Popular Bible Verses from Santiágo̱ 1

Share

A̱ngui̱nꞌ, ído̱ rí nanújngalaꞌ awúun mbaꞌa inii gajmá, ga̱ju̱ma̱ꞌlaꞌ rí phú gagi juwalaꞌ. Numuu rí ndu̱ya̱álaꞌ máꞌ rí ído̱ na̱ꞌkha̱ gajmá inalaꞌ numuu rí wéje̱ a̱kia̱nꞌlaꞌ ná inuu Ana̱ꞌlóꞌ, rúꞌkhue̱n naꞌne rí ma̱ꞌngo̱o̱ a̱kia̱nꞌlaꞌ.

Xí mbáa tsí ikháanꞌlaꞌ tsíma̱ñuu gáraꞌwíí rí máján, gaꞌthán-jáñuu̱ Ana̱ꞌlóꞌ, jamí Ana̱ꞌlóꞌ ma̱ꞌne rí ma̱ma̱ñuu̱ maraꞌwíi ne̱. Numuu rí Ana̱ꞌlóꞌ naxnúú mba̱a̱ mi̱ndaꞌkho mbá xúgíin tsí nu̱nda̱ꞌáa̱, jamí tsíꞌthée̱n máꞌ numuu ne̱.

Ikhaa numuu rúꞌkhue̱n, a̱ngui̱nꞌ tsáanꞌ phú nandoꞌ ja̱ya̱ꞌlaꞌ, mbá xúgiáanꞌlaꞌ gíꞌmaa rí mu̱ꞌgíi ñaꞌwanlaꞌ kajngó mu̱dxawíínlaꞌ rí nithánlaꞌ. Ma̱xáꞌcha̱ꞌlaꞌ guéño rí mu̱tha̱nlaꞌ, jamí ma̱xájiꞌnáaꞌlaꞌ nacha̱ guéño.

I̱ndo̱ó máꞌ numuu rí ndaꞌyóo rí ma̱ꞌngo̱o̱ a̱kia̱nꞌlaꞌ inuu mbá xúgíí, kajngó ma̱ꞌne káxáanꞌlaꞌ jamí ma̱ꞌne jañii a̱kia̱nꞌlaꞌ, asndo náxáꞌyóo nitháan rí jaꞌyoo ma̱nindxa̱ꞌlaꞌ.

I̱ndo̱ó máꞌ numuu rí gu̱ne̱-mbáníílaꞌ ajngóo Ana̱ꞌlóꞌ, ra̱ꞌkhá mbájndi máꞌ rí i̱ndo̱ó mu̱dxawíínlaꞌ ne̱. Xí i̱ndo̱ó máꞌ nu̱dxawíínlaꞌ ne̱ jamí tsíne̱-mbáníílaꞌ ne̱, nu̱ne̱-nduwa-mijnálaꞌ máꞌ ikháanꞌlaꞌ.

Phú gagi xtáa xa̱bo̱ tsí na̱nguá eꞌne rí xkawe̱ꞌ ído̱ rí na̱gu̱ma-rájáa, numuu ído̱ rí ni̱ꞌngo̱o̱ inuu tsirájá, a̱ꞌkhue̱n mbayáa̱ gamaku rí ma̱xtáa̱ jámuu, rí nixuda-mina̱ꞌ Ana̱ꞌlóꞌ maxnúú tsí nandúún juyáa̱.

Mbá xúgíí kixná rí máján mi̱ndaꞌkho rí nu̱drígúlóꞌ, na̱ꞌkha̱ ne̱ ná mikhuíí, naxná ne̱ Ana̱ꞌlóꞌ tsí neꞌne-ku̱maa mbá xúgíí agu rí nambiꞌi-taꞌa ná mikhuíí. Tsí Ana̱ꞌlóꞌ, ni miꞌtsú tsíxtiꞌkhuu xómá rí jaꞌnii̱ ni máꞌ tsíba̱ñi̱i̱ꞌ xómá eꞌne nákua.

Numuu rí xa̱bo̱ tsí i̱ndo̱ó máꞌ nadxawuun ajngóo Ana̱ꞌlóꞌ jamí tsíꞌne-mbánuu̱ ne̱, ikhaa̱ jaꞌnii̱ xómá xa̱bo̱ tsí i̱ndo̱ó máꞌ nayaxu̱u̱ inuu ná iyaniwan, jamí ído̱ wámbo̱o̱ niyaxe̱-mine̱e̱ꞌ, a̱ꞌkhue̱n na̱ke̱e̱ máꞌ jamí mbá nacha̱ máꞌ nambumuu̱ xáne jaꞌnii inuu̱.

Tsí gakon rí phú máján naꞌne-mbánuu rí nandoo Ana̱ꞌlóꞌ Mikhuíí ñajuun tsíge̱ꞌ: tsí nambáñúú i̱jín-dxuáꞌa jamí go̱ꞌóxuáꞌa ído̱ rí júwe̱e̱ꞌ ndaꞌñúu̱. Xúꞌkhue̱n máꞌ rí na̱ña̱wa̱n-míne̱e̱ꞌ rí ma̱xáꞌnii̱ rí xkawe̱ꞌ rí nune̱ xa̱bo̱ ná numbaa ríge̱ꞌ.

Ído̱ rí mbáa tsí ikháanꞌlaꞌ na̱gu̱ma-rájáa ma̱ꞌne rí xkawe̱ꞌ, ma̱xáꞌthée̱n rí Ana̱ꞌlóꞌ naꞌne-rájáa̱. Numuu rí Ana̱ꞌlóꞌ tsíyoo rí ma̱gu̱ma-rájáa̱ ma̱ꞌnii̱ rí xkawe̱ꞌ, ni máꞌ ikhaa̱ tsíꞌne-rájáa̱ nimbáa. A̱ꞌkhue̱n gakon, mbámbáa na̱gu̱ma-rájáa ído̱ rí nixmángua̱ꞌa̱a̱n eꞌne rí xkawe̱ꞌ nandxaꞌwá-mina̱ꞌ ma̱ꞌne.

Dxájwalóꞌ tsí ngínáa, ma̱xáti̱yu̱u̱ꞌ, numuu rí phú gíꞌdoo numuu̱ ná inuu Ana̱ꞌlóꞌ.