1 Juáán 5
5
Tsí nanimbo̱o̱ꞌ jaꞌyoo Jesús na̱ꞌngo̱o̱ inuu numbaa ríge̱ꞌ
1Jámba̱a̱ xa̱bo̱ tsí nanimbo̱o̱ꞌ rí Jesús ñajuun Krísto̱, a̱dée Ana̱ꞌlóꞌ ñajuun tsúꞌkhue̱n. Jamí jámba̱a̱ tsí nandoo jaꞌyoo mbá táta̱ tsí gíꞌdiin i̱ji̱in, nandoo̱ máꞌ jaꞌñúu̱ i̱ji̱in táta̱ tsúꞌkhue̱n mangaa. 2Xáne lá gágoo mbu̱ꞌyáálóꞌ rí nandalóꞌ juꞌñúú i̱ji̱in Ana̱ꞌlóꞌ rá. Nduꞌyáálóꞌ ne̱ ído̱ rí nandalóꞌ juꞌyáá Ana̱ꞌlóꞌ jamí nu̱ꞌne̱-mbáníílóꞌ xtángawoo̱. 3Xáꞌnii nakujma rí nandalóꞌ juꞌyáá Ana̱ꞌlóꞌ: rí nu̱ꞌne̱-mbáníílóꞌ xtángawoo̱. Jamí na̱nguá máꞌ mingíjyúu rí mu̱ꞌne̱-mbáníílóꞌ xtángawoo̱. 4Numuu rí jámba̱a̱ xa̱bo̱ tsí ñajuun a̱dée Ana̱ꞌlóꞌ, na̱ꞌngo̱o̱ naꞌne ga̱jmáa̱ rí xkawe̱ꞌ rí ríga̱ ná numbaa ríge̱ꞌ. Ríge̱ꞌ ñajuun rí naꞌne rí na̱ꞌnga̱ꞌlóꞌ inuu rí xkawe̱ꞌ rí ríga̱ ná numbaa ríge̱ꞌ: rí wéje̱ a̱kia̱nꞌlóꞌ ná inuu Jesús. 5Tsáa ñajuun tsí na̱ꞌngo̱o̱ naꞌne ga̱jma̱á rí xkawe̱ꞌ rí ríga̱ ná numbaa ríge̱ꞌ róꞌ. Ikhaa tsí nanimbo̱o̱ꞌ rí Jesús ñajuun A̱dée Ana̱ꞌlóꞌ.
Rí naꞌthán Ana̱ꞌlóꞌ ga̱jma̱á numuu Jesukrísto̱
6Tsíge̱ꞌ ñajuun Jesukrísto̱, tsí ni̱ꞌkha̱ ga̱jma̱á majñu̱u̱ iya jamí iꞌdi. Ra̱ꞌkhá i̱ndo̱ó máꞌ ga̱jma̱á majñu̱u̱ iya, rí ga̱jma̱á majñu̱u̱ iya jamí iꞌdi. Jamí Xu̱u̱ꞌ Ana̱ꞌlóꞌ ñajuun tsí naꞌthán rí xkuaꞌnii niríga̱, numuu rí Xu̱u̱ꞌ Ana̱ꞌlóꞌ ñajuun tsí kuwiin. 7Numuu rí júwa̱ꞌ atsúun tsí nuthan ga̱jma̱á numuu ríge̱ꞌ ná mikhuíí: [Ana̱ꞌlóꞌ Mikhuíí, tsí ñajuun Ajngáa ga̱jma̱á Xu̱u̱ꞌ Ana̱ꞌlóꞌ. Jamí atsúun tsúꞌkhue̱n, mbóó máꞌ rí ñajúu̱n. 8Jamí atsúun tsí nuthan ga̱jma̱á numuu rúꞌkhue̱n ná mbayíí:]#5.7-8 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa rí júguaraꞌa ga̱jma̱á [...]. Xu̱u̱ꞌ Ana̱ꞌlóꞌ, iya jamí iꞌdi. Jamí atsúun tsúꞌkhue̱n, naꞌkho̱-mina̱aꞌ rí nuthee̱n. 9Xí nanimba̱ꞌlóꞌ rí nuthan xa̱bo̱ numbaa, i̱tha̱án máꞌ gíꞌdoo numuu rí ma̱nimba̱ꞌlóꞌ rí naꞌthán Ana̱ꞌlóꞌ, numuu rí rúꞌkhue̱n ñajuun rí naꞌthán Ana̱ꞌlóꞌ ga̱jma̱á numuu A̱dée. 10Xa̱bo̱ tsí nanimbo̱o̱ꞌ jaꞌyoo A̱dée Ana̱ꞌlóꞌ, tsúꞌkhue̱n naꞌne jañii a̱kui̱in rí naꞌthán Ana̱ꞌlóꞌ. Xómáꞌ xa̱bo̱ tsí tsínimbo̱o̱ꞌ jaꞌyoo Ana̱ꞌlóꞌ rá, naꞌnii̱ asndo xó rí mi̱nduwaa Ana̱ꞌlóꞌ, numuu rí tsínimbo̱o̱ꞌ rí naꞌthán Ana̱ꞌlóꞌ ga̱jma̱á numuu A̱dée. 11Ikhaa ríge̱ꞌ ñajuun ajngáa rí niꞌthán Ana̱ꞌlóꞌ: rí ma̱juwalóꞌ mbá jámuu. Jamí A̱dée̱ ñajuun tsí naꞌne rí ma̱juwalóꞌ mbá jámuu. 12Xa̱bo̱ tsí xtáa A̱dée Ana̱ꞌlóꞌ ná awúun a̱kui̱in, xtáa jámuu tsúꞌkhue̱n. Xómáꞌ xa̱bo̱ tsí na̱nguá xtáa A̱dée Ana̱ꞌlóꞌ ná awúun a̱kui̱in rá, na̱nguá xtáa jámuu tsúꞌkhue̱n.
