Santiágo̱ 1
1
Santiágo̱ naraxi̱in xa̱bi̱i Ana̱ꞌlóꞌ tsí ni̱drúꞌúún
1Ikhúúnꞌ ñajunꞌ Santiágo̱, tsí naꞌne ñajuun Ana̱ꞌlóꞌ jamí Táta̱ Jesukrísto̱.
Na̱xu̱ꞌmá i̱yi̱i̱ꞌ ríge̱ꞌ inalaꞌ ikháanꞌlaꞌ tsáanꞌ ñajwanlaꞌ xa̱bo̱ judío̱ tsí nanimbu̱únꞌ juyáá Jesús, tsí ni̱drúꞌúún mbá xúgíí inuu numbaa.
Na̱ra̱xáanꞌlaꞌ.
Gajmá rí na̱ꞌkha̱ ná inalóꞌ naꞌne rí ma̱gajáanꞌlóꞌ
2A̱ngui̱nꞌ, ído̱ rí nanújngalaꞌ awúun mbaꞌa inii gajmá, ga̱ju̱ma̱ꞌlaꞌ rí phú gagi juwalaꞌ. 3Numuu rí ndu̱ya̱álaꞌ máꞌ rí ído̱ na̱ꞌkha̱ gajmá inalaꞌ numuu rí wéje̱ a̱kia̱nꞌlaꞌ ná inuu Ana̱ꞌlóꞌ, rúꞌkhue̱n naꞌne rí ma̱ꞌngo̱o̱ a̱kia̱nꞌlaꞌ. 4I̱ndo̱ó máꞌ numuu rí ndaꞌyóo rí ma̱ꞌngo̱o̱ a̱kia̱nꞌlaꞌ inuu mbá xúgíí, kajngó ma̱ꞌne káxáanꞌlaꞌ jamí ma̱ꞌne jañii a̱kia̱nꞌlaꞌ, asndo náxáꞌyóo nitháan rí jaꞌyoo ma̱nindxa̱ꞌlaꞌ.
5Xí mbáa tsí ikháanꞌlaꞌ tsíma̱ñuu gáraꞌwíí rí máján, gaꞌthán-jáñuu̱ Ana̱ꞌlóꞌ, jamí Ana̱ꞌlóꞌ ma̱ꞌne rí ma̱ma̱ñuu̱ maraꞌwíi ne̱. Numuu rí Ana̱ꞌlóꞌ naxnúú mba̱a̱ mi̱ndaꞌkho mbá xúgíin tsí nu̱nda̱ꞌáa̱, jamí tsíꞌthée̱n máꞌ numuu ne̱. 6I̱ndo̱ó máꞌ numuu rí ído̱ na̱nda̱ꞌe̱e̱, ga̱we̱je̱ a̱kuii̱n ná inuu Ana̱ꞌlóꞌ, ma̱xáꞌne a̱jma̱ a̱kuii̱n nitháan. Numuu rí xa̱bo̱ tsí a̱jma̱ a̱kui̱in, asndo xómá iya rí nambúxu̱u̱ꞌ ná inuu iya a̱pha̱ jaꞌnii̱, rí ge̱e̱ ñúꞌún ixpátraꞌa eꞌne gíñá. 7Xa̱bo̱ tsí xkuaꞌnii jaꞌnii, ma̱xáju̱mu̱u̱ rí ma̱janáa̱ tháan rí na̱nda̱ꞌe̱e̱ gáꞌne Táta̱. 8Numuu rí xa̱bo̱ tsí a̱jma̱ a̱kui̱in, nariꞌkhuu̱ máꞌ xúꞌkhue̱n mbá xúgíí rí naꞌnii̱.
