Rí wasngájma 1
1
Phú gagi xtáa tsí na̱gu̱xnuu i̱yi̱i̱ꞌ ríge̱ꞌ
1Ríge̱ꞌ ñajuun rí Ana̱ꞌlóꞌ nisngájmuu Jesukrísto̱, kajngó ikhaa̱ masngájmúu̱ yumbée̱ rí inu máꞌ ma̱ri̱gá. Jesukrísto̱ nixúngua̱a̱ꞌ ánje̱l drígo̱o̱ kajngó masngájmuu̱ ne̱ yumbée̱ tsí mbiꞌyuu Juáán. 2Xómáꞌ ikhaa̱ naꞌthée̱n rí gakon mbá xúgíí rí ndiꞌyoo̱ ga̱jma̱á numuu ajngóo Ana̱ꞌlóꞌ, jamí ga̱jma̱á numuu máꞌ Jesukrísto̱. 3Phú gagi xtáa tsí na̱gu̱xnuu ná inúú xa̱bo̱ ajngáa ríge̱ꞌ, rí niꞌthán Ana̱ꞌlóꞌ rí ma̱ri̱gá, jamí phú gagi máꞌ júwa̱ꞌ tsí nu̱dxawíín ne̱, xúꞌkhue̱n máꞌ nune̱-mbáníí rí ka̱ma waꞌtháán ge̱jyoꞌ, numuu rí nangiyuu máꞌ mbiꞌi rí ma̱mba̱núu ne̱.
4Ikhúúnꞌ ñajunꞌ Juáán, na̱ra̱xáanꞌlaꞌ mbá juwan kutháanꞌlaꞌ tsáanꞌ nanimba̱ꞌlaꞌ ju̱ya̱á Jesús ná numbaa Ásia̱.
Ana̱ꞌlóꞌ gáꞌne-tsakun-rámáaꞌlaꞌ jamí ga̱ꞌnii̱ rí ma̱juwalaꞌ tsímáá. Ikhaa̱ xtáa̱ máꞌ jayu, xtáa̱ máꞌ asndo nákhí wajyúú mbiꞌi, jamí wéje̱ máꞌ rí ma̱ꞌkhe̱e̱. Jamí ikhaa máꞌ gúne̱ mbá juwiin xe̱ꞌ mangiin, tsí júwa̱ꞌ ná inuu ꞌgí xíli̱i Ana̱ꞌlóꞌ. 5Xúꞌkhue̱n máꞌ gáꞌne Jesukrísto̱ mangaa, tsí nasngájma rí gakon, tsí ginii jayu ndiyáa mbiꞌyuu, jamí tsí naꞌthán-ñájúún mbá xúgíin thúngaa ná numbaa ríge̱ꞌ. Jesukrísto̱ nandoo jaꞌyalóꞌ jamí neꞌne-jríñáa̱ꞌlóꞌ ná awúun aꞌkhánlóꞌ ga̱jma̱á majñu̱u̱ iꞌdiuu̱ rí ni̱ga̱díí nákhí nijáñuu̱. 6Xúꞌkhue̱n máꞌ niꞌnii̱ rí ma̱nindxa̱ꞌlóꞌ thúngaa jamí rí ma̱nindxa̱ꞌlóꞌ dxakuun tsí nu̱ñajun ná inuu Ana̱ꞌlóꞌ, tsí ñajuun máꞌ Anu̱u̱ ikhaa̱. A̱gu̱ma-mba̱a̱ i̱ndo̱ó máꞌ Jesukrísto̱ jamí a̱gi̱ꞌdoo̱ mbá xúgíí tsiakhe̱ jámuu mbiꞌi. Xkuaꞌnii gáꞌne.
7¡Gu̱ya̱xe̱laꞌ, ná inuu du̱u̱n na̱ꞌkha̱ Krísto̱!
Mbá xúgíin xa̱bo̱ numbaa mbuyáa̱,
asndo tsí ni̱ru̱wa̱nꞌ xuyuu̱ mangiin.
