माथाय 3
3
बा़प्तिसमा एमोक्इच् जोहानाक् पोरचार
(मा़रकुस १:१-८; लुक ३:१-१८; जोहान १:१९-२८)
1ओनाको दिनरे बा़प्तिसमा एमोक्इच् जोहान दो जिहुदा़ रेयाक् हाहाङकार जायगातेये हेच् एना, आर नोनका मेनकाते पोरचारे एहोप् एना, 2उनिये मेनकेदा “आपेयाक् का़इको खोन कासतावक्पे, एनते सेरमा राज दो सोर आकाना।”#माथ ४:१७ 3नुय दो एनते उनि कानगेयाय ओने उनि रेयाङ जेसाया ना़बि होतेते रोड़लेन एनकाथाय,#जेसा ४०:३
“हाहाङकाररे मित्टेन होक्होकानिच् रेयाक् आड़ाङ,
प्रोभुवाक् होर तेयारकातायपे,
उनियाक् सुड़ुँच् होरको सोजहेकातायपे।”
4उनि जोहान दो उँट उप् रेयाक् आङगरोप आर डांडारे दो हारता रेयाक् पाठेक्आक् ताहेंकानताया आर उनियाक् जोमाक् दो पोहोको आर बिर दुमुर रासा ताहेंकाना।#२ रा १:८ 5खान जेरुसालेम आर गोटा जिहुदा़ आर जोरदान बेड़हाय तेयाक् टोठारेन होड़को उनि ठेनको ओडोक चालावेना, 6आर आकोवाक् का़इ आङगोचकाते जोरदान गाडारे उनि तितेको बा़प्तिस ओचोक् कान ताहेंकाना।
7मेनखान फा़रिसिको आर सा़दुकिको मोदरेन आ़डि होड़ बा़प्तिसमाक् ला़गित् आच् ठेन हिजुक्काने ञेलकेत्को खाने मेतात्कोवा, “एया बिञरेन होपोनको ओकोय चेतावकेत्पेया दाराकान एदरे खोन ञिरजोङ दो?#माथ १२:३४; १६:१,११,१२; २३:१३-३६; आ का़ २३:६,७ 8नोनका का़मिते सोदोरपे जेमोन सा़रियाक्गे का़इ खोन मोन आ़चुर आकान तापेया,#आ का़ १७:३०; २६:२०; एफे ५:८-९ 9आर आलोपे हुदिसा मोनेरे नोवा मेनजोङ दो, आबराहामगे बाबा मेनायतालेया मेनते, एनतेञ मेतापेकाना, इसोर दो नोवा धिरिको खोन आबराहाम ला़गित् होपोने तेङगो दाड़ेयाकोवा।#जोहा ८:३३ 10आर टेङगोच् दो नित हों दारे बुटा़रे दोहो आकाना, ओना इया़ते भागे बाङ जोक् मित्के मित् दारे दो माक् भिनदा़ड़ोक्आ आर सेङगेलरे खादलेक्आ।#माथ ७:१९; लु ३:९ 11इञमा दाक्तेञ बा़प्तिसेत्पे मोन आ़चुर रेयाक्, मेनखान इञ तायोमते दाराकानिच् दो इञ खोने दाड़ेयाना। ओने उनियाक् खारपा तेक्वेञ लेक होंञ बाङकान; उनिगे सोनोत जिउ आर सेङगेलतेये बा़प्तिसपेया। 12उनियाक् हाटाक् दो तिरे मेनाक्ताया, आर खा़रा़ये साफा उता़रताया, आर गुहुम दो मुरा़इरेये आ़गु जारवायताया, मेनखान भुसा़ दो बाङ इड़िंजोक् सेङगेलतेये आतार गिडिया।”#का़ह ५:१४,२३
जिसुवाक् बा़प्तिसमा
(मा़रकुस १:९-११; लुक ३:२१-२२)
13खान जिसु दो गा़लिल टोठा खोन जोरदान गाडाते जोहान ठेने हेच् एना, उनि तिते बा़प्तिस ओचोक् ला़गित्, 14मेनखान जोहान दोए माना मानाकादेया, मेनकेदाय, “इञगे चोङ आम तिते बा़प्तिसोक् जा़रुड़तिञ, आर आम दो इञ ठेनेम हिजुक् काना?”
15जिसु दोए रोड़ रुवा़ड़ादेया, “नितोक् दो नोनकागे होय ओचोवाम बाड़े, एनते नोनकागे सानाम भागे का़मि लेक पुक्रा़उ जा़रुड़ काना,” आदो जोहाने रा़जियेना।
16आदो जिसुइ बा़प्तिसेनते दाक् खोने राकाप् गोत्एन खान, ञेलपे सेरमा दो झिच् एना, आर इसोररेन जिउ दो मित्टेन पोताम लेका आच्रे फेड हिजुक्काने ञेल केदेया। 17आर ञेलपे सेरमा खोन मित्टेच् आड़ाङ आँजोमेना, “नुयगे इञरेन दुला़ड़िया़ होपोन दो, ओने उनिरेञ कुसि आकान।”#जेने २२:२; सेरे २:७; जेसा ४२:१; माथ १२:१८; १७:५; मा़र १:११; लु ९:३५
The New Testament Books in Santhali Language © The Word for the World International and Santhali Translation Project, Nepal, 2026