẽ ojayoriapũpʉre Manigʉ̃ye dotire ojayorigue tie watoare ĩcãrõ dotiro tore ñurõ tirare “tairo tigʉacu” ĩrẽrẽ cʉoro abiro ĩ: «Mʉjã pacʉsʉmʉãrẽ, mʉjã pacosãrõmiãrẽ wedewõña, 3mʉjãcã ʉsearemena ni, atiditapʉre paje cʉmarĩ catiatora abiro»#Ex 20:12; Dt 5:16. ĩ. 4Mʉjã pacʉsʉmʉã nirã, mʉjã pũnarẽ bʉtoro tuti, cʉ̃jãrẽ cuañerõcã tiherimocãña. Buripe cʉ̃jãcã ñañarõ tiñerõcã “tairo tiherimocãña” ĩ queoro tiremenape buemasõña. Cʉ̃jãrẽ marĩ Nirũpʉ̃yere bue, cʉ̃cã borora abirope tiñerõcã tiya.#Col 3:21.
Dotiepeyoribasocare, cʉ̃jãya nirũpãrãrẽ “abiro tiya” ĩ wedere
5Marĩcʉorore mʉjã dotiepeyoribasoca nirãrẽ abiro ĩ: Atiditapʉre mʉjã nirũpãrã nirãrẽ ñurõ yʉya. Wedewõrẽmena, cuwiopesaremena, tiritoro manirõ cʉ̃jãrẽ yʉya Cristocã dotirere mʉjãcã ñurõ yʉrora abiro.#Flp 2:12; Col 3:22; 1Tm 6:1; Tit 2:9. 6Ĩcãrã dotiepeyoribasoca cʉ̃jã nirũpãrãcã ĩñarĩwatoa wadorena ñurõ padederitowa. Tairo yawa cʉ̃jãrẽ “ñurõ padedewa” ĩñerõcã bora. Mʉjãpere tairo niherimocãrõ bo. Buripe Cristore padedebosaribasocara abiro nirã ninirã Manigʉ̃cã borora abiro ñurõ padederugari yeripũnamena padedero bo. 7Mʉjã dotiepeyoribasoca ʉsearemena mʉjã nirũpãrãrẽ padedebosaya. Basocare padedecotecaperacã marĩ Nirũpʉ̃rẽ padedebosarara abiro tiya.#Col 3:23. 8Merẽ mʉjã masĩsiaga: Marĩ Nirũpʉ̃ marĩcãrõrẽ marĩcã ñurõ tiriarocãrõrã dotiepeyoribasoca nirãrẽ, dotiepeyoribasoca niherare ñurẽrẽ wapatañerõcã tigʉagawi.#Ro 2:6; Ga 3:28. 9Tiwãmerã mʉjã cʉ̃jã nirũpãrãcã mʉjãya dotiepeyoribasocare ñurõ tiya, cʉ̃jãrẽ cuaremena “mʉ padedeya; mʉrẽ ñañarõ tigʉda” ĩrõ manirõrã. Mʉjã masĩ. Ĩcʉ̃rã marĩ Nirũpʉ̃ Cristo ʉmʉãwesepʉ nigʉ̃rã mʉjã Nirũpʉ̃, cʉ̃rã mʉjãya dotiepeyoribasoca Nirũpʉ̃ ñawĩ. Marĩ nipetira cʉ̃rẽ padedecotera ña. Cʉ̃ marĩ nipetirare ĩcãrõpe ĩñawĩ.#Dt 10:17; Jn 13:13; Hch 10:34; Ro 2:11; Col 3:25.
Manigʉ̃yere Wãmocʉtire
10Apeyecãrẽ mʉjãrẽ abiro ĩ wedetʉoco. Yara, marĩ Nirũpʉ̃mena tairo ĩcãrõ nirucũmocãña cʉ̃ye tutuare icãta apõtĩõñamanirẽmena mʉjãrẽ mʉjãye yeripũnarĩpʉre tutuara nirã eañerõcã tiatora abiro.#1Co 16:13; Ef 1:19; 3:16; Flp 4:13; Col 1:11. 11Manigʉ̃cã marĩrẽ nʉnirigue nipetirere wãmocʉtiya wãtĩã nirũpʉ̃cã cʉ̃ye ĩritomemarẽmena ñañarẽ ĩdocasãrẽrẽ acutamasĩ, tutuarucũmocãrãda ĩrã. Ĩcʉ̃ surara camesĩãgʉ̃ wagʉdagʉ cʉ̃ya ũpʉ̃rẽ acutatere wãmocʉtirora abiro tiya.#2Co 10:4; 1Pe 4:1; 1Tm 1:18-19. 12Marĩ, marĩrã abiro basoca nirãmena camequẽheri; wãtĩã tutuare cʉora ʉmʉãwesepʉ nirãmena, cʉ̃jã doca macãrã dotire tutuare cʉoramena, atibʉreco maquẽ ñañarẽ tirere dotiramena, basoca wãcũrẽpʉre ñañarẽ tidotiramena camequẽ.#1:21; Ro 8:38; 1Co 9:25. 13Tairo tira Manigʉ̃cã marĩrẽ nʉnirigue nipetirere wãmocʉtiya. Atiere tirara marĩrẽ ĩñatutigʉcã mʉjãrẽ ñañarẽ ĩdocasãrẽcãrõrẽ camequẽ acuta, ñarõ manirõ nitʉoropʉ tutuarucũmocãrõãcu.#2Co 10:4. 