Rí wasngájma 11
11
Ná xuajen Jerusalén nakujmii a̱jmi̱i xa̱bo̱ tsí nuthan rí ndiyáá
1Nda̱wa̱á a̱ꞌkhue̱n nijanúꞌ mbá e̱ꞌe̱n rí xómá ixe̱ na̱giewan-muu jaꞌnii, jamí waꞌthúnꞌ: «Ayu gáta̱giéwan guꞌwá dxákuiin Ana̱ꞌlóꞌ, atagiéwan ná natráma tsi̱gi̱jña̱ꞌ jamí araxnii xa̱bo̱ tsí nune̱-mba̱a̱ Ana̱ꞌlóꞌ ikhín. 2I̱ndo̱ó máꞌ numuu rí ma̱xáta̱giéwan rixo̱o̱ guꞌwá dxákuun, numuu rí ikhín nijanúú ma̱chúún xa̱bo̱ tsí ra̱ꞌkháa judío̱ ñajúún. Ikhii̱n mu̱sngu̱ti̱gúu̱n xuajen Jerusalén mbá atsú tsigu i̱tikhu.#11.2 Ná i̱yi̱i̱ꞌ griégo̱ naꞌthán «a̱jma̱ skíñú i̱jmi̱i go̱nꞌ (42)». 3Jamí ikhúúnꞌ ma̱xu̱ꞌmíi a̱jmi̱i xa̱bi̱ꞌ tsí muthan ga̱jma̱á numuꞌ, kajngó mu̱rawíjngaa̱ ajngóꞌ mbá atsú tsigu i̱tikhu.#11.3 Ná i̱yi̱i̱ꞌ griégo̱ naꞌthán «mbá míl a̱jma̱ siénto̱ atsú skíñú (1 260) mbiꞌi». Ma̱ju̱wá-jínúu̱ jamí majúwúu̱n xtíin xíni rí naꞌtsu̱-raꞌa.
4Tsíge̱ꞌ ñajúún nájma̱ ixe̱ olíbo̱ jamí nájma̱ ajwa̱nꞌ ná natráma agu rí wájun ná inuu Ana̱ꞌlóꞌ#11.4 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «inuu Táta̱». tsí naꞌthán-ñájuun mbá xúgíí numbaa. 5Xí mbáa xa̱bo̱ nandoo gáꞌne-jámbi̱ñúu̱ꞌ, nangujwíi agu ná rawúu̱n rí matsikhíin mbá jayu tsí xa̱bo̱ sia̱nꞌ drígúu̱n. Xkuaꞌnii jaꞌyoo rí ma̱ja̱ñúu asndo tsáa máꞌ tsí nandoo gáꞌne-jámbi̱ñúu̱ꞌ. 6Guáꞌdáa̱ tsiakhe̱ rí mu̱ruguáa̱ mikhu kajngó ma̱xáxnúu ruꞌwa mbá xúgíí mbiꞌi rí mu̱rawíjngaa̱ ajngóo Ana̱ꞌlóꞌ. Xúꞌkhue̱n máꞌ guáꞌdáa̱ tsiakhe̱ rí mu̱rtaxii̱ iya ma̱ꞌni̱i iꞌdi, jamí rí mune̱-jámbi̱yíi̱ꞌ ju̱ba̱ꞌ ga̱jma̱á mbá xúgíí inii nandii ꞌguéen, asndo wátha̱ máꞌ nothon rí nandúu̱n ikhii̱n.
7Ído̱ gámbúu̱n muthee̱n ajngáa rí nixnángawúu̱n Ana̱ꞌlóꞌ, a̱ꞌkhue̱n rí xu̱kú xkawi̱i̱ꞌ tsí nagájnuu ná iñá rí me̱jno̱ꞌ ma̱tsa̱ñu̱u̱ꞌ gajmíi̱. Ikhaa tsúꞌkhue̱n ma̱ꞌngo̱o̱ inúu̱ jamí ma̱gu̱díi̱n. 8Mabóo xuñúu̱ ná jamba̱a̱ ma̱jña̱ꞌ ná ti̱kua̱pho̱o̱ xuajen mba̱a̱ rí naꞌne xtiꞌkhuu Sodóma̱ jamí Egípto̱, ikhín máꞌ ná waꞌdujmaa Tátiálóꞌ ná ixe̱ krúsi̱ mangaa. 9Mbá xúgíí xuajen, mbá xúgíí inii xa̱bo̱, mbá xúgíí ajngáa rí nuthan xa̱bo̱ jamí mbá xúgíí numbaa mbuyáá xa̱bo̱ xuñúu̱ awúun rí atsú mbiꞌi i̱tikhu, jamí mu̱xúni̱ꞌñáa̱ rí mi̱ꞌdu̱u xuñúu̱. 10Mbá xúgíí inuu numbaa phú ma̱ꞌdxu a̱kui̱ín xa̱bo̱ rí nijáñúu̱. Asndo muni̱i̱ ndxa̱a̱ jamí muxna-mijnée̱ tsi̱gi̱jña̱ꞌ, numuu rí phú ni̱mínii̱ nene̱ a̱jmi̱i tsí ni̱rawíjnga̱a ajngóo Ana̱ꞌlóꞌ.
