आ का़ 18
18
कोरिन्थिरे पावल
1ओनाको तायोम उनि दो आथेन्स खोन ओडोक चालावेनते कोरिन्थि रेये सेटेरेना। 2आर आ़कविला़ ञुतुमान मित्टेन जिहुदिये ञामकेदेया, जानामते पोनतुसरेन होड़गे, ओने उनि सोर दिनगे आच् ओड़ाक् होड़ प्रिसकिला़ साँवते इटा़लिया़ खोने हेच् आकान ताहेंकान, एनते कलोउडियोसे हुकुमाकात् ताहेंकाना, सानाम जिहुदिको रोम खोनको ओडोक चालाक्आ मेनते। 3आर उनकिन ठेने चालावेना, आर मित् लेकानाक्गे का़मि ताहेंकानताकोते उनकिन ठेने ताहेंयेना, आरको का़मिकान ताहेंकाना, एनते ता़म्बु बेक्नावकोको ताहेंकाना। 4आर जिरा़उक् माँहाँ पिछे सुना़गोगरे होड़को तुलुच्ए गालमारावाकोकान ताहेंकाना, आर जिहुदि आर जुना़निकोय बुजहा़उ ओरोम ओचोयेत्को कान ताहेंकाना।
5मेनखान सिला़स आर तिमोथि माकेदोनिया़ खोनकिन फेड हेच्एन खान, पावल दो इसोराक् काथातेये उदगा़उ ओचोयेनते, जिसुगे मा़सिकानाय मेनते जिहुदिकोय गोहावात्कोवा। 6आर ओनको दो तेङगो दाराम आरको हेनोसतावादे खान, आयाक् किचरिच् कोटाकेत्तेये मेतात्कोवा, आपेयाक् माँयाँम दो आपेयाक् बोहोक्रेगे पाड़ावक् मा, इञ दोञ मिरिदोसगेया, आर नित खोन जिहुदि बाहरेरेन जा़तरेनको ठेनिञ चालाक्आ। 7आदो ओंडे खोन फेड सेनेनते तितुस जुसतुस ञुतुमान मित् होड़ाक् ओड़ाक्तेये बोलोयेना मित्टेन इसोर सेक्वा होड़गे, ओने उनियाक् ओड़ाक् दो सुना़गोगरे भिड़ा़वाकान ताहेंकान। 8आर सुना़गोगरेन मुखिया़ क्रिसपुस दो आच् घारोंजरेनको सानामको सेलेत् प्रोभुरेये पा़तिया़वेना, आर कोरिन्थिको मोदरेन ढेर होड़ आँजोमकातेको पा़तिया़वेना, आरको बा़प्तिसएना। 9आर प्रोभु दो ञिंदा़ मित्टेच् दोरसोनते पावले मेतादेया, आलोम बोतोरोक्आ मेनखान रोड़मे, आर आलोम हापेक्आ। 10एनते इञगे आम साँवते मिना़ञा, एनते आम हा़नमे ला़गित् दो ओकोय हों दिल बाको एमा, एनते नोवा नागराहारे आ़डि उता़र होड़ मेनाक्कोतिञा। 11आदो मित् सेरमा तुरुइ चाँदो ओंडे ओनको तालारे इसोराक् काथा चेत्आकोकाने ताहेंयेना।
12मेनखान गा़लियो दो आखायारेन चाक्लावित्ए ताहेंकान जोखेच्, जिहुदिको दो मित् जोमकावते पावल उपा़रतेको तेङगोयेना, आर बिक्चा़र दुड़ुप्आक् सामाङगरे इदिकेदेतेको मेनकेदा। 13नुय होड़ दो आ़न रेयाक् धारा खोन उलटा़ इसोर सेवावाय ला़गित् होड़कोय आ़न्डिच्एत्कोवा। 14खान पावले रोरोड़ ला़गिदोक् कान ताहेंकानरे गा़लियो दो जिहुदिकोय मेतात्कोवा, ए जिहुदिको, नोवा दो जाहान बेहोकाक् से दुसटा़मियाक् बा़ड़िच् ताहेन खान, जा़रुड़गेञ आँजोमकेतापेया होनाङ। 15मेनखान काथा रेयाक् आर ञुतुमको आर आपेयाक् आ़न रेयाक् रेटेपेटे कान खान एनडे खान आपेतेगे ञेलजोङपे ओनकानाक्को रेयाङ बिक्चा़रिच् होयोक् ला़गित्, इञ दो मोन बा़नुक्तिञा 16आदो बिक्चा़र दुड़ुप्आक् ठेन खोने लागा ञिरकेत्कोवा। 17खानगे ओनको सानामको दो सुना़गोगरेन मुखिया़ सोसथेनेस साप्काते बिक्चा़र दुड़ुप्आक् सामाङरेको दालकेदेया। आर गा़लियो दो ओनाको चेत् हों बाय मेंत् लुतुरादा।
