Mateyo 2
2
Basongo ba kujwe
1Jesu nakamana kuzhalwa mu chishi cha Betelehemu mu Judiya, mu chiindi cha Mwami Helondi. Kwakazwa basongo ba kujwe bakaza ku Jelusalemu bakabuzha ati, 2“Nguli Mwaana wakazhalwa Mwami wama Juuda? Twaibona nyenyenzhi yakwe kaiza kuzwa kujwe twaza mukumukomba.”
3Abobo Mwami Helodi nakava wakapezhengwa, abantu boonse mu Jelusalemu. 4Ono nakabaita boonse bapaizhi banene aba maii ba milawo wakababuzha ati, “Nkuli nkwayelele kuzhalilwa Mesiya?”
5Bakanviila ati, “Mu Betelehemu mu munzhi wa Judiya,” “Nkambo nchichilembelwe a mushinshimi ati,
6‘Betelehemu munzhi wa Judiya,
tooshi munzhi ushoonto a minzhi ya Judiya isololela,
muli ndiwe mulakuzwa musololi
ushi akaendelezhe bantu bangu ba Izilaili.’ ”
7Ono Helodi wakaita beenzu bakazwa kujwe, ku muswangano wamaseseke kubuzha chiindi nyenyenzhi niyakaboneka. 8Wakabatuma ku Betelehemu amalailile, Kamunka mukalange kabotu mwaana alimwi mwakumujana mukangambile andime nkaunke mukumukomba.
9Nakamana kunva bakaunka, alimwi nyenyenzhi yakaboneka kujwe kumpela kwabo, yakabasololela kushikila abusena akalinga mwaana yakaimikana. 10Nibakaibona nyenyenzhi bakakomana. 11Nibakanjila Mu ng'anda bakabona mwaana kali a Maliya banyina, bakafugama akumupaila. Bamane bakajalula zhipego zhabo zha ngolide, atunukilizho a Malla akumupa.
12Mbuli mbubakabachenjezha muchiloto kwaamba batakajokeli kuli Helodi, bakasebenzhe nzhila imbi kujokela ku chishi chabo.
Mbubakabalikila ku Igipiti
13Nibakaunka, mungele wa Mwami wakaza muchiloto kuli Josefa waamba, “Buka bweza mwanaako abanyina muunke ku Igipiti, “Helodi ulalangaula mwaana ulanda kumujaya. Uunke ukakkale uko kushikila nka kwaambile ati zwako.”
14Josefa wakabuka akubweza mwaana a banyina bakatalika kuunka mashiku ku Igipiti. 15Uko nkwakakkala kushikila Helodi wafa. Alimwi chakazuzizhigwa icho nchakaamba Mwami kwiinda mu mushishimi wakwe ati, “Kuzwa mu Igipiti ndakaita mwanaangu musankwa.”
Baana mbubakajaigwa
16Helodi nakazhiba kwaamba basongo bakujwe bamuchenga, wakakalala maningi, wakapa malailile akujaya bana basankwa boonse mu Betelehemu aminzhi yoonse yakalinga kufafi ichite bana bamyaaka yobilo kuza anshi. Zhoonse zhachitika kwendelana ambubakamwambila ku basongo bakujwe, chiindi nyenyenzi niyakaboneka.
17Munzhila iyi mushishimi Jelemiya nchakaamba chakazuzikizhigwa,
18“Ijwi lyakanvika mu Lama,
Kulila kuchisa kwakanvigwa
Lakelo utekulila bana bakwe.
Wakaka kumbulizhigwa,
nkambo balifile.”
Kujokela kuzwa ku Igipiti
19Ono Helodi nakafa, mungele wa Leza wakaboneka muchiloto kuli Josefa mu Ijipiti kaamba ati, 20“Nyamuka, bweza mwanaako a banyina, kamuzhokela ku Izilaili, nkambo bakalinga kuyanda kumujaya mwaana bakafa. 21Josefa wakanyamuka akubweza Mwaana a banyina, akuzhokela ku Izilaili.
22Pesi nakanva kwaamba Akelausi wakalinga kwendelezha mu Judiya a bwami bwa baishi ba Helodi, wakatija kujokela nakamana kuchenjezhegwa muchiloto, walo amane wakaunka mu chishi cha Galilaya, 23alimwi wakaunka akukkala mu chishi cha Nazaleti. Ichi cha kazuzikizhigwa chakaamba bashinshimiati, “Ulakwiitwa muna Nazaleti.”
Currently Selected:
Mateyo 2: STP
Highlight
Share
Copy
Want to have your highlights saved across all your devices? Sign up or sign in
The Word For The World International
