Mateyo 4

Jesu Wakasunkwa mulukula

(Maako 1.12,13; Luuka 4.1-13)

1Ono Jesu wakatolwa a Muya Usalala kunka mulukula a kusunkwa amubibi 2Nakamana kuliimya kwa malumwi a mashiku ali makuumi one, wakanva nzala. 3Satani wakaza kuli nguwe akumusunka waamba ati, “Naa uli Mwana a Leza ambila mabwe aaya abe chinkwa.”

4Jesu wakanviila ati, “Chililembelwe ati, “Muntu taponi boo a chinkwa cheenka. Pesi ulapona a jwi lyoonse lizwa kuli Leza.”

5Amane dyabooli wakamutola mu munzhi Usalala mu Jelusalema, wamutantika ansonga yachiluli cha tempele. 6Akwaamba kuli nguwe ati, “Naa uli Mwana a Leza, liwaale anshi, nkambo malembe alaamba ati,

Leza ulakulailila bangele bakwe kuli ndiwe,

balakukujata amaanza aabo kwaamba myeendo yako itaumi amabwa.”

7Jesu wakanviila ati, “Chilimbelwe ati, ‘Utasoli Mwami Leza wako.’ ” 8Amane dyabooli wakamutola Jesu ajulu a mulundu ulaamfu akumutondezha malelo a nyika yoonse mu bulemu bwangayo. 9Dyabooli wakaamba ati, “Izhi zhoonse ndakupa, naa unfugamine akunkomba.”

10Jesu wakamunviila ati, “Kozwa awa Satani! Malembe alaamba ati, “Komba Mwami Leza wako akusebenzela nguwe boo eenka!”

11Nakaunka Satani, bangele bakaza alimwi kumugwasha Jesu.

Jesu wakatalika mulimo wakwe mu Galilaya

(Maako 1.14-15; Luuka 4.14,15)

12Ono Jesu nakanva ati Joni waangwa muntolongo, wakazhokela ku Galilaya. 13Taaku nakakkala ku Nazalati, pesi wakaunka mukukkala ku Kapenaumu, wakalinga kufafi a mulonga wa Galilaya kunyinza ya busena bwa Zebuluni a Nafutali. 14kuzuzikizha chakaamba mushishimi Izaya,

15“Nyika ya Zebuloni a nyika ya Nafutali,

nzhila iya ku mulonga unene kwiindilila Jodani,

Galilaya munzhi waba Mashi!

16Bantu bakalinga kukkala mu munshinzhe bakabona mumuni unene,

abo bakkala muchinvule chalufu

mumuni wabamunikila.”

17Kuzwa chiindi icho Jesu wakatalika kukambauka makani akwe ati, “Amusanduka kuzwa ku zhizhibibi zhanu, nkambo Bulelo bwaku julu buli afaafi!”

Jesu wakaita bashichiiya bali bone

(Maako 1.16-20; Luuka 5.1-11)

18Mbuli Jesu mbwakali kweenda kumbali a molonga wa Galilaya, wakabona bamukowa bobilo, Saimoni witwa Peter amukwabo Andulu, kabawaala ntaangala zhaabo mumulonga. 19Jesu wakabaambila ati, “Amunchilile ndamuiisha kuba bazeli ba bantu.” 20Peenka peenka bakashiya ntangala zhaabo akuunka anguwe.

21Kaeenda boo alimwi wakabona bamakwabo bolilo, Jemusi a Joni bana a Zebediya, kabali mubwaato abaishi ba Zebediya, kababamba ntangala zhabo, amane Jesu wakabaita. 22Peenka penka bwaato bwabo bakabushiya boo abaishi akuchilila Jesu.

Jesu wakaiisha, wa kakambauka alimwi akuponya balwazhi

(Luuka 6.17-19)

23Jesu wakaunka mu Galilaya moonse, akuiisha muma Sinagogo, kaambilizha mulumbe mubotu wa bwami, alimwi aku ponya bantu Malwazhi apusene pusene. 24Impuwo ya Jesu yakanviika nyika yoonse ya Siliya, alimwi bantu bakaleta balwazhi bapusene pusene kuli nguwe, ababo bakali kuchite machise, bakalikuchite maankutu, abakali kuwa kashiita abakalikuchite myuuya ibibi, abalikuyuminine mibili boonse wakabashilika akubaponya. 25Ono mabunga aanji akamuchilila kuzwa ku Galilaya, Dekapolisi, Jelusalema, Judiya alimwi a kuzubuka Jodani boonse bakamuchilila.

Currently Selected:

Mateyo 4: STP

Highlight

Copy