Aba Loma 8
8
Ubumi bwa mwa Mbepo
1Pololi ipano, ataliko nayumo yo angabasusya bo bakwikala mwa Kilisitu Yesu. 2Pakuti indaghilo sya Mbepo mwa Kilisitu Yesu, sisatwile ku ndaghilo sya mbibi na kubufwe bubu. 3Pakuti cho indaghilo yikapotwa pakubomba, chifukwa cha kuyeta kwa mubili, u Chala akabomba pakutuma umwana wake mwene mukabilo ka mubili wa mbibi, sona chifukwa cha mbibi, akatisyamo imbibi mu mubili. 4U Chala akabomba isi ukuti ubugholoke bwa indaghilo bukwanisiwe mu mwitu, twe tutakwendela isya mu mubili, loli isya mwa Mbepo.
5Pakuti Abandu bo bakwikala ukuyana nubundu, bakubika inyinong’ono syabo pa finyenwa ifya mubili. Loli bo bakwikala ukuyana nisya mwa Mbepo, bakubika inyinong’ono syabo pa finyenwa ifya mwa Mbepo. 6Pakubika inyinong’ono pafya mubili, ubumalilo bwake bufwe. Loli pakubika inyining’ono pafya mwa Mbepo bo bumi nu mutende. 7Pakuti syo umubili ghukwinong’ona silughu kwa Chala, po sitakwifwila indaghilo sya Chala, naloli sitangifwilapo. 8Po bo bakubika inyinong’ono syabo pafya mubili, batangamuhobosya u Chala.
9Loli umwe mutakwikala ngati mo ubundu bukubabusikisya umwe, pala naloli u Mbepo wa Chala akwikala mumwinyu. Loli pala yo ate nu Mbepo uwa Kilisitu, ate wa Kilisitu. 10Loli pala u Kilisitu ali mumwinyu, napo imibili yinyu yifwile chifukwa cha mbibi, loli u mbepo winyu bumi chifukwa cha bugholoke. 11#1 Kol3.16.Sona pala u Mbepo wa Chala yo akamususya u Yesu kubufwe akwikala mumwinyu, po wepe yo akamususya u Kilisitu u Yesu kubufwe akwisa pakuyipa imibili yinyu ubumi imifwe, ukwendela mwa Mbepo wake yo akwikala mumwinyu.
12Pololi bakamu bangu, tuli ningongole, loli ingongole yake te yakuti twikale ukuyana nu bundu awe. 13Pakuti pala mukwikala ukuyana nubundu bwinyu mukwisa pakufwa. Loli pala mo mwa Mbepo mukughogha imbombo imbibi isya mubili, mukwisa pakuba nu bumi. 14Pakuti abandu bo bakulongosiwa nu Mbepo wa Chala, bana ba Chala. 15#1 Kol2.12; Gal4.5-6.Pakuti u Mbepo yo mukapokela te wakuti abapele basya bakoghopa. Loli u Mbepo akubapela pakuba bana, bo tukulila ukuti, “Abba, Tata!” 16U Mbepo wa Chala akusimikisya poka nu mbepo witu ukuti utwe twe bana ba Chala. 17Po pala twe bana ba Chala, twebakupyana, po sona twebakupyana poka nu Kilisitu pala tukukomana nawe mundamyo syake umwakuti tughindikiwe nawe poka.
Ubughindikiwa ubwa mundasi
18Une ngwinong’ona ukuti indamyo syo tuli nasyo ipano tutangafwanikisya nu bughindikiwa bo bukwisa pakufumbuliwa ku kwitu. 19Pakuti Ifipeliwa fyosi fikulindilila nu kusubila ukuti u Chala abafumbulile abana bake. 20Pakuti ifipeliwa fitakapeliwa ukuti fitakabe nimbombo, nubwighane bwake awe, loli nubwighane bwa Chala yo akalonda ukuti fibe bula bula mulusubilo, 21ukuti ifipeliwa fyosi fikwisa pakusatuliwa kubusya ubwa kubola nukupokela ubusatuke nu bughindikiwa bwa bana ba Chala.
22Pakuti tusimenye ukuti fipeliwa fyosi fikukuta nu bubafu ngani ngati mukolo pakabalilo akakusayiwa. 23Loli te fipeliwa fyene fyo fikukuta; utwe twe tuli ni seke isyabwandilo isya Mbepo, nutwe tukukuta mukati kati, bo tukulindilila ukuti u Chala atupokele pakuba twe bana bake, sona nu kuyipoka imibili yitu. 24Pakuti utwe twapokiwa. Loli ulusubilo lo lukuboneka na maso, te lusubilo. Imba we wenu yo angakusubila cho akuchitesya? 25Loli pala tukulindilila cho tukuchitesya, po tukuchilindilila nu bukifu.
26Umwakuyana bubu, u Mbepo ukutwafwa ukufoka kwitu, pakuti utwe tutamenye namo tubaghile pakwiputila, loli u Mbepo Mwikemo akutwiputila nu kukuta, ko tutangayughiwa na masyu. 27Sona u Chala yo akutesya mumyoyo yitu, asimenye mo u Mbepo akwitwinong’ononela, chifukwa u Mbepo akubiputila abandu ba Chala ukuyana nu bwighane bwake.
28Tusimenye ukuti ifindu fyosi fikubendela akisa abandu bo bamughanite u Chala, bo bitisiwa ukuyana nu bwighane bwake. 29Pakuti abandu bo u Chala akabasala kale, akabapaghulila pakuba ngati Mwana wake, umwakuti u Mwana wake abe ngati we katote mu bakamu abingi. 30Po sona abandu bo u Chala akabapaghula, bope akabitisya, sona bo akabitisya, bakayughiwa pakuba bagholoke, sona akabeghana nabo ubughindikiwa bwake.
Ulughano lwa Chala mwa Kilisitu Yesu
31Imba tungati choni, mu fyosi fififi? Pala u Chala ali nutwe, we wenu yo angatususya utwe? 32U Chala atakatwima u Mwana wake, loli akatupa chifukwa cha utwe twe bosi! Imba atangatupa sona ifindu fyosi? 33Imba we wenu akwisa pakubasusya abandu bo basaliwa nu Chala? U Chala umwenecho weyo akubayugha ukuti bate ninongwa! 34Imba we wenu yo angabasusya? Nayumo, pakuti Kilisitu Yesu akafwa chifukwa cha utwe, sona akasyuka kubufwe nukuba nu bumi, yo ali kunyobe indilo iya Chala, yo akutwiputila utwe. 35Imba we wenu yo angatupaghulannya ku lughano lwa Kilisitu? Imba indamyo pamo ukutamiwa, pamo ukufwimiwa, pamo isala, pamo ukusita kuba ni fyakufwala, pamo ifyakoghofya, pamo ubufwe? 36#Mas44.22. Ngati mo amasimbo ghakuti,
“Chifukwa cha umwe tukufwa isiku lyosi,
Tuli ngati syo ng’osi syo sikubuka pakughoghiwa.”
37Awe, loli mufindu fyosi fififi twe bakupota ukwendela mu yo akatughana utwe. 38Pakuti simenye ukuti nachimo cho chingatupaghulannya utwe nu lughano lwake, napo bufwe pamo bumi, napo bandumi aba kumwanya pamo abalaghili, pamo ifya ipano pamo ifya mundasi pamo abamaