आ का़ 19
19
पावल एफेसुसरे
1आर नोनका होयेना, आपोलोस कोरिन्थिरेये ताहेंकानरे, पावल दो चेतान टोठाको तालाते दाँड़ाँ इदिकाते एफेसुसतेये हेच्एना, आर तिन उडि चेलाको चोय ञामकेत्कोवा 2आरे मेतात्कोवा, “पा़तिया़वेनरे सोनोत जिउपे ञामकेदा?”
आदोको मेतादेया, “सोनोत जिउ मेनाया से बाङा ओना दो आँजोम हों बाले आँजोमाकात्आ।” 3खानगेये मेनकेदा, “एनडेखान ओकाटाक्तेपे बा़प्तिसएना?” मेनकेदाको “जोहान रेयाक् बा़प्तिसमाते।”
4आदो पावले मेनकेदा, “जोहानाक् बा़प्तिसमा दो का़इ खोन आ़चुर रेयाक् ताहेंकाना। उनि दो इसराएलकोय मेतात्कोवा, जिसु ओकोय दो इञ तायोमतेये हिजुक्कान उनिरे पा़तिया़उक्पे।” 5आर ओनाको आँजोमकेत् खान, प्रोभु जिसु मा़सि ञुतुमतेको बा़प्तिस ओचोयेना। 6आर पावल ओनकोय चापोकेत्को खान सोनोत जिउ दो ओनकोरेये हेच्एना, आर एटाक् पा़रसिकोतेको रोड़केदा आरको ना़बिकेदा। 7आर ओनको दो जोतोते गेलबार गान हेरेल होपोनको ताहेंकाना।
8आर उनि दो सुना़गोगरे बोलोकाते पे चाँदो दिन हा़बिच् सोहोसातेये रोड़ेत् ताहेंकाना आर इसोराक् राज रेयाक् ला़इ बुजहा़वाको आरे रा़मजा़वेत्को कान ताहेंकाना। 9मेनखान आदोमको दोको केटेच् इदियेन आर बाको पा़तिया़उलेनते, खान गादेल होड़को सामाङरे ओना होर बा़ड़िच्को मेतात्ते, ओनको खोन साहाड़ेनते चेलाकोय बेगारकेत्कोवा, आर दिना़म हिलोक् तुरानुस रेयाक् इसकुलरेये ला़इ बुजहा़वाको कान ताहेंकाना। 10आर ओनका दो बार सेरमा हा़बिच् होय इदियेना, ओनाते आ़सिया़रे ताहेंकान सानामको प्रोभुवाक् काथाको आँजोमकेदा, जिहुदिको हों आर जुना़निको हों।
इसकेवा रेन होपोनको
11आर दाड़े का़मिको, बाङ होय बाड़ाक्आक्कोगे इसोर दो पावल तितेये का़मियेत् ताहेंकाना। 12नुना़क् हा़बिच् जे रुगिको ठेन उनियाक् होड़मो खोन गामछाको आर उरमा़ल किचरिच्कोको इदियेत् ताहेंकाना, आर रोगको खोनको बोगेक्कान ताहेंकाना आर बा़ड़िच् जिउकोको ओडोक चालाक्कान ताहेंकाना।
13मेनखान आदोम आदोम देसपोडा हुक्सित झाजाड़ जिहुदिको हों बा़ड़िच् जिउको ताहेंकानताको होड़कोरे प्रोभु जिसुवाक् ञुतुम ञुम लेगाकेत्तेको मेनकेदा, “पावले पोरचारेदेकान जिसु ञुतुमतेञ हुकुमाम काना।” 14आर इसकेवा, मित्टेन जिहुदि माराङ नायकेरेन एयाय गोटेच् होपोनको ताहेंकाना। ओकोयको ओनकायेत् ताहेंकान। 15खान उनि बा़ड़िच् जिउ दो रोड़ रुवा़ड़ात्कोतेये मेतात्कोवा, “जिसुञ बाडायेदेया आर पावल होंञ ओरोमएदेया, मेनखान आपे दोपे ओकोयकाना?” 16खानगे उनि होड़ ओकोयरे बा़ड़िच् जिवे ताहेंकान, उनि दो ओनकोरे दोन लादेयेनते जोतोगेये आ़धिनकेत्कोवा, आर ओनकोय भिनदा़ड़केत्कोवा, ओनाते ओनको दो ओड़ेच् किचरिच् सालाक् आर घा़लकाते ओना ओड़ाक् खोनको ञिर ओडोकेना।