Mbá xúgíí xuajen numbaa mu̱mbi̱ya̱ꞌ-jínúú xa̱bo̱ jamí ma̱tájwíin a̱kuíi̱n ga̱jma̱á numuu̱.
Phú gakon rí xkuaꞌnii ma̱ri̱gá. Xkuaꞌnii gáꞌne.
8Xáꞌnii iꞌthán Táta̱ Ana̱ꞌlóꞌ: «Ikhúúnꞌ ñajunꞌ xómá tsina Álfa̱ jamí xómá tsina Oméga̱, tsí na̱gi̱ꞌdu̱u̱n-muu jamí tsí ndámba̱wóo.#1.8 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «tsí na̱gi̱ꞌdu̱u̱n-muu jamí tsí ndámba̱wóo». Ikhúúnꞌ ñajunꞌ tsí xtáa̱ máꞌ jayu, tsí xtáa̱ máꞌ asndo nákhí wajyúú mbiꞌi, jamí wéje̱ máꞌ rí ma̱ꞌkha. Ikhúúnꞌ gúꞌdo̱ꞌ mbá xúgíí tsiakhe̱».
Juáán ndaꞌyoo mbáa tsí xómá A̱dée Xa̱bo̱ Numbaa jaꞌnii
9Ikhúúnꞌ ñajunꞌ dxájwalaꞌ Juáán jamí ikháanꞌ ñajwanlaꞌ a̱ngui̱nꞌ ná majñu̱u̱ jamínu̱ꞌ, xúꞌkhue̱n máꞌ ñajwanlóꞌ xa̱bo̱ tsí naꞌthán-ñájúún Ana̱ꞌlóꞌ jamí mbéꞌtháán guáꞌdáálóꞌ ski̱yu̱u̱ꞌ Jesukrísto̱ kajngó ma̱ꞌnga̱ꞌlóꞌ inuu jamínu̱ꞌ. Ga̱jma̱á numuu rí na̱tha̱n-ráꞌalo̱ꞌ ajngáa rawuun Ana̱ꞌlóꞌ jamí ga̱jma̱á numuu Jesukrísto̱, xtáálo̱ꞌ ná Pátmo̱s, mbaa rí kua̱ꞌa̱n ná awúun iya a̱pha̱. 10Mbá mbiꞌi rí jaꞌyoo Táta̱, Xu̱u̱ꞌ Ana̱ꞌlóꞌ neꞌne asndo xó rí ndi̱yo̱o̱ inu-mbiꞌíí wáa jaꞌnii, a̱ꞌkhue̱n ni̱dxawuun ná tsu̱du̱ꞌ mbá a̱ꞌwá rí phú gakhe̱ niwán, asndo xómá a̱ꞌwóo ajwa̱nꞌ e̱ꞌmbi jaꞌnii. 11Xáꞌnii niꞌthínꞌ a̱ꞌwá rúꞌkhue̱n: «Ikhúúnꞌ ñajunꞌ xómá tsina Álfa̱ jamí xómá tsina Oméga̱, tsí ginii jayu jamí tsí nda̱wa̱á jayu.#1.11 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Ikhúúnꞌ ñajunꞌ xómá tsina Álfa̱ jamí xómá tsina Oméga̱, tsí ginii jayu jamí tsí nda̱wa̱á jayu». Aratháán ná inuu i̱yi̱i̱ꞌ rí nathayáá, jamí ataxúꞌma ne̱ ná inúú mbá juwan kuthuun tsí nanimbu̱únꞌ juyeꞌ ná numbaa Ásia̱, mbá juwan xuajen: Éfe̱so̱, Esmírna̱, Pérga̱mo̱, Tiatíra̱, Sárdi̱s, Filadélfia̱ jamí Laodiséa̱».
