Rí wasngájma 20
20
Naxtoꞌwóo gixa̱a̱ mbá míl tsigu
1A̱ꞌkhue̱n ndi̱yo̱o̱ rí na̱ga̱taa mbáa ánje̱l ná mikhuíí, jayée̱ rí marmáꞌthoo̱ xkrugoo iñá rí me̱jno̱ꞌ, jamí jayée̱ mbá ñuu ajwa̱nꞌ mba̱a̱. 2Nigatuwii̱n a̱bo̱ꞌ maña̱a̱ꞌ tsí phú mba̱a̱, tsí xtáa̱ wajyúú mbiꞌi, ikhaa máꞌ tsí ñajuun gixa̱a̱ jamí Satanás, niroꞌwóo̱ mbá míl (1 000) tsigu. 3A̱ꞌkhue̱n nida-maꞌáa̱n ná awúun iñá rí me̱jno̱ꞌ. Ikhín nirugua-raꞌaa̱ jamí niruguaa̱ xa̱ꞌ rawuun iñá, kajngó náxágájnuu̱ ná inuu numbaa rí ma̱ꞌne-nduwii̱n xa̱bo̱ awúun rí mbá míl tsigu. Ído̱ gájráꞌáan rí mbá míl tsigu, a̱ꞌkhue̱n mi̱ꞌkhuíí gixa̱a̱, kajngó ma̱ngrigo̱o̱ꞌ mbá wátha̱ wáa mbiꞌi.
4A̱ꞌkhue̱n ndi̱yo̱o̱ xíli̱ín xa̱bo̱ ñajun, ikhín nitrigi̱in tsí nijanúú tsiakhe̱ rí mu̱xu̱da̱a̱ꞌ awan. Xúꞌkhue̱n máꞌ ndi̱yo̱o̱ ními̱í tsí ni̱ga̱taa idxu̱ún nene̱ xa̱bo̱, numuu nithee̱n rí nune̱-nuwii̱n Jesús, jamí ga̱jma̱á numuu ajngáa rawuun Ana̱ꞌlóꞌ. Tsíge̱ꞌ ñajúún tsí túne̱-mba̱a̱ xu̱kú xkawi̱i̱ꞌ ni máꞌ túne̱-mba̱a̱ xtiꞌkhuu̱, ni máꞌ túni̱ꞌñá-mijnée̱ rí ma̱gi̱ꞌma tsinuu̱ ná jédúu̱n ni máꞌ ná ñawúu̱n. Ndiyaa̱ mbiꞌñúu̱ jamí nithan-ñajwii̱n gajmíi̱ Krísto̱ mbá míl tsigu. 5Ríge̱ꞌ ñajuun timbá rí nduya̱a mbiꞌñúú tsí nijáñúú. Xómáꞌ i̱ꞌwíin tsí nijáñúú, na̱nguá ndiyaa̱ mbiꞌñúu̱ asndo gájráꞌáan rí mbá míl tsigu. 6Phú gagi júwa̱ꞌ xa̱bi̱i Ana̱ꞌlóꞌ tsí mbuya̱a mbiꞌñúú timbá miꞌtsú rí ma̱wa̱xúun tsí nijáñúú. Náxájáñúu̱ rí riajma̱ nothon, numuu rí ikhii̱n ma̱nindxúu̱n dxakuiin Ana̱ꞌlóꞌ jamí dxakuiin Krísto̱, xúꞌkhue̱n máꞌ muthan-ñajwii̱n ga̱jma̱á nindxu̱u̱ mbá míl tsigu.