11I̱ndo̱ó máꞌ numuu rí ído̱ ninújngoo mbá atsú mbiꞌi i̱tikhu, a̱ꞌkhue̱n neꞌne Ana̱ꞌlóꞌ rí ma̱ꞌkha̱a xúu̱nꞌ kajngó mbuyaa̱, jamí niwájuu̱n nakhúu̱n. Xómáꞌ xa̱bo̱ tsí ndiñúu̱, mbá xúgíi̱n nimíñúu̱ mi̱ndaꞌkho. 12A̱ꞌkhue̱n tsí a̱jmi̱i nu̱rawíjnga̱a ajngóo Ana̱ꞌlóꞌ ni̱dxawíi̱n mbá a̱ꞌwá rí phú gakhe̱ niwán ná mikhuíí, rí waꞌthúu̱n neꞌne: «A̱tsima̱aꞌlaꞌ ge̱jyoꞌ». A̱ꞌkhue̱n nigúu̱n mikhuíí ná majñu̱u̱ du̱u̱n, jamí mbá xúgíin xa̱bo̱ sia̱nꞌ gajmíi̱ ndiyáá rí nigúu̱n.
13Ikhín máꞌ awúun mbrúma rúꞌkhue̱n phú gakhe̱ nixma jamí ningudi-ri̱ga̱a mbóó rí mbámbá gu̱wa̱ꞌ guꞌwá ná awúun xuajen, jamí nijáñúú mbá juwan míl (7 000) xa̱bo̱. Xómáꞌ xa̱bo̱ tsí tájáñúú phú nimíñúu̱ jamí nene̱-mba̱a̱ Ana̱ꞌlóꞌ Mikhuíí.
14Xkuaꞌnii ninújngoo riajma̱ «¡wáái̱i̱!» Jamí inu máꞌ ma̱ꞌkha̱ rí riatsú.
Nandiyuu ajwa̱nꞌ e̱ꞌmbi ánje̱l tsí tijwaan
15Ánje̱l tsí tijwaan nindiyuu ajwa̱nꞌ e̱ꞌmbi, a̱ꞌkhue̱n phú gakhe̱ niwán mbaꞌa a̱ꞌwá ná mikhuíí. Xáꞌnii nithee̱n:
«Rí xúge̱ꞌ rá, mbá xúgíí rí nithán-ñájwíín ná numbaa nanújnga̱a ná ñawúun Táta̱ rí maꞌthán-ñájuun,
xúꞌkhue̱n máꞌ ná ñawúun Krísto̱ tsí ikhaa̱ nixúngua̱a̱ꞌ.
Ikhaa̱ maꞌthán-ñájwii̱n jámuu mbiꞌi».
16Jamí xa̱bo̱ buanuu tsí mbá skíñú akhu̱un (24) tsí trigi̱in ná inuu Ana̱ꞌlóꞌ, ni̱smáti̱gúu̱n, ni̱tsrige̱e̱ inúu̱ asndo mbayíí jamí nene̱-mba̱a̱ Ana̱ꞌlóꞌ, 17jamí nithee̱n:
«Táta̱ Ana̱ꞌxo̱ꞌ, tsáánꞌ xtaꞌdáá mbá xúgíí tsiakhe̱,
ikháánꞌ ñajwaanꞌ tsí xtaa máꞌ jayu, tsí niraxtaa máꞌ asndo nákhí wajyúú mbiꞌi, jamí tsí wéje̱ máꞌ rí mi̱dxa̱ꞌ.#11.17 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «jamí tsí wéje̱ máꞌ rí mi̱dxa̱ꞌ».
Núma̱aꞌ la numuu rí nitagíꞌdi̱ín najmaaꞌ ski̱ya̱a̱ꞌ rí phú mba̱a̱,
jamí nitagíꞌdi̱ín narathán-ñájun.
18Nijiꞌníi juyaaꞌ xa̱bo̱ xuajñuu mbá xúgíí numbaa.
Jamí ikháánꞌ mangáánꞌ najiꞌnáá xtañúu̱.
Ni̱ga̱nú máꞌ mbiꞌi rí ma̱tra̱jwa̱ꞌ numúú tsí nijáñúú,
xúꞌkhue̱n máꞌ rí ma̱tha̱ne̱ rí mu̱drígú gamaku yumbiáaꞌ tsí ni̱rawíjnga̱a ajngáaꞌ,
gajmíí máꞌ xa̱bo̱ xuajñaaꞌ jamí mbá xúgíin tsí nduya-makuaaꞌ, xa̱bo̱ tsí makiin jamí xa̱bo̱ tsí mba̱ꞌwu̱un.
Jamí ni̱ga̱nú máꞌ mbiꞌi rí ma̱tha̱ne̱ gámbi̱in tsí nune̱-gámba̱a ju̱ba̱ꞌ».
19A̱ꞌkhue̱n ni̱ma̱ꞌthoo guꞌwá dxákuiin Ana̱ꞌlóꞌ ná mikhuíí, jamí ikhín nikujma e̱jnu̱u̱ awan rí nixuda-mina̱ꞌ Ana̱ꞌlóꞌ. Xúꞌkhue̱n máꞌ nixpíbi mbaꞌa nothon, phú wee niwán mbaꞌa nothon, nixma jamí phú nixnúu ruꞌwa iꞌtsí.
Currently Selected:
Rí wasngájma 11: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
