Xa̱bo̱ ebréo̱ 5
5
1Jámba̱a̱ tsí jayá idxu̱ún dxakuun nitraꞌwíi̱ ná majñu̱ú xa̱bo̱. Na̱gi̱ꞌi̱i̱ rí mañajwii̱n ná inuu Ana̱ꞌlóꞌ ga̱jma̱á numúú xa̱bo̱ xuajñuu̱, kajngó maxnáxi̱i̱ tsi̱gi̱jña̱ꞌ jamí maxnáxii̱n xu̱kú tsí nijáñúú kajngó Ana̱ꞌlóꞌ ma̱ꞌne mba̱a̱ a̱kui̱in jaꞌyoo aꞌkhán. 2Nandoo nañáwíin a̱kuii̱n jaꞌñúu̱ tsí júgoo inúú jamí nune̱ aꞌkhán, numuu rí phú wabaa̱ máꞌ mangaa̱. 3Ikhaa numuu rúꞌkhue̱n, gíꞌmaa rí maxnáxi̱i̱ tsi̱gi̱jña̱ꞌ ga̱jma̱á numuu aꞌkhúu̱n ikhaa̱, jamí ga̱jma̱á numuu aꞌkhúún xa̱bo̱ xuajen.
4Nimbáa tsíꞌgí-mina̱ꞌ máꞌ ikhaa rí ma̱ꞌne ñajun máján ríge̱ꞌ, rí i̱ndo̱ó máꞌ tsí watraꞌwíi neꞌne Ana̱ꞌlóꞌ, xómá watraꞌwíi Aarón nákhí wajyúú. 5Xkuaꞌnii máꞌ Krísto̱ mangaa, táꞌgí-mine̱e̱ꞌ máꞌ ikhaa̱ rí ma̱nindxu̱u̱ tsí jayá idxu̱ún dxakuun, rí jmína̱a̱ꞌ máꞌ Ana̱ꞌlóꞌ niꞌthúu̱n:
«Ikháánꞌ ñajwaanꞌ A̱ꞌdéꞌ.
Ikhúúnꞌ nanindxu̱ꞌ Ana̱a̱ꞌ asndo nákhí mbiꞌi ríge̱ꞌ».#5.5 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 2.7.
6Jamí i̱mba̱ miꞌtsú niꞌthán Ana̱ꞌlóꞌ:
«Ikháánꞌ jámuu ñajwaanꞌ dxakuun,
xómá ninindxu̱u̱ Melkisedék».#5.6 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 110.4.
7Nákhí Krísto̱ nixtáa ná numbaa ríge̱ꞌ, niꞌthán-kháa̱n jamí niꞌthán-jáñuu̱ Ana̱ꞌlóꞌ ga̱jma̱á yaꞌduu̱ numuu rí ma̱ꞌne-jríya̱a̱ꞌ rí ma̱xájáñúu̱. Nidxawuun Ana̱ꞌlóꞌ ajngóo̱ ga̱jma̱á numuu rí gamakuii̱ jamí naꞌne-mbánuu̱ rí nitháa̱n. 8Maske máꞌ A̱dée Ana̱ꞌlóꞌ ñajuu̱n, ga̱jma̱á majñu̱u̱ rí nimínu̱u̱ꞌ ni̱ma̱ñuu̱ ma̱ꞌnii̱ rí nandoo Anu̱u̱. 9Ído̱ wámba̱ ni̱gu̱ma-káxi̱i̱, a̱ꞌkhue̱n ninindxu̱u̱ tsí ma̱ꞌne-jáwíin jámuu mbá xúgíin tsí nune̱-mbáníí rí naꞌthúu̱n ikhaa̱. 10A̱ꞌkhue̱n niꞌthán Ana̱ꞌlóꞌ rí ikhaa̱ ñajuu̱n tsí jayá idxu̱ún dxakuun xómá ninindxu̱u̱ Melkisedék.
Nithán-máꞌánlóꞌ rí ma̱xáthangáanꞌlóꞌ tsu̱di̱í
11Phú ríga̱ mbaꞌa xóó rí ma̱tha̱nꞌlaꞌ ga̱jma̱á numuu ríge̱ꞌ, jamí mingíjyúu rí ma̱tha̱n-makalaꞌ ne̱, numuu rí tsíꞌgíi idxa̱ꞌlaꞌ rí mu̱dxawíínlaꞌ rí nithánlaꞌ. 12Nixtáa máꞌ rí ma̱nindxa̱ꞌlaꞌ tsí nusngáá numuu rí phú wajyúú máꞌ nu̱dxawíínlaꞌ ajngóo Ana̱ꞌlóꞌ. Xómáꞌ ikháanꞌlaꞌ nandalaꞌ rí mbáa maꞌthánlaꞌ mbu̱júꞌ gisngáá rí ginii jayu. Xómá e̱je̱n cháña̱ꞌ jaꞌñáaꞌlaꞌ rí ndaꞌyálaꞌ yaꞌdú, numuu rí xóó máꞌ tsíꞌnga̱ꞌlaꞌ gúpholaꞌ ganitsu rí gakhi̱i̱. 13Jámba̱a̱ tsí naꞌxúu, xóó tsíjmaa̱ gáraꞌwíi̱ ajngáa rí máján, numuu rí cháña̱ꞌ ñajuu̱n. 14Xómáꞌ ganitsu rí gakhi̱i̱ rá, naꞌpho̱ ne̱ xa̱bo̱ tsí nigaꞌnuu máꞌ, tsí na̱ma̱ñúú máꞌ nu̱ra̱ꞌwíí rí máján inuu rí ra̱máján, numuu rí tsitsíí máꞌ nuxna-mijnée̱ tsiakhe̱ rí muni̱i̱ xkuaꞌnii.
Currently Selected:
Xa̱bo̱ ebréo̱ 5: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
