Rí wasngájma 21
21
Xuajen Jerusalén rí nuxe̱ꞌ
1Nda̱wa̱á a̱ꞌkhue̱n ndi̱yo̱o̱ mbá mikhu nuxe̱ꞌ jamí mbá ju̱ba̱ꞌ nuxe̱ꞌ, numuu rí mikhu jamí ju̱ba̱ꞌ rí ginii nánda̱a̱ ne̱. Nánda̱a̱ máꞌ iya a̱pha̱ mangaa. 2Jamí ikhúúnꞌ Juáán#21.2 Ríga̱ mbá tikhu i̱yi̱i̱ꞌ griégo̱ rí wayuu rí tsíꞌthán «ikhúúnꞌ Juáán». ndi̱yo̱o̱ xuajñuu Ana̱ꞌlóꞌ mangaa, xuajen Jerusalén rí nuxe̱ꞌ, rí na̱ga̱taa mikhuíí ná xtáa Ana̱ꞌlóꞌ, asndo xó mbáa dxáꞌgú tsí neꞌne-karatha-mina̱aꞌ rí mbayáa a̱jmbe̱e jaꞌnii ne̱. 3A̱ꞌkhue̱n ni̱dxawuun mbá a̱ꞌwá rí phú gakhe̱ naꞌthán ná mikhuíí:#21.3 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «ná ꞌgí xíli̱i thúngaa». «A̱gu̱ya̱álaꞌ rí ná majñu̱ú xa̱bo̱ numbaa ꞌgí guꞌwóo Ana̱ꞌlóꞌ rí xúge̱ꞌ rá, jamí ikhaa̱ ma̱xtáa̱ gajmíi̱. Xómáꞌ ikhii̱n ma̱nindxúu̱n xa̱bo̱ xuajñuu̱, jamí jmína̱a̱ꞌ máꞌ Ana̱ꞌlóꞌ ma̱nindxu̱u̱ Anúu̱. 4Ana̱ꞌlóꞌ maxúdíi mbá jayu iyoo idúu̱n. A̱ꞌkhue̱n rí nánguá ma̱ja̱ñúu̱, ni máꞌ nánguá mu̱mbi̱ye̱e̱ꞌ, ni máꞌ nánguá mu̱míníi̱, ni máꞌ nánguá me̱kho̱ xuñúu̱, numuu rí wámba̱ máꞌ rí ni̱ꞌkha̱-raríga̱ nákhí wapha».
5Xómáꞌ tsí ꞌgí ná xíli̱i thúngaa niꞌthán: «Ikhúúnꞌ na̱ne̱ nuxe̱ꞌ mbá xúgíí». Jamí niꞌthée̱n mangaa: «Aratháán, numuu rí ajngáa rí gakon ñajuun ríge̱ꞌ, jamí jaꞌyoo rí ma̱nimbu̱únꞌ ne̱ xa̱bo̱».
6Nda̱wa̱á niꞌthínꞌ: «¡Mbá xúgíí máꞌ ni̱gu̱ma rá! Ikhúúnꞌ ñajunꞌ xómá tsina Álfa̱ jamí xómá tsina Oméga̱, tsí na̱gi̱ꞌdu̱u̱n-muu jamí tsí ndámba̱wóo. Tsí najándawoo, ma̱xnu̱u̱ ma̱ga̱a̱n yaꞌsi iduu iya rí nangujwíi inuu ju̱ba̱ꞌ. Jamí ma̱xáru̱maa̱ máꞌ ga̱jma̱á numuu iya rúꞌkhue̱n, rí naꞌne rí ma̱ju̱wá jámuu xa̱bo̱. 7Mbá xúgíí ríge̱ꞌ ma̱xnu̱u̱ tsí ma̱ꞌngo̱o̱, xómáꞌ ikhúúnꞌ ma̱nindxu̱ꞌ Anu̱u̱ jamí ikhaa̱ ma̱nindxu̱u̱ a̱ꞌdéꞌ. 8Xómáꞌ tsí namíñúú rá, tsí tsínimbu̱únꞌ, tsí nune̱ rí xkawe̱ꞌ, tsí nu̱radíin xa̱bo̱, tsí nubúún gajmíí xa̱bo̱ tsí túya̱a̱, tsí nune̱ xawan, tsí nune̱-mbi̱in tsí ra̱ꞌkháa Ana̱ꞌlóꞌ ñajúún, jamí mbá xúgíin tsí nune̱-nduwa, xúgíin tsúꞌkhue̱n magóo̱ ná awúun agu a̱pha̱ rí nakha ga̱jma̱á asúfre̱. Ríge̱ꞌ ñajuun rí ma̱ja̱ñúú xa̱bo̱ rí riajma̱ nothon».
