रोम 7
7
बापला रेयाक् ना़मुना
1से बापे बाडाया, ए बोयहाको (एनते आ़न बाक्डाय होड़ तुलुच् इञ गालमारावेत्काना), जिवेत् ताहेन भोरगे आ़न दो होड़ चेतानरेये मा़लिकोक्काना? 2चेदाक्जे जाँवाँयेन मायजिउ दो जिवेत् मेनाय जाँवाँयरे आ़नतेये तोलआकाना, मेनखान जाँवाँयतेत्ए गोच्लेन खान जाँवाँयतेत् रेयाक् आ़न खोन दोए खालासगेया। 3आदो जाँवाँयतेत् जिवेत्ए ताहेंन तुलुच् एटाक् हेरेलरेने होयलेन खान लाटघा़टि होड़े बिका़उक्आ, मेनखान जाँवाँयतेत्ए गोच्लेन खान, ओना आ़न खोन दोए सा़धिनगेया आर एटागिच् ठेने जाँवाँयलेनरे हों लाटघा़टि होड़ दो बाय होयोक्आ।
4ओनाते ए इञरेन बोयहा मिसराको, आपे हों आ़न सेच्ते दोपे गोच्एना मा़सियाक् होड़मोते, जेमोन एटागिच्रेनपे होयोक् मेताक्मे, गोच्को खोन बेरेत् ओचोयेनिच्रेनगे, जेमोन इसोर ला़गित् जो बोन जोक्। 5चेदाक्जे जेलरेबोन ताहेंकानरे दो आ़न होतेतेयाक् बा़ड़िच् सानाको आबोवाक् होड़मो हा़टिञकोरे का़मिकान ताहेंकाना, मोरोन ला़गित्बोन जोक्आ मेनते। 6मेनखान नितोक् आबो दो ओना आ़न खोनबोन खालासआकाना, तोललेनाक् सेच्तेबो गोच्एनते, ओनाते जिउ रेयाक् नावाँ जियोनरे गोलामबोन खाटावक्काना आर ओलाक् मारेयाक् आ़न रेयाक् गोबोलरे दो बा़नुक् बोना।
आ़न आर का़इ
7चेत् एनडेखानबोन मेना? आ़न दो का़इ काना? ओहोवा, मेनखान का़इतेत् दो बा़ञ बाडायलाक्आ आ़न बेगोर दो एनते लालोच हों ओहो चोञ बाडायले आ़न आलोय मेनलेखान, “आलोम लालोचा” मेनते। 8मेनखान का़इ दो दावे ञामकेत्ते, हुकुम होतेते सानाम लेकानाक् लालोच इञरेये होय ओचोकेदा, एनते आ़न बेगोरते का़इ दो गोच्गेया। 9आर इञ दो मित् ओकते आ़न बेगोरते जिवेत् इञ ताहेंकाना, मेनखान हुकुम हेच्एन खान का़इ दो जिवेत् रुवा़ड़ेना। 10आर इञ दोञ गोच्एना; आर जियोन ला़गित् ताहेंकान हुकुम, ओना दो मोरोन ला़गित् ञामेनतिञा। 11चेदाक्जे का़इ दो दावे ञामकेत्ते हुकुम होतेतेये बुला़उकेदिञा आर ओना होतेतेये गोच्केदिञा। 12नोनकाते आ़न दो सोनोत आर हुकुम दो सोनोत, ठिक, आर भागेगेया।
13एनडेखान ओना भागेयाक् दो मोरोन रेयाक् होयेनतिञा? ओहोवा, मेनखान का़इतेत् दो का़इ काना मेनते ओरोमोक् ला़गित् ओना भागेयाक् होतेते इञ ला़गित् मोरोने होय ओचोकेदा जेमोन हुकुम होतेते का़इ दो आसामभेड़ का़यानाक् होयोक्।
ओनतोर रेयाङ ला़ड़हा़इ
14एनतेबोन बाडाया, आ़न दो जिउतेयाक् काना मेनते; मेनखान इञ दो जेलरेन का़ना़ञ, का़इ गोबोलरे आ़खरिञआकान। 15चेदाक्जे ओकाटाक् इञ का़मियेत्काना, ओना दो बा़ञ बाडाया; एनते इञिञ मेनजोङकानाक् दो बा़ञ का़मियेदा, बिचकोम इञ कुरुदाक् कानाक्गेञ का़मियेदा। 16मेनखान ओका इञ बा़ञ मेनजोङकान, ओनागेञ का़मियेत् खान, आ़न दो भागेगेया मेनतेञ हेंयाक् काना। 17मेनखान नितोक् आर दो इञ दोञ बाङ काना ओना का़क्मियिच् दो, मेनखान इञरे बेरेलाकान का़इगे। 18एनतेञ बाडाया इञरे, मेताक्मे, इञाक् जेलरे भागेयाक् दो बाङ बेरेलाकाना एनते मेनजोङमा इञरे मेनाक्गे मेनखान भागेयाक् का़मि थो बाङ। 19चेदाक्जे इञिञ मेनजोङकान भागेयाक् दो बा़ञ का़क्मिकाना, मेनखान बा़ञ मेनजोङकान बा़ड़िच्आक्गेञ का़मियेदा। 20मेनखान ओका इञ बा़ञ मेनजोङकान ओनागेञ का़मियेत् खान, इञ दोञ बाङ काना का़क्मियिच् दो, मेनखान इञरे बेरेलाकान का़इगे।
21एनडेखान नोवा नियोम इञ ञामेदा इञ ला़गित् बाङमा इञ ओकोय भागेयाक् का़क्मिञ मेनजोङकान, बा़ड़िच्आक् दो इञरे मेनाक्गेया। 22एनते भितरि होड़ सेच्ते दो इसोराक् आ़नगेञ कुसियाक्काना। 23मेनखान इञाक् होड़मो हा़टिञकोरे दो मित्टेच् जुदा़ आ़न इञ ञेलेदा, ओने ओना इञाक् मोन रेयाक् आ़न तुलुच् ला़ड़हा़इकान, आरे का़इदा़उएदिञकान इञाक् होड़मो हा़टिञकोरे मेनाक् का़इ रेयाक् आ़न गोबोलरे। 24हाय इञ दुखा़लिया़ होड़ दो! नोवा मोरोन रेयाक् होड़मो खोन दो ओकोये रुखिया़ञा? 25इसोरे सारहावक्मा आबोरेन प्रोभु जिसु मा़सि होतेते बाञचावकेत्बोन। आदो एनडेखान इञ आपनार दो मोनेते इसोराक् आ़न ठेन गोलाम इञ खाटावक् काना, मेनखान जेलते दो का़इ रेयाक् आ़न ठेनगे।
Currently Selected:
रोम 7: NTSPt25
Highlight
Share
Copy
Want to have your highlights saved across all your devices? Sign up or sign in
The New Testament Books in Santhali Language © The Word for the World International and Santhali Translation Project, Nepal, 2025