I̱ꞌwá rí naꞌthán-máꞌán Juáán
13Na̱tháánlo̱ꞌ ajngáa ríge̱ꞌ ma̱ꞌga ná inalaꞌ, tsáanꞌ nanimba̱ꞌlaꞌ ju̱ya̱á A̱dée Ana̱ꞌlóꞌ, kajngó mbu̱ya̱álaꞌ rí juwalaꞌ mbá jámuu, jamí ma̱nimba̱ꞌlaꞌ ju̱ya̱á A̱dée Ana̱ꞌlóꞌ.#5.13 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «jamí ma̱nimba̱ꞌlaꞌ ju̱ya̱á A̱dée Ana̱ꞌlóꞌ». 14Ríge̱ꞌ ñajuun rí naꞌne jañii a̱kia̱nꞌlóꞌ juꞌyáa̱ ikhaa̱: Ana̱ꞌlóꞌ nadxawanlóꞌ xí nu̱nda̱ꞌáa̱lóꞌ mbá rí naꞌne máꞌ a̱kuii̱n ikhaa̱. 15Numuu rí nduꞌyáálóꞌ máꞌ rí Ana̱ꞌlóꞌ nadxawanlóꞌ asndo náá máꞌ rí nu̱nda̱ꞌáa̱lóꞌ, xúꞌkhue̱n máꞌ mangaa nduꞌyáálóꞌ máꞌ rí maxnálóꞌ rí nu̱nda̱ꞌáa̱lóꞌ.
16Xí mbáa xa̱bo̱ ndaꞌyoo rí dxájuu naꞌne mbá aꞌkhán rí tsírikhoo máꞌ rí ma̱xtáa̱ mbá jámuu, gaꞌthán-jáñuu̱ Ana̱ꞌlóꞌ ga̱jma̱á numuu dxájuu̱, jamí Ana̱ꞌlóꞌ ma̱ꞌne rí ma̱xtáa̱. Rúꞌkhue̱n i̱tha̱nlo̱ꞌ ga̱jma̱á numuu tsí naꞌne aꞌkhán rí tsírikhoo máꞌ rí ma̱xtáa mbá jámuu xa̱bo̱. Gakon máꞌ rí ríga̱ mangaa aꞌkhán rí narikhoo rí ma̱xtáa mbá jámuu xa̱bo̱, i̱ndo̱ó máꞌ numuu rí tsítha̱n rí mi̱ꞌthán-jáñíí Ana̱ꞌlóꞌ ga̱jma̱á numuu xa̱bo̱ tsí naꞌne aꞌkhán rúꞌkhue̱n. 17Aꞌkhán ñajuun mbá xúgíí inii rí ra̱máján, i̱ndo̱ó máꞌ numuu rí ríga̱ aꞌkhán rí tsírikhoo máꞌ rí ma̱xtáa mbá jámuu xa̱bo̱.
18Nduꞌyáálóꞌ máꞌ rí jámba̱a̱ tsí ñajuun a̱dée Ana̱ꞌlóꞌ, tsíꞌne máꞌ xúꞌkhue̱n aꞌkhán. Numuu rí ikhaa tsí ñajuun A̱dée Ana̱ꞌlóꞌ na̱ña̱wu̱u̱n, jamí xa̱bo̱ xkawi̱i̱ꞌ tsíxkajmaa̱.
19Nduꞌyáálóꞌ máꞌ rí ikháánꞌ ñajwanlóꞌ i̱ji̱in Ana̱ꞌlóꞌ, maske máꞌ xa̱bo̱ xkawi̱i̱ꞌ naꞌthán ñájúún mbá xúgíin i̱ꞌwíin xa̱bo̱ numbaa.
20Mangaa máꞌ nduꞌyáálóꞌ rí A̱dée Ana̱ꞌlóꞌ ni̱ꞌkha̱ ná numbaa, jamí ikhaa̱ máꞌ nixnálóꞌ rí mu̱ꞌne̱-nuwiinlóꞌ Ana̱ꞌlóꞌ, tsí phú gakon rí Ana̱ꞌlóꞌ ñajuun. Xómáꞌ ikháánꞌlóꞌ, juwalóꞌ mbóó ga̱jma̱á nindxu̱u̱ Jesukrísto̱, tsí phú gakon rí A̱dée Ana̱ꞌlóꞌ ñajuun. Tsíge̱ꞌ tsí phú gakon rí Ana̱ꞌlóꞌ ñajuun, jamí ikhaa̱ ñajuun tsí naꞌne rí ma̱juwalóꞌ mbá jámuu. 21I̱ji̱nꞌ, a̱gu̱ne̱ janíí-mijnálaꞌ ná inúú tsí ra̱ꞌkháa Ana̱ꞌlóꞌ ñajúún. Xkuaꞌnii gáꞌne.#5.21 Ríga̱ mbá tikhu i̱yi̱i̱ꞌ griégo̱ rí wayuu ná tsíꞌkha̱ ajngáa ríge̱ꞌ: «Xkuaꞌnii gáꞌne».
Currently Selected:
1 Juáán 5: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