9Nda̱wa̱á a̱ꞌkhue̱n ni̱ꞌkha̱ mbáa ánje̱l ná inuꞌ, mbáa máꞌ tsí juwiin juda juwan xúba̱ me̱jno̱ꞌ rí gajni̱í jamínu̱ꞌ rí ma̱ꞌkha̱ nda̱wa̱á jayu, jamí niꞌthínꞌ: «Aya̱ ge̱jyoꞌ. Ma̱snga̱jmáaꞌ dxáꞌgú tsí ma̱ꞌne a̱ꞌgui̱i A̱ꞌdá-mógó». 10A̱ꞌkhue̱n rí ánje̱l ni̱ka̱ jañúú ga̱jma̱á majñu̱u̱ Xu̱u̱ꞌ Ana̱ꞌlóꞌ ná inuu mbá júba̱ mba̱a̱ jamí tsída̱ꞌ. Ikhín nisngájmiꞌ xuajñuu Ana̱ꞌlóꞌ, ikhaa xuajen mba̱a̱ Jerusalén, rí na̱ga̱taa mikhuíí ná inuu Ana̱ꞌlóꞌ. 11Nambiꞌi-taꞌa aguu Ana̱ꞌlóꞌ ná xuajen ído̱ na̱ka̱-ra̱ga̱taa. Nambiꞌi-taꞌa ne̱ xómá itsí rí mitsaan mi̱ndaꞌkho, xómá itsí rí mbiꞌyuu jáspe̱ rí nafraꞌa̱ xómá iyaniwan. 12Mbá tuaꞌáan júgua-maꞌáan ne̱ ga̱jma̱á mbá xu̱nꞌ me̱do̱ jamí tsída̱ꞌ rí gíꞌdoo gu̱wa̱ꞌ i̱jma̱ (12) xkrugua. Mbámbá xkrugua rúꞌkhue̱n ka̱ma mbiꞌñúú tsí mbá gu̱wa̱ꞌ i̱jmi̱i i̱ji̱in Israél, jamí mbámbá xkrugua ni̱tia̱wa̱án eꞌne mbáa ánje̱l. 13Atsú xkrugua tima ná giaxu̱u̱ na̱ꞌkha̱ a̱kha̱ꞌ, atsú ne̱ tima ná giaxu̱u̱ naꞌwáán, atsú ne̱ tima ná giaxu̱u̱ jawáá jamí atsú ne̱ tima ná giaxu̱u̱ najngúun a̱kha̱ꞌ. 14Rí xu̱nꞌ ni̱tu̱xu̱u̱ꞌ ne̱ tsu̱du̱u̱ mbá gu̱wa̱ꞌ i̱jma̱ (12) itsí mba̱ꞌwo̱, jamí ná tsu̱du̱u̱ mbámbá itsí rúꞌkhue̱n waꞌtháán mbiꞌyuu mbámbáa tsí mbá gu̱wa̱ꞌ i̱jmi̱i nixúngui̱inꞌ A̱ꞌdá-mógó.
15Ánje̱l tsí naꞌthán ga̱jma̱á nindxu̱ꞌ, jayée̱ mbá xkuíya̱ awan rí ajwa̱nꞌ mo̱jmo̱ꞌ ñajuun kajngó magiéwee̱n xuajen, xkrugoo ne̱ jamí xu̱nꞌ drígo̱o̱ ne̱. 16A̱ꞌkhue̱n rí ánje̱l nigiéwee̱n xuajen ga̱jma̱á xkuíya̱ awan rí jayée̱. Mbéꞌtháán mbá nákho̱ níjñúu ne̱, naꞌne xí 2 200 kilóme̱tro̱#21.16 Ná i̱yi̱i̱ꞌ griégo̱ rí wayuu naꞌthán «gu̱wa̱ꞌ i̱jma̱ míl (12 000) estádio̱», rí gíꞌdoo mbá 185 métro̱ rí mbámbá. wáa rí mba̱ꞌ ne̱, xúꞌkhue̱n máꞌ rí ma̱jña̱ꞌ ne̱ jamí rí tsída̱ꞌ ne̱. 17Nigiéwan ánje̱l xu̱nꞌ drígo̱o̱ ne̱ mangaa, mbá 144#21.17 Rí mbá 144 itso̱ ñawúun xa̱bo̱ gíꞌdoo mbá 65 métro̱ wáa. itso̱ ñawúun xa̱bo̱ rí tsída̱ꞌ ne̱. Awan rí nune̱-nuwiin máꞌ xa̱bo̱ ñajuun rí nijmuu ánje̱l. 18Rí xu̱nꞌ ni̱gu̱ma ne̱ ga̱jma̱á itsí mitsaan rí mbiꞌyuu jáspe̱. Xómáꞌ xuajen mbáko máꞌ i̱ndo̱ó ajwa̱nꞌ mo̱jmo̱ꞌ ñajuun ne̱, nambiꞌi-taꞌa ne̱ xómá iyaniwan rí jaꞌwu. 