14Tʉomasĩrẽmena niña. Ĩcʉ̃ surara cʉ̃ya weñarĩãdare ñurõ wejediogawi boyeromena cʉtʉarucũgʉ̃dagʉ. Tora abirora mʉjãcã Manigʉ̃ye diamacã maquẽrẽ wedewõrucũmocãña Manigʉ̃cã tiñerõcã borere padedemasĩrãpʉ nirãdara. Ĩñerõcã suraracã cʉ̃ya cotiare acutagʉ cõmesutirore sãñarõrã abiro mʉjãcã Manigʉ̃cã ĩñacorore ñurẽ maquẽrẽ tirucũmocãrãrã niña.#Job 29:14; Is 11:5; 59:17; 1Ts 5:8. 15Suraracã camesĩãgʉ̃ wagʉdagʉ cʉ̃ya dʉporire acutaro ĩgʉ̃ dʉposutire wejesãñarõrã abiro mʉjãcã ñurẽ quetire ñurõ came nirẽcʉtiñerõcã tire quetire wedera waradara quenoyueariarapʉ niña.#Is 52:7; Ro 10:15. 16Suraracã cʉ̃rẽ ĩñatutigʉcã pecame ʉ̃rĩwacarimena wẽcorucũñerõcã cõmetimena acuta cʉorora abiro mʉjãcã Jesucristore wedewõrẽ cʉoremenarã wãtĩã nirũpʉ̃cã ñañarẽ ĩdocasãrẽrẽ acutamasĩrõãcu. #1Jn 5:4. 17Suraracã cʉ̃ya dʉpowʉre acutagʉ cõmepetore pesarora abiro mʉjãcãrẽ “ʉ̃sã Manigʉ̃cã cametʉoyoriara ña” ĩrẽrã acutaro, wãtĩcã mʉjãya wãcũrẽpʉre ñañarõ ti mʉjãrẽ posorugañerõcã. Tairora suraracã cʉ̃ya saderipĩmena camesĩã acutamasĩrõrã abiro mʉjãcã Manigʉ̃ye wederucũrẽmena Espíritu Santoya saderipĩrã abiro nirẽmena acutaya.#1Ts 2:13; Heb 4:12. 18Atie nipetirere tirara mʉjã icãta ñubueduherimocãña. Manigʉ̃rẽ “ʉ̃sãrẽ nipetiriwatoa titamurucũmocãña” ĩ sãĩrucũmocãña Espíritu Santocã masĩrẽ nʉnirẽmena. Tʉomasĩrẽmena ni, tairo ñubuerucũmocãña. Mʉnʉãheracã. Mʉjãye ñubuerepʉre Manigʉ̃yamacã macãrãrẽ tairo sãĩbosarucũmocãña.#Mt 26:41; Lc 18:1; Flm 1:4; Col 4:2. 19Yʉcãrẽ ñubuebosaya, Cristoyere wederiwatoa earecãrõrẽ Manigʉ̃cã yʉre queoro ĩrẽmena wederucũñerõcã tiatora abiro, tiemena yʉcã cuiro manirõ ñurẽ queti diamacã maquẽ nirẽ ñucametʉarere sʉgueropʉ masĩñamaniriguere wedemasĩãtora abiro.#Hch 4:29; 2Co 3:12; Ef 1:9. 20Manigʉ̃ yʉre atie ñurẽ quetirena wededotigʉ ticowi. Tiere wedere wapara yʉ peresupʉ ña. Tairo tira yʉre tie ñurẽ quetirena tiecã queoro ĩriwãmerã abiro cuiro manirõ wedearo ĩrã Manigʉ̃rẽ sãĩbosaya.#2Co 5:20.
Uitʉocore
21Tíquico yʉmenamacʉ̃ yʉcã maĩgʉ̃, marĩ Nirũpʉ̃rẽ queoro padedecotegʉ mʉjã cʉtiropʉ ea yʉcã nirẽrẽ, yʉcã tirere mʉjãrẽ masĩñerõcã tigʉagawi.#Hch 20:4; 2Tm 4:12; Tit 3:12; Col 4:7. 22Cʉ̃rẽ mʉjã cʉtiropʉ tico, cʉ̃cã anopʉ ʉ̃sãrẽ birere mʉjãrẽ wedeatora abiro ĩñerõcã mʉjãrẽ wãcũtutuañerõcã tiaro ĩgʉ̃. 23Manigʉ̃ marĩ Pacʉ ĩñerõcã marĩ Nirũpʉ̃ Jesucristo mʉjã Jesucristore wedewõrãrẽ ñurõ came nirẽcʉtiñerõcã tiremena nirẽcʉtiñerõcã tiaro; mʉjãrẽ came maĩnemowʉmʉãñerõcã Cristore õpe wedewõwʉmʉãñerõcã tiaro. 24Manigʉ̃ cʉ̃ye maĩrẽ icãta petiheremena nipetirare marĩ Nirũpʉ̃ Jesucristore maĩrucũrãrẽ ñurõ tiaro.
Tocãrõrã ña.
Pablo.
Currently Selected:
Efesios 6: yui
Highlight
Share
Copy
Want to have your highlights saved across all your devices? Sign up or sign in
© 2026, SIL Global. All rights reserved.