12Ído̱ nituꞌúúnlo̱ꞌ kajngó mba̱yo̱o̱ tsáa ñajuun tsí naꞌthínꞌlo̱ꞌ, a̱ꞌkhue̱n ndi̱yo̱o̱ wájun mbá juwan ajwa̱nꞌ mo̱jmo̱ꞌ ná natráma agu. 13Ná majñu̱u̱ wájun ajwa̱nꞌ rí natráma agu, ikhín ndi̱yo̱o̱ wéje̱ mbáa tsí xómá A̱dée Xa̱bo̱ Numbaa jaꞌnii. Júwuu̱n mbá xtíin mbijwa̱ꞌ rí na̱ga̱nú asndo ná aphuu nakhúu̱ jamí ja̱rnga̱xto̱o̱ mbá xtíin rí giaxu̱u̱ ajwa̱nꞌ mo̱jmo̱ꞌ ná xo̱xto̱o̱. 14Rí tsu̱u̱n idxu̱u̱ miꞌxá mbá jayu xómá mogo̱, o xómá idi ngúwán rí na̱ga̱taa ná inuu júba̱ mbo̱ꞌ. Rí iduu̱ nambiꞌi-taꞌa mi̱ndaꞌkho xómá ri̱ꞌyu̱u̱ agu. 15Rí nakhúu̱, maña̱ꞌ mbá jayu xómá ajwa̱nꞌ rí ni̱kú nigájna̱a ná awúun agu. Rí a̱ꞌwóo̱ gakhe̱ mi̱ndaꞌkho iwán xómá iwán mbaꞌa xtangaya mba̱ꞌwo̱. 16Ná ñawún mújúu̱n jaguu̱n mbá juwiin a̱ꞌgua̱án, jamí ná rawuu̱n nagájnuu mbá chíde̱ xíni rí a̱jma̱ rawuun. Rí inuu̱, mambiꞌi-taꞌa xómá nambiꞌi-taꞌaa a̱kha̱ꞌ ído̱ rí wakha̱ꞌ niníí jayu.
17Ído̱ ndi̱yo̱o̱lo̱ꞌ, ni̱xpa̱tríga̱-mina̱ꞌ mbayíí ná wíji̱i̱, asndo xó rí nijáñuꞌ máꞌ jaꞌnii. Xómáꞌ ikhaa̱ nixkrámúu̱ ga̱jma̱á ñawún mújúu̱n jamí niꞌthínꞌ: «Ma̱xámíñaaꞌ. Ikhúúnꞌ ñajunꞌ tsí ginii jayu jamí tsí nda̱wa̱á jayu. 18Ikhúúnꞌ ñajunꞌ tsí xtáá nda̱ya̱ jayu. Ikhúúnꞌ ñajunꞌ tsí nijáñuu, xómáꞌ xúge̱ꞌ rá xtáá nda̱ya̱lo̱ꞌ jámuu. Xkuaꞌnii gáꞌne.#1.18 Ríga̱ mbá tikhu i̱yi̱i̱ꞌ griégo̱ rí wayuu rí na̱nguá iꞌthán «Xkuaꞌnii gáꞌne». Jamí gúꞌdo̱ꞌlo̱ꞌ tsiakhe̱ inuu tsiakhe̱ rí na̱gu̱díin xa̱bo̱ jamí inuu iñá-wajíín.
19»Aratháán rí nithayáá: ikhaa rí naríga̱ xúge̱ꞌ jamí rí ma̱ri̱gá nda̱wa̱á. 20Ikhúúnꞌ ma̱tha̱a̱nꞌ dí ñajuun iyoo gáꞌthán rí ríga̱ ngu̱ꞌwo̱o̱ nithayáá: Mbá juwiin a̱ꞌgua̱án tsí nithañúú ná ñawún mújúnꞌ, ikhiin tsúꞌkhue̱n ñajúún mbá juwiin ánje̱l tsí nu̱ña̱wu̱ún mbá juwan kuthuun tsí nanimbu̱únꞌ juyeꞌ. Jamí mbá juwan ajwa̱nꞌ mo̱jmo̱ꞌ ná natráma agu rí nithayáá, ikhaa rúꞌkhue̱n ñajúún mbá juwan kuthuun tsí nanimbu̱únꞌ juyeꞌ.
Currently Selected:
Rí wasngájma 1: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
