2 BaTesalonika 1
1
1Ime Pawulu aSilivanasi aTimoti,
Kumbungano yakuTesalonika kuli bali muliLeza Taata wesu aMwami Jesu Kkirisitu:
2Luzyalo aluumuno luzwa kuli Leza Taata aMwami Jesu Kkirisitu lube kulindinywe.
Lubeta Kukuboola KwaKkirisitu
3Nibakwesu, tweelede kulumba Leza lyoonse ankaambo kanu, mbuli mbukweelede, nkaambo lusyomo lwanu luliikukomena kapati, alimwi luyando lwanu kuli umwi awumwi luliikuvuzyana. 4Nkikaako iswe lwesu tulalikankayizya nkaambo kanu mumbungano zyaLeza ankaambo kakukakatila kwanu alusyomo mukupenzegwa kwanu koonse mumasukuusyo ngimuliikuswaniya.
5Eechi nchichitondezyo chalubeta lusalala lwaLeza, kuti mukachitwe beelela mubwami bwaLeza, oobo mbumufwabila. 6Leza uliluleme, nichoonzyo ulabweedezya amapenzi kuli baabo bamupenzya, 7akupa kulyookezya kulindinywe nimupenzegwa akulindiswe lubo, eelyo Mwami Jesu nayooyubununwa kuzwa kujulu abaangelo bakwe basinguzu 8mumabangabanga amulilo, uyoopa chisubulo kuli baabo batazi Leza, akuli baabo bataswiilili makani mabotu aMwami wesu Jesu. 9Bayoopenzegwa achisubulo chakunyonyoonwa kwalyoonse akupambulwa kuzwa kunembo lyaMwami akuzwa kubulemu bwanguzu zyakwe, 10nayoboola mubuzuba oobo kuti akalemekwe mubasalali bakwe, akugamba kuzwa kuli boonse basyoma, nkaambo bukamboni bwesu kuli ndinywe bwakasyomwa.
11Ankaambo kacheechi tulamukombela lyoonse, kuti Leza wesu amuchite kuti mweelele kulwiito lwakwe, alimwi kuti anguzu zyakwe azuzikizye chiyandisyo chanu chazintu zibotu zyoonse akuzuzikizya milimu yanu yalusyomo, 12kuchitila kuti zina lyaMwami wesu Jesu likapegwe bulemu mulindinywe, andinywe mulinguwe, mukwiinda kuluzyalo lwaLeza wesu aMwami Jesu Kkirisitu.
The Word for the World International