Efesios 3
3
Pablocã “judío basoca niherare buedotigʉ ñeyorigʉ ña” ĩ wedere
1Tairo tigʉ yʉ Pablo Jesucristore padedebosagʉ mʉjã judío basoca niherare Jesucristoye quetire wederigue wapamenarã peresupʉ ña. 2Merẽ mʉjã atiere masĩsiaga. Manigʉ̃ yʉre ñurõ tigʉ cʉ̃cã ĩñamaĩrẽmena mʉjãrẽ “tairo tigʉacu” ĩriguere mʉjãrẽ wededotigʉ yʉre ñerigʉ niwĩ.#Col 1:25. 3Manigʉ̃ cʉ̃cã “tairo tigʉacu” ĩriguere sʉgueropʉ masĩñamaniriguere#Ef 1:9. yʉre tiere masĩñerõcã tiwí.#Hch 22:6-21; Ga 1:12. Merẽ mʉjãrẽ tiemaquẽrẽna pẽrõ ojacosiawʉ.#3:3 Aperore “tie maquẽrẽna pẽrõ ojacosiawʉ” ĩgʉ̃ atipũrẽna Ef 2:11-22 re ĩgʉ̃ tigatiyi ĩ wãcũwã. 4Tie yʉcã ojacoariguere buera sʉgueropʉ masĩñamaniriguecã Cristomenarã queoro wayapatiriguere yʉcã masĩrẽrẽ mʉjãcã masĩrõãcu. 5Manigʉ̃ sʉgueropʉ masĩñamaniriguere Cristomenarã tiecã queoro wayapatiatere sʉgueropʉmacãrã nipetirare masĩñerõcã tiheririgʉ niwĩ. Marĩcʉoropere Espíritu Santomenarã cʉ̃ye quetire buedotigʉ cʉ̃cã beseriara ñurãmenarã, cʉ̃ye quetire wederamenarã tiere masĩñerõcã yawí. 6Tie cʉ̃cã “tairo tigʉda” ĩrigue sʉgueropʉ masĩñamanirigue atie ña: Ñurẽ quetimenarã Manigʉ̃ nipetira basocaburire siowi, Cristore wedewõrã eanirã Israelyabumacãrã judío basoca Jesucristore wedewõrãrã abirora Manigʉ̃yara nirã ea cʉ̃cã cʉ̃jãrẽ “tairo tigʉda” ĩriguere cʉo, cʉ̃jãmena ĩcãmacã macãrãrã nirã earo ĩgʉ̃.#Ef 1:11. 7Manigʉ̃ cʉ̃cã yʉre ĩñamaĩrẽmena yʉre ñurõ tigʉ cʉ̃ye tutuare paca nirẽmenarã atie ñurẽ quetirena wededotigʉ yʉre ñe, padedere cũwĩ.#Col 1:23, 25. 8Manigʉ̃ yʉre nipetira Manigʉ̃yara watoare yʉcã buri nigʉ̃joro nicapetacã#1Co 15:9; 1Tm 1:16. cʉ̃ yʉre ñurõ tigʉ, Jesucristoye ñurẽ quetire tiecã ñurẽ cʉorere basocacã dairo ti queocũtiyoyamanirẽrẽ judío basoca niherare wededotigʉ yʉre padedere nʉniwĩ. 9Ĩñerõcã cʉ̃cã “tairo tigʉda” ĩriguere sʉgueropʉ masĩñamaniriguere queoro cʉ̃cã tiyapatiatere yʉrena tiecãrẽ nipetira basocare tʉomasĩñerõcã tidotiwi. Manigʉ̃ nipetirere tirigʉra mamarõpʉra atiere cʉ̃cã “tairo tigʉda” ĩriguere sʉgueropʉ masĩñamaniriguere wedero manirõ cʉomocãrigʉ niwĩ.#Ef 1:9-10. 10Anorã abiro cʉ̃cã tiriguemenarã marĩcʉorore Jesucristore wedewõrĩbumacãrãmena pʉabupʉ nimiriarare ĩcãbumacãrãrã nirã eañerõcã tiremena ʉmʉãwesepʉ macãrã tutuare cʉora cʉ̃rẽ wedecoteribasocare, wãtĩã nirũpʉ̃rẽ ĩñerõcã cʉ̃doca macãrã wãtĩã tutuare cʉorare cʉ̃cã nipetirere masĩpetigʉ nirẽrẽ eñowĩ cʉ̃jãrẽ tiere masĩãro ĩgʉ̃.#Ef 1:21-22. 11Atiera niriaro niwʉ̃ Manigʉ̃cã cʉ̃cã atibʉrecore tiatosʉgueropʉra marĩrẽ “tairo tigʉda” ĩrigue. Tiera ña marĩ Nirũpʉ̃ Jesucristomenarẽ queoro wayapaticorigue. 12Marĩcã Jesucristore wedewõrẽmenarã, cʉ̃mena marĩcã ĩcãrõ nirẽmenarã marĩ cuiro manirõ Manigʉ̃ cʉtiro wa eamasĩrẽrẽ cʉo.#Ef 2:18; 1Pe 3:18. 13Tairo tira yʉcã mʉjãrẽ Jesucristoye quetire wederigue wapamena yʉcã peresupʉ ni, yʉcã ñañarõ posarere tʉora mʉjã wãcũpasʉtiherimocãña. Buripe “marĩye maquẽ niãterena marĩrẽ Jesucristoye quetire wedesiawi” ĩ wãcũ ʉseaya.