19Mbámbá itsí mba̱a̱ rí ꞌgí ná nakhúu xu̱nꞌ ni̱gu̱ma-karatháá ne̱ ga̱jma̱á mbá xúgíí inii itsí rí mitsaan jamí phú numuu. Nakhúu ne̱ rí ginii jayu ni̱gu̱ma-karatháá ga̱jma̱á itsí jáspe̱, rí riajmu̱u̱ ga̱jma̱á safíro̱, rí riatsú ga̱jma̱á ága̱ta̱, rí riakho̱ ga̱jma̱á esmerálda̱, 20rí tiwitsu ni̱gu̱ma-karatháá ga̱jma̱á óni̱se̱, rí timajun ga̱jma̱á kornalína̱, rí tijwan ga̱jma̱á krisóli̱to̱, rí timigiñu ga̱jma̱á berílo̱, rí timijna-gu̱wa̱ꞌ ga̱jma̱á topásio̱, rí tigu̱wa̱ꞌ ga̱jma̱á krisoprása̱, rí tigu̱wa̱ꞌ i̱mba̱ ga̱jma̱á jasínto̱, jamí rí tigu̱wa̱ꞌ i̱jma̱ ni̱gu̱ma-karatháá ga̱jma̱á amatísta̱. 21Mbá gu̱wa̱ꞌ i̱jma̱ (12) xkrugoo xu̱nꞌ ñajuun mbá gu̱wa̱ꞌ i̱jma̱ máꞌ itsí mitsaan rí mbiꞌyuu pérla̱. Xómáꞌ jamba̱a̱ ma̱jña̱ꞌ rí kri̱ga̱ ná awúun xuajen rá, mbáko máꞌ i̱ndo̱ó ajwa̱nꞌ mo̱jmo̱ꞌ ñajuun ne̱, nambiꞌi-taꞌa ne̱ xómá iyaniwan.
22Táyo̱o̱ nimbá guꞌwá dxákuun ná awúun xuajen rúꞌkhue̱n. Numuu rí Táta̱ Ana̱ꞌlóꞌ tsí gíꞌdoo mbá xúgíí tsiakhe̱ jamí A̱ꞌdá-mógó, ikhii̱n máꞌ ñajúu̱n guꞌwá dxákuun. 23Na̱nguá máꞌ iꞌyóo rí ma̱ri̱ya̱a̱ꞌ a̱kha̱ꞌ ni máꞌ go̱nꞌ ná xuajen, numuu rí nambiꞌi-taꞌaa máꞌ Ana̱ꞌlóꞌ ná inuu ne̱, jamí A̱ꞌdá-mógó máꞌ mangaa ñajuun aguu ne̱. 24Jamí xa̱bo̱ xuajen tsí júwa̱ꞌ mbá xúgíí numbaa, tsí ni̱gu̱ma-jáwíin,#21.24 Ríga̱ mbá tikhu i̱yi̱i̱ꞌ griégo̱ rí wayuu rí tsíꞌthán «tsí ni̱gu̱ma-jáwíin». ma̱mbiꞌñúú ga̱jma̱á aguu ne̱. Jamí thúngaa numbaa ma̱guwá ná xuajen rúꞌkhue̱n, ma̱guwée̱ꞌ-judúu̱n rí mitsaan guáꞌdáa̱ jamí mu̱xna̱xíi̱ gamakúu̱n ikhín. 25Ni miꞌtsú tsíjúgua̱a xkrugoo xuajen rí mbá jañii mbiꞌi, numuu rí nda̱a̱ máꞌ mbroꞌon rí ikhín. 26Ikhín magóó judúún xa̱bo̱ mbá xúgíí rí phú mitsaan jamí mbá xúgíí gamaku rí ríga̱ ná tsu̱du̱u̱ mbá xúgíí numbaa. 27I̱ndo̱ó máꞌ numuu rí ma̱xáto̱ꞌo̱o̱ nimbá rí xkawe̱ꞌ ná xuajen rúꞌkhue̱n, ni máꞌ nimbáa tsí naꞌne-mbi̱in tsí ra̱ꞌkháa Ana̱ꞌlóꞌ ñajúún o tsí naꞌne-nduwa mbo̱ꞌ. Rí i̱ndo̱ó máꞌ tsí ka̱ma mbiꞌñúú ná awúun i̱yu̱u̱ꞌ A̱ꞌdá-mógó, ma̱tu̱ꞌu̱ún rí mbuya jámuu ikhín.
Currently Selected:
Rí wasngájma 21: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