Xa̱bo̱ tsí ngíníi jamí tsí phú guáꞌdáá
9Dxájwalóꞌ tsí ngínáa, ma̱xáti̱yu̱u̱ꞌ, numuu rí phú gíꞌdoo numuu̱ ná inuu Ana̱ꞌlóꞌ. 10Xómáꞌ xa̱bo̱ tsí phú gíꞌdoo rá, ma̱xáti̱yu̱u̱ꞌ ído̱ rí Ana̱ꞌlóꞌ maxríguíi̱. Numuu rí xa̱bo̱ tsí phú gíꞌdoo, na̱nguá mba̱yo̱ꞌ xtáa̱, xómá re̱ꞌe̱ rí ríga̱ ná xanáá. 11Ído̱ rí natsimuu a̱kha̱ꞌ, phú mika eꞌne, jamí nojndoo iná. A̱ꞌkhue̱n nafrigu re̱ꞌe̱ jamí nánguá mitsaan giaxu̱u̱ ne̱. Xkuaꞌnii máꞌ ma̱mbáa xa̱bo̱ tsí phú gíꞌdoo jamí ma̱mbá-ri̱ga̱a mbá xúgíí rí gíꞌdoo̱ mangaa.
Phú gagi xtáa tsí na̱ꞌngo̱o̱ inuu tsirájá
12Phú gagi xtáa xa̱bo̱ tsí na̱nguá eꞌne rí xkawe̱ꞌ ído̱ rí na̱gu̱ma-rájáa, numuu ído̱ rí ni̱ꞌngo̱o̱ inuu tsirájá, a̱ꞌkhue̱n mbayáa̱ gamaku rí ma̱xtáa̱ jámuu, rí nixuda-mina̱ꞌ Ana̱ꞌlóꞌ maxnúú tsí nandúún juyáa̱. 13Ído̱ rí mbáa tsí ikháanꞌlaꞌ na̱gu̱ma-rájáa ma̱ꞌne rí xkawe̱ꞌ, ma̱xáꞌthée̱n rí Ana̱ꞌlóꞌ naꞌne-rájáa̱. Numuu rí Ana̱ꞌlóꞌ tsíyoo rí ma̱gu̱ma-rájáa̱ ma̱ꞌnii̱ rí xkawe̱ꞌ, ni máꞌ ikhaa̱ tsíꞌne-rájáa̱ nimbáa. 14A̱ꞌkhue̱n gakon, mbámbáa na̱gu̱ma-rájáa ído̱ rí nixmángua̱ꞌa̱a̱n eꞌne rí xkawe̱ꞌ nandxaꞌwá-mina̱ꞌ ma̱ꞌne. 15Ído̱ rí ni̱to̱ꞌo̱o̱ máꞌ ju̱ma̱ rí xkawe̱ꞌ ná idxu̱u̱ xa̱bo̱ rá, ma̱ga̱nú mbiꞌi rí ma̱ꞌnii̱ aꞌkhán gáꞌne ne̱. Jamí ído̱ rí nigaja̱a̱ máꞌ aꞌkhán rá, ma̱ja̱ñúu xa̱bo̱ gáꞌne ne̱.
16A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, mu̱xúne̱-nduwa-mijnálaꞌ. 17Mbá xúgíí kixná rí máján mi̱ndaꞌkho rí nu̱drígúlóꞌ, na̱ꞌkha̱ ne̱ ná mikhuíí, naxná ne̱ Ana̱ꞌlóꞌ tsí neꞌne-ku̱maa mbá xúgíí agu rí nambiꞌi-taꞌa ná mikhuíí. Tsí Ana̱ꞌlóꞌ, ni miꞌtsú tsíxtiꞌkhuu xómá rí jaꞌnii̱ ni máꞌ tsíba̱ñi̱i̱ꞌ xómá eꞌne nákua. 18Ana̱ꞌlóꞌ neꞌne rí ma̱gu̱máaꞌlóꞌ mbu̱júꞌ ga̱jma̱á majñu̱u̱ ajngáa rí gakon, numuu rí xkuaꞌnii ndiyoo̱ ikhaa̱, kajngó ma̱nindxa̱ꞌlóꞌ i̱jii̱n tsí ginuu jayu naꞌne-nuxii̱nꞌ.