Ñubueremena Manigʉ̃rẽ ʉseapeore
14Atieye wapamenarã yʉ Manigʉ̃ marĩ Pacʉcã ĩñacoro ãsʉ̃rʉ̃poperimena eacumuwa cʉ̃rẽ ñubue mʉjãrẽ sãĩbosa. 15Cʉ̃rã nipetirere tirigʉra ñawĩ nipetira ʉmʉãwesepʉ nirãrẽ ĩñerõcã nipetira basocaburi atiditapʉre nirãpacʉ nijomocãgʉ̃. 16Cʉ̃rẽna tutuacametʉanʉcãgʉ̃rẽ paje ñurẽrẽ cʉogʉrena “mʉya Espíritu Santomenarã cʉ̃jãrẽ tutuarere nʉniña” ĩ sãĩbosa mʉjãya yeripũnarĩpʉre tutuara niãro ĩgʉ̃. 17Ĩñerõcã Manigʉ̃rẽ, Jesucristore mʉjãcã wedewõrẽ cʉora nirẽmena “Jesucristore mʉjãpʉre tairo nirucũmocãñerõcã tiya” ĩ sãĩbosa. Apeyecãrẽ mʉjãcã Cristore ĩñerõcã ãpẽrãrẽ ñurõ maĩrẽrẽ cʉosiaremenarã “cʉ̃jã ĩcãdiamacãrã nirucũmocãro” ĩ sãĩbosa. 18Tiemena mʉjã ãpẽrã nipetira Manigʉ̃yamacã macãrãmena Cristocã marĩrẽ maĩrẽrẽ “¡nocʉ̃ñe esare, yoare, emʉãrẽ, ʉ̃cʉ̃ãrẽ ñarĩ!” ĩ masĩrã earoacu. 19Daigʉnopera Cristocã maĩrẽrẽ tʉomasĩcũtihericapetacã cʉ̃cã mʉjãrẽ maĩrẽrẽ tʉomasĩrã earo ĩgʉ̃ mʉjãrẽ Manigʉ̃rẽ sãĩbosa. Tiere masĩnemorã eara Manigʉ̃ye maquẽrẽ cʉopetira pʉtʉaroacu cʉ̃cã nirẽcʉtirora abiro.#Ef 1:23. 20Manigʉ̃ tutuare cʉocametʉagʉ marĩcã cʉ̃rẽ sãĩrẽsotoapere paca apeyenorẽ timasĩpetigʉ ñawĩ. Marĩye wãcũrẽmenacãrẽ “cʉ̃ marĩrẽ abiro tigʉagawi” ĩñerõcãcãrẽ marĩcã wãcũãriarosotoapere timasĩgʉ̃ ñawĩ. Cʉ̃ cʉ̃ye tutuare marĩya yeripũnarĩpʉ nirẽmenarã tairo yawí.#Col 1:29. 21Tairo tira Manigʉ̃rẽ cʉ̃cã marĩrẽ Jesucristore wedewõrĩbumacãrãmena ñucametʉare tirere ĩñarã nipetira cʉ̃rẽ ʉseapeorucũmocãro. Ĩñerõcã tairora tiaro Jesucristocã basocapʉre tirere ĩñarã. Anocawatoa macãrãcã, siropʉ macãrãcã tairora Manigʉ̃rẽ ʉseapeorucũmocãro. Tairora niãro.#Ro 16:25-27.
Currently Selected:
Efesios 3: yui
Highlight
Share
Copy
Want to have your highlights saved across all your devices? Sign up or sign in
© 2026, SIL Global. All rights reserved.
