Mateyo 10

Jesu wakatuma bashichiiya bakwe bali kkumi

(Maako 3.13-19; Luuka 6.12-19)

1Jesu wakaita bashichiiya bakwe bali kkumi abobilo, akubapa ngunzu zhakugusha myuuya ibiibi, akuponya malwazhi a machise oonse. 2Aaya ngumaiina a batumwa bali kkumii abobilo. Saimon, wiitwa ati Petulo, a mukwabo Andulu, Jamusi mwana a Zebediya a mukwabo Joni, 3Filipo a Batilomeyo, Tomasi a Mateyo shimutelo, Jamusi mwana Alfasi, a Tadeyasi, 4Simoni muyandishi, a Juuda Isikalyoti wakaaba Jesu.

Mulimo wabashichiiya bali kkumi

(Maako 6.7-13; Luuka 9.1-6)

5Jesu wakabatuma bali kuumi abobilo, a kubapa malailile ati, “Mutaunki ku bakunze naa kunjila mu muzhi waba Samaliya, 6Pesi amukaunke ku Izilaili ku mbelele zhisowekele. 7Mbuli mbumunka, mukakambauke makani aaya, ‘Bwami bwa ku julu bwasena!’ 8Muponye balwazhi, mubabushe bafile, mubasalazhe balwazhi mankuntu, mugushe myuuya ibibi. Mwatambula chakutabadala, andimwe mukape chakutabadalisha. 9Mutakatolezhi nsiliva, lubulo a ngolide mumakomwi anu, 10mutakanyamuni zhoola zhili zhoonse, naa zhinsani zhobilo, nazhiba nkwabilo naa nkoli, nkambo musebenzhi ulalya mpasebenzela.

11“Mfumbwa munzhi unene naa ushoonto ngushimukanjile mukalangaule muntu ushi a kamutambule, mukakkala anguwe mu ng'anda yakwe mpaka mukazweko. 12Mwakunjila mu ng'anda, mwaambe ati, “Lumuno lube andimwe.” 13Naa mu ng'anda mumwanjila ba mutambula, kwanzha kwanu kwalumuno kukkalilile ambabo. Pesi naa bakakake kumutambula lumuuno lwanu lujokele kuli ndimwe. 14Alimwi naa kwabula muntu naba omwi utambula naa kunva ku majwi anu, mukazwe mu nganda yakwe naa mu munzhi. mukapampe lusuko kumyeendo yanu. 15Kashimpe ndamwabila, Mwami Leza ulakutondezha luse ku bantu bamu Sodoma a Gomola kwiinda bantu ba mu munzhi ulya!

Mapenzhi Atekuza

(Maako 13.9-13; Luuka 21.12-17)

16“Ono amunve! Ndamutuma mbuli mbelele a kati kabaumpe. Pesi amunchenjele mbuli nzoka alimwi mulibombye mbuli nkwilimba. 17Amuchenjele, balakumwaaba kubashinkuta alimwi a kumukwipa mu ma sinagogo. 18Alimwi nkambo kangu, mulakutolwa kubendelezhi a ku bamami, mbuli kamboni kuli mbabo alimwi a bamashi, 19Pesi baakumwanga mutakapengi a chimuya kwaamba naa mbweshi mukaambe, nkambo kuchiindi icho muno kupelwe chakwaamba, 20Nkambo tamushi mushimukano kwaamba, pesi Muuya wa ishi wanu ngushi ukaambe kwiinda muli ndimwe.

21“Mukwabo ulakwaaba mukwabo kwaamba ajaigwe, awalo ishi ulakuchita bweenka kumwaana akwe, alimwi bana balakuzangila bazhali babo kwaamba bajaigwe. 22Ono bantu boonse balakumusulaika nkambo kandime, pesi oonse uyo ujatisha a kubikilila kushikila kumamanino ulakufutulwa. 23Naa bakamupenzha mu munzhi omwi, mukabalikile mu munzhi umbi. Kashimpe ndamwambila, tamukamanizhi kweenda minzhi yoonse ya Izilaili Mwana a Muntu katana kuza.

24“Taaku mwana a chikolo wiinda muii wakwe, naa musebenzhi wiinda shimalelo akwe. 25Ono bana a chikolo balyelele kuba mbuli muii wabo, a walo musebenzhi mbuli shimalelo akwe. Naa mwendelezhi wa ng'anda ulaitwa ati, Belezebule, Ina ba ng'anda yakwe balakwitwa mazhina aiinda kubija buti!

Nguni welele kuloondwa

(Luuka 12.2-7)

26“Ono mutaloondi bantu, nkambo taaku chivumbilwe cheshi chikabule kuvumbulwa naa chisisilwe cheshi chikabule kuzhibwa. 27Mfumbwa nchindamwaambila mashiku mukachaamba malumwi, alimwi mfumbwa chimwakanva mukutepeta mumatwi, muachaambe atalala a zhiluli. 28Mutaloondi bantu bajaya mubili pesi batachikonzhi kujaya Moyo, anu a muloonde Uyo ujaya zhoonse mubili a Moyo a kuwala mu Gehena. 29Saa kangwee komwi inga takuli tuyuni tobilo? Pesi taaku nakaba komwi kaloka anshi kwakubula Leza kuzhiba. 30Alimwi misusu ya mumutwi wanu uli ibelengele. 31Ono mutaloondi nkambo, mulayandika kwinda tuyuni tuunji!

Kulyambilila akukaka Kilistu

(Luuka 12.8-9)

32“Abo bonse balyambilila nchatangalala ati balazulilwa kulindime, ndakuchita bweenka kuli Taata waku julu. 33Pesi uyo oonse unkaka chantangalala, andime ndakumukaka kuli Taata waku julu.

Kutashi lumuno, pesi panga

(Luuka 12.51-53; 14.26,27)

34Mutayeye kwaamba ndaleta lumuno munyika, nshina kuleta lumuno, pesi panga. 35Ndaza mukulwanya mwaana musankwa a baishi, mwaana mukaintu a banyina, mwana mukaintu a bapongoshi bakwe. 36Bashinkondonyina a muntu balakuba banganda yakwe.

37“Mfumbwa uyandisha baishi naa bayina taele kuba muchilili wangu. Mfumbwa uyandishisha mwana akwe musankwa naa mukaintu taele kuba muchilili wangu. 38Mfumbwa utabwezi chingano changu telele kuba muchilile wangu. 39Mfumbwa ulangaula bumi bwakwe, ulakubusowekelwa, pesi oonse uyo usowekelwa bumii bwakwe nkambo kandime ulakubujana. 40Mfumbwa uyo umutambula, watambula ndime alimwi oonse uyo utambula ndime watambula uyo wakantuma.

Bulumbu

(Maako 9.41)

41Alimwi uyo oonse utambula mushishimi nkambo kwaamba ati ngu mushishimi ulakutambula bulumbu bwa chishishimi alimwi uyo oonse utambula muntu Usalala nkambo ati ulasalala ulakutambula bulumbu bwa muntu Usalala. 42Alimwi uli oonse upa lufulu lwa maanzhi kuli baba bashoonto ba bashichiiya, kashimpe ndamwaambila, muntu uyo ulakutambula bulumbu bwakwe.

Currently Selected:

Mateyo 10: STP

Highlight

Copy