1Makolinte 12
12
Ibiwegwa byo Moya go Kucena
1Bakwangu, tani shaki buti mubule inzunu kuja ko Moya go Kucena. 2Muli zekelele buti aa kamuli baedeni, kamu kokelwa ku bazimu aba tabagambi, ubu kamu jendekezwa. 3Mi cwale nasa shaka mu zekelele buti, takuli umuntu uju agamba ko Moya go Kucena gwa Nyambe atyo buti, “Jesu akutigwe!” Mi takuli uju na gambe buti Jesu nu Mfumu, bwita na jendesigwa ko Moya go Kucena. 4Mi ibiwegwa byo Moya biliandene, kono Umoya gogo gutaangila. 5Mi kuli andene mu misebezi, kono Umfumu gwa kulikoza abelekelwa. 6Mi imisebezi jiliandene, kono Nyambe go kulikoza uju abeleka imisebezi jonse ku bantu bonse. 7Mi uku libonaaza ko Moya, gulawegwe ku bulotu bonse. 8Mi ko Moya jumwinya gasa wegwa amajwi go butali, jumwinya gasa wegwa amajwi go nzunu ka gogo Umoya go kulikoza. 9Jumwinya gasa tambula intumelo ka gogu Umoya, jumwinya gasa tambula impo jo kuoza amalwele ka gogu Umoya. 10Jumwinya gasa wegwa inguzu jo kutenda ibitendantu, jumwinya gasa wegwa ububoni, jumwinya kushalula imyoya, jumwinya kugamba mwindimi ji andene, mi jumwinya ku tansulula ibigambo. 11Byebyo byonse byasa belekigwa ku Moya gonke, ugu gutagila umuntu ne muntu ubu gu shakila.
Umubili gonke gwa bilama ibingi
12Kilesite gwa kukoza sinagwe mubili go muntu, ugu gu kwesi ibilama ibingi, kono byonse byasa bumba umubili gonke, mi ne Kilesite bobo akalile. 13Ukuti twense matwa kolobezigwa ko Moya gonke buti tubumbe umubili gonke, kube Majuda kampa Mageliki, nanga baika kampa aba naba lukuluwa, mi twense natwa nywisigwa ku Moya gonke.
14Mi cwale umubili tali pa lubazu lonke nagwa bumbigwa kono abibazu ibingi. 15Cwale ati itende nalityo, “Ukuti tali nili ganja, tani kuli ku mubili,” lelyo tali goli ukuba ibaka ili ligola uku likangwisa ukuba ulubazu lo mubili. 16Mi ati ukutwi na kutyo buti, “Ukuti tali nili linsho, tani kuli ku mubili,” lelyo tali goli ukuba ibaka ili ligola uku kukangwisa ukuba ulubazu lo mubili. 17Ati umubili gonse kaguli linsho, ukushugwa kwibo na kuzwila? Ati mubili gonse kaguli kutwi, ukuumbuza kwibo na kuzwila? 18Kono Nyambe naga tula ibibazu mu mubili, ulubazu no lubazu ubu lujelele uku kalila. 19Ati byonse kabi kele icilama conke, umubili kwibo kagu kala? 20Cwale ibilama bingi, kono mubili gonke.
21Ilinsho tali goli uku tyo kwi ganja buti, “Tani kushaki!” Mi no mutwi tagu goli uku tyo ku matende buti, “Tani kushaki!” 22Cwale ibilama byo mubili bi bonaala uku fokola, bebyo butokwa wawa. 23Mi ibilama byo mubili ibi tugaja buti tabi kutikigwa, bebyo tukutika wawa no kuita. 24Mi ibilama ibi tulolele tabi kwesi cimwinya. Kono Nyambe naga gwanika umubili antuonke, mi no kuwa ikute inene kwa bebyo ibilama bi jelele uku kutikigwa, 25buti kuleke ukuba ne kulitaa ko mubili, kono ibilama byago bili babalele ne cimwinya. 26Ati cilama cimwinya naci penga, ibilama byonse byasa penga, ati cilama conke naci kutikigwa, byonse bilama byasa jangala.
27Cwale inwe muli mubili gwa Kilesite, mi mwense muli ba lubazu lyago. 28Mi Nyambe naga tula tansila batumigwa mu nkeleke, babili baboni, batatu bazigi, ko kutula aba batenda ibitendantu, ibiwegwa byo kulwalukisa, byo kutusa, byo kubusa, ne byo ndimi ji andene. 29Buti bonse batumigwa? Buti bonse baboni? Buti bonse basa tenda ibitendantu? 30Buti bonse naba wegwa uku lwalukisa? Buti bonse bala gamba mu ndimi? Buti bonse bala tansulula? 31Mi mu mulumbile ibiwegwa ibinene.
Mi cwale kuti ni misunde inzila ilotu wawa.
Currently Selected:
1Makolinte 12: TBTP
Highlight
Share
Copy
Want to have your highlights saved across all your devices? Sign up or sign in
The Word For The World International