पावल आनटिओखिया़तेये रुवा़ड़ोक्
18आर पावल दो आरहों ढेरञोक् दिन ओंडे ताहेंकाते बोयहाको ठेन खोन बिदा़येनते जाहाजते सुरिया़तेये चालावेना, आर उनि साँवते प्रिसकिला़ आर आ़कविला़ हों, आर केनखिरया़रेये मुंडरा़येना, एनतेये मानानआकावान ताहेंकाना।#नुमेरि ६:१८ 19आदो एफेसुसरेको सेटेरेन खान आर उनकिन दो ओंडेये बा़गि ओटोवात्किना, मेनखान आच् दो सुना़गोगरे बोलोयेनते जिहुदिको तुलुच्ए आपठा आ़पठियेना। 20आर बा़ड़ति दिने ताहेना मेनतेको नेहोंरेन खान बाय रेबेनलेना। 21बिचकोम ओनको ठेन खोन बिदा़येनतेये मेनकेदा, इसोरे मेनले खान आपे ठेनिञ रुवा़ड़ हिजुक्आ, आदो जाहाजते एफेसुस खोने चालावेना। 22आर का़इसा़रिया़रेये फेडएन खान जेरुसालेमते राकाप् सेनकाते का़लिसिया़रेनकोय जोहारात्कोते आनटिओखिया़तेये चालावेना। 23आर तिना़क् दिन चोङ ताहेंकाते ओंडे खोने ओडोक चालावेना, आदो मित् मोहंडा गालातिया़ टोठा आर फ्रुगिया़ तालातेये सेन इदियेना, आर सानाम चेलाकोय दिड़हो इदिकेत्कोवा।
आपोलोस एफेसुस आर कोरिन्थि
24आर आपोलोस ञुतुमान मित्टेन जिहुदि होड़ जानामते दो आलेकसान्डेरिया़ रेन, रोरोड़रे मित्टेन गा़खुड़ होड़ एफेसुसरेये सेटेरेना। उनि दो सोसतोरको बेस बाडाय होड़े ताहेंकाना। 25उनि दो प्रोभु रेयाक् होर रेयाङे ला़इ चेत् आकोकान ताहेंकाना, आर जिउरेये हेडेजोक्कान ताहेंकानते जिसु रेयाक्को ठिक ठिके गालमाराव आर चेत् आकोकान ताहेंकाना। मेनखान एकेन जोहान रेयाक् बा़प्तिसगेये बाडाय आकात् ताहेंकाना। 26आर उनि दो सुना़गोगरे सोहोसाते रोरोड़े एहोप् एना। आदो प्रिसकिला़ आर आ़कविला़ उनिकिन आँजोमकेदे खान, आ़किन ठेनकिन इदिकेदेया, आर इसोराक् होर रेयाक् आरतेत् ठिक ठिक किन ला़इ बुजहा़वादेया। 27आर आखायाते पारोम चालाक्ए मेनवान खान, बिसवा़सिको दो उनिको उसकुर केदेया, आर चेलाकोको ओलात्कोवा जेमोनको आताङ दारामे, उनि दो ओंडे सेटेरेनते दायाते पा़तिया़वाकानको आ़डिये गोड़ोंवात्कोवा। 28एनते उनि दो सोदोरते होड़ सामाङरे जिहुदि होड़को दो जिदा़जिदे भागावकेत्कोवा, जिसुगे मा़सिकानाय मेनते सोसतोरको खोन सोदोरतेये सा़बुतात्कोवा।
Currently Selected:
आ का़ 18: NTSPt25
Highlight
Share
Copy
Want to have your highlights saved across all your devices? Sign up or sign in
The New Testament Books in Santhali Language © The Word for the World International and Santhali Translation Project, Nepal, 2025