Gixa̱a̱ mamínu̱u̱ꞌ ná awúun agu rí nakha jámuu
7Ído̱ gájráꞌáan rí mbá míl (1 000) tsigu, a̱ꞌkhue̱n mi̱ꞌkhuíi Satanás ná rí júgua-raꞌaa, 8jamí ma̱ꞌgee̱ gáꞌne-nduwii̱n xa̱bo̱ tsí júwa̱ꞌ ná mbá nákho̱ rakhóo numbaa, ikhaa rí ñajuun numbaa Góg jamí Magóg. A̱ꞌkhue̱n ma̱ru̱wii̱n xa̱bo̱ tsí juda ajwa̱nꞌ mune̱ xkujndu, jamí ma̱ꞌne mbaꞌii̱n mi̱ndaꞌkho xómá we̱ꞌe̱ rí ríga̱ ná rawuun iya a̱pha̱. 9Mbá xúgíí numbaa ma̱guwá xa̱bi̱i gixa̱a̱. Mu̱xu̱ꞌma-mijnée̱ jamí mu̱rugua-maꞌáa̱n ná gachúún xa̱bi̱i Ana̱ꞌlóꞌ, ná xuajen rí nandoo jaꞌyoo Ana̱ꞌlóꞌ. Xómáꞌ Ana̱ꞌlóꞌ ma̱ꞌne rí ma̱ga̱taa agu mikhuíí rí matsikhíi̱n mbá jayu. 10Xómáꞌ gixa̱a̱, tsí neꞌne-nduwiin xa̱bo̱ tsúꞌkhue̱n, mi̱ꞌdaa̱ ná awúun agu a̱pha̱ rí nakha ga̱jma̱á asúfre̱, ná waꞌdaa máꞌ xu̱kú xkawi̱i̱ꞌ ga̱jma̱á tsí na̱gu̱wíjnga̱a ajngáa rí mi̱nduwa mangaa. Ikhín mu̱míníi̱ mbiꞌíí mbruꞌwíín jamí jámuu mbiꞌi.
Na̱to̱ꞌo̱o̱ awan ga̱jma̱á numúú tsí nijáñúú
11Nda̱wa̱á a̱ꞌkhue̱n ndi̱yo̱o̱ mbá xíle̱ mba̱a̱ miꞌxá ná na̱ge̱ꞌe̱ thúngaa, jamí mbáa tsí ꞌgí ná inuu ne̱. Xómáꞌ mikhu ga̱jma̱á ju̱ba̱ꞌ nindánti̱ga̱ ne̱ ná inuu̱, jamí nánguá nikujma náá ni̱ka̱ ne̱. 12Jamí ndi̱ñu̱ú tsí nijáñúú, wájwii̱n ná inuu ꞌgí xíli̱i Ana̱ꞌlóꞌ, xa̱bo̱ mba̱ꞌwu̱un jamí xa̱bo̱ tsí makiin. A̱ꞌkhue̱n ni̱ma̱ꞌthoo mbá tikhu i̱yi̱i̱ꞌ, xúꞌkhue̱n máꞌ ni̱ma̱ꞌthoo i̱mba̱ i̱yi̱i̱ꞌ mangaa, ná tima mbiꞌñúú tsí nduya jámuu. A̱ꞌkhue̱n ni̱to̱ꞌo̱o̱ awan ga̱jma̱á numúú tsí nijáñúú xómá jaꞌyoo rí neꞌne mbámbáa, jamí xómá waꞌtháán ná awúun i̱yi̱i̱ꞌ rúꞌkhue̱n. 13Xómáꞌ iya a̱pha̱ nixnáxii̱n xa̱bo̱ tsí nijáñúú ná awúu̱n, xúꞌkhue̱n máꞌ neꞌne tsiakhe̱ rí na̱gu̱díin xa̱bo̱ jamí iñá-wajíín mangaa, nixnáxii̱n tsí gachúún ikhín. Mbá xúgíi̱n tsí nijáñúú ni̱to̱ꞌo̱o̱ awan ga̱jma̱á numúu̱, xómá jaꞌyoo rí neꞌne mbámbáa. 14A̱ꞌkhue̱n tsiakhe̱ rí na̱gu̱díin xa̱bo̱ jamí iñá-wajíín, nájma̱ ne̱ waꞌda-maꞌán ná awúun agu a̱pha̱. Ríge̱ꞌ ñajuun rí ma̱ja̱ñúú xa̱bo̱ rí riajma̱ nothon. 15Jamí jámba̱a̱ xa̱bo̱ tsí tákujma̱a mbiꞌyuu ná awúun i̱yi̱i̱ꞌ rí ka̱ma mbiꞌñúú tsí nduya jámuu, waꞌda-maꞌáa̱n ná awúun agu a̱pha̱.
Currently Selected:
Rí wasngájma 20: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