17आर ओना दो एफेसुसरे ताहेंकान सानामको ठेन बाडायेना, जिहुदिको ठेन हों आर जुना़निको ठेन हों आर ओनको सानामकोरे बोतोर पाड़ावेना, आर प्रोभु जिसुवाक् ञुतुम दो माराङेना 18आर पा़तिया़वाकानको मोदरेन ढेर होड़ हेच्काते आको आकोवाक् ओनकान का़मिकोको आङगोच आरको ला़इ सोदोरकेत्ताकोवा। 19आर ढेर होड़ ओकोयको गुनि बाड़ायेत् ताहेंकान आकोवाक् पुथिको आ़गु जारवाकाते सानाम होड़को सामाङरेको जेरेत् गिडिकेदा, आर ओनाको रेयाक् दामको हिसा़बकेत् खान, मोंडे़ंगेल हाजार चा़नि टाका होयेना। 20ओने ओनका लेका दाड़ेते प्रोभुवाक् काथा दो पासनाव आर नामडाक इदियेना,
एफेसुस रे गुलमाल
21आदो ओनाको होय बाड़ायेन तायोम पावल दो जिउरेये निटआना माकेदोनिया़ आर आखाया दाँड़ाँ पारोमकाते जेरुसालेमते चालाक् ला़गित् आरे मेनकेदा, “ओंडेञ सेनलेन तायोम दो रोम हों ञेञेलगे होयोक् तिञा।” 22आर का़मि सोहोत्आय कानको मोदरेन बार होड़ तिमोथि आर एरासतुस, माकेदोनिया़ते कोलकेत्किनते आच् दो थोड़ा दिन आ़सिया़रेगेये ताहेंञोंक् एना।
23मेनखान ओना जोखेच् होरतेत् रेयाङ आ़डि गुलमाल होयलेना। 24एनते देमेतिरयोस ञुतुमान मित् होड़ सोनहारगे, ओकोय आरतेमिस रेयाक् रुपा़ कोयजोङ ओड़ाक्कोय बेनावेत् ताहेंकान, उनि दो का़रिगोलको आ़डिये रोजगार ओचोयेत्को कान ताहेंकाना। 25उनि दो ओनको आर ओना लेकानाक् का़क्मिको जोमकाव जारवाकेत्कोतेये मेनकेदा, “ए हो बाडायगेयापे आबो दो नोवा का़मितेगेबोन लाबेत्काना मेनते। 26आर ञेल आरपे आँजोमेदा एकेन एफेसुसरे दो बाङ, मेनखान गोटा आ़सिया़रे लेकागे नुय पावल दो रा़मजा़उकाते आयमा होड़े भानटाव आकात्कोवा, ओनेये मेनेत्ते बाङमा तिते बेनावको दो इसोरको बाङ काना। 27आर नोवा बेपार दुसा़उक् ताबोना, एकेन नोवा रेयाक् बोतोर दो बाङ काना, बिचकोम माराङ देब आरतेमिस रेयाक् कोयजोङ ओड़ाक् हों चेत् हों बाङ लेखाक्आ आर उनियाक् माराङ साबासि दो ञुरहा़क्आ, ओने उनि गोटा आ़सिया़रेन आर धा़रतिरेनकोको सेवावायकान।”