Gu̱ꞌne̱-mbáníílóꞌ ajngáa rawuun Ana̱ꞌlóꞌ rí nu̱dxawíínlóꞌ
19Ikhaa numuu rúꞌkhue̱n, a̱ngui̱nꞌ tsáanꞌ phú nandoꞌ ja̱ya̱ꞌlaꞌ, mbá xúgiáanꞌlaꞌ gíꞌmaa rí mu̱ꞌgíi ñaꞌwanlaꞌ kajngó mu̱dxawíínlaꞌ rí nithánlaꞌ. Ma̱xáꞌcha̱ꞌlaꞌ guéño rí mu̱tha̱nlaꞌ, jamí ma̱xájiꞌnáaꞌlaꞌ nacha̱ guéño. 20Numuu rí xa̱bo̱ tsí najiꞌnáa guéño, tsíꞌnii̱ rí máján xómá rí nandoo Ana̱ꞌlóꞌ. 21Ikhaa jngó, gu̱ni̱ꞌñáá-ru̱ne̱laꞌ mbá xúgíí inii rí xkawe̱ꞌ, jamí mbá xúgíí rí ra̱máján. Jamí gu̱ne̱-waba-mijnálaꞌ kajngó ma̱goo mu̱drígúlaꞌ ajngáa rawuun Ana̱ꞌlóꞌ rí waꞌdu máꞌ ná xo̱xta̱ꞌlaꞌ, rí gíꞌdoo tsiakhe̱ rí ma̱ꞌne-jríñáaꞌlaꞌ.
22I̱ndo̱ó máꞌ numuu rí gu̱ne̱-mbáníílaꞌ ajngóo Ana̱ꞌlóꞌ, ra̱ꞌkhá mbájndi máꞌ rí i̱ndo̱ó mu̱dxawíínlaꞌ ne̱. Xí i̱ndo̱ó máꞌ nu̱dxawíínlaꞌ ne̱ jamí tsíne̱-mbáníílaꞌ ne̱, nu̱ne̱-nduwa-mijnálaꞌ máꞌ ikháanꞌlaꞌ. 23Numuu rí xa̱bo̱ tsí i̱ndo̱ó máꞌ nadxawuun ajngóo Ana̱ꞌlóꞌ jamí tsíꞌne-mbánuu̱ ne̱, ikhaa̱ jaꞌnii̱ xómá xa̱bo̱ tsí i̱ndo̱ó máꞌ nayaxu̱u̱ inuu ná iyaniwan, 24jamí ído̱ wámbo̱o̱ niyaxe̱-mine̱e̱ꞌ, a̱ꞌkhue̱n na̱ke̱e̱ máꞌ jamí mbá nacha̱ máꞌ nambumuu̱ xáne jaꞌnii inuu̱. 25Xómáꞌ tsí naꞌgíi idxu̱u̱ rí madxawuun mújúun ajngóo Ana̱ꞌlóꞌ rí phú máján, rí naꞌne-jríñáaꞌlóꞌ rá, phú gagi ma̱xtáa̱ asndo náá máꞌ rí naꞌnii̱, xí tsímbumuu̱ rí naꞌthán ne̱, jamí naꞌne-mbánuu̱ máꞌ xúꞌkhue̱n rí nadxawuu̱n.
26Xí mbáa na̱ju̱mu̱u̱ rí phú máján naꞌne-mbánuu rí nandoo Ana̱ꞌlóꞌ jamí tsíña̱wu̱u̱n rawuu̱n, naꞌne-nduwa-mine̱e̱ꞌ máꞌ ikhaa̱, a̱ꞌkhue̱n nakujma rí tsíꞌne-mbánuu̱ rí nandoo Ana̱ꞌlóꞌ. 27Tsí gakon rí phú máján naꞌne-mbánuu rí nandoo Ana̱ꞌlóꞌ Mikhuíí ñajuun tsíge̱ꞌ: tsí nambáñúú i̱jín-dxuáꞌa jamí go̱ꞌóxuáꞌa ído̱ rí júwe̱e̱ꞌ ndaꞌñúu̱. Xúꞌkhue̱n máꞌ rí na̱ña̱wa̱n-míne̱e̱ꞌ rí ma̱xáꞌnii̱ rí xkawe̱ꞌ rí nune̱ xa̱bo̱ ná numbaa ríge̱ꞌ.
Currently Selected:
Santiágo̱ 1: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