28आदो ओना आँजोमकेत्ते एदरेतेको पेरेच्एन खान आँदोड़ातेको होहोकेदा, “माराङगेयाय एफेसिकोरेन आरतेमिस दो।” 29आर नागराहा दो आ़उला़उ चाबायेना,आर मित् रिया़उते आखड़ावातेको गादगादाव बोलोयेना आर पावल साँवते दाँड़ाँकिन माकेदोनिया़रेन गा़युस आर आ़रिसतारखुसको झुटिया़उ इदि तोराकेत् किना। 30आर पावल दो ठा़उरा़ होड़को ठेन बोलोक्ए मेनवान खान, चेलाको दो बाको सेन ओचोवादेया। 31आर आ़सिया़रेन मुखिया़को मोदरेन हों आदोमको दो उनिरेन गातेको ताहेंकानते, उनिठेन काथाको कोलकेत्तेको नेहोंरादेया, जेमोन आखड़ाते आलोय सेन आलायोक्। 32आर आदोमको दो मित् लेका आर आदोमको दो एटाक् लेकाको होहोयेत् ताहेंकाना; एनते जारवावाकान होड़ दोको आ़उला़उ सा़तआकान ताहेंकाना, आर जोतो लेकागे बाको बाडायकान ताहेंकाना चेत् ला़गित् चोङको जारवावाकान। 33आदो गादेल होड़को मोदरेन आदोमको दो आलेकसानदेरको सिखा़उकेदेया, जिहुदिको उनिको ढाका लाहाकेदेते। आर आलेकसानदेर दो तिते इसा़राकेत्ते जारवा होड़को ठेन रोड़ दोगोक्ए मेनजोङकान ताहेंकाना। 34मेनखान जिहुदि होड़ कानाय मेनतेको बाडाय ओरोमकेदे खान सानामको मित् आड़ाङते बार घोन्टा गानको होहोकेदा, “माराङगेयाय एफेसिकोरेन आरतेमिस दो।”
35आदो नागराहारेन हा़किम गादेल होड़कोय थिर ओचोकेत्को खाने मेनकेदा, “ए एफेसिको, ओकोय हाले बाय बाडाय काना, जे एफेसुस नागराहारेनको दो माराङ आरतेमिसाक् कोयजोङ ओड़ाक् आर जुपितेर, सेरमा खोन ञुरहा़वाक् मुठा़न होरहोको कानाको मेनते? 36ओनाको रोड़ एसेदोक्आक् दो बाङकानते, आपे दो थिरकोक् लेकतापेया, आर जाहानाक् हुरमुट दो आलोपे का़मिया। 37एनते नुकिन होड़ नोंडेपे आ़गुवाकात्किना ओकोय कोयजोङ ओड़ाक् लुलुटकिन होंकिन बाङकान आर आबोरेन देब हेनोसताकिन होंकिन बाङकान। 38आदो देमेतिरयोस आर उनि साँवतेन का़रिगोलको जाहाँय उपा़रते जाहान काथा मेनाक्ताको खान, एनडेखान का़चा़हा़रि खुला़गेया; आर हा़किमको हों मेनाक्कोगेया; ला़लिस मा। 39मेनखान जाहान एटाक् काथा रेयाक् पे खोजकान खान एनडेखान ओना दो आ़न बाँधावक् बा़इसिरे छिन्डा़उक्आ। 40एनते तेहेञ रेयाक् हुलमाल बाबोतरे ला़लिसाबो रेयाक् बोतोर मेनाक्आ, ओना रेयाक् चेत् कारोन हों बा़नुक्ते, आर नोवाबो ञिर जारवावाकान रेयाक् जोबाबदिहि बाबोन एम दाड़ेयाक्ते।” 41आदो नोनकाए रोड़केत् खान जारवावाकान होड़कोय बिदा़कात्कोवा।
Currently Selected:
आ का़ 19: NTSPt25
Highlight
Share
Copy
Want to have your highlights saved across all your devices? Sign up or sign in
The New Testament Books in Santhali Language © The Word for the World International and Santhali Translation Project, Nepal, 2025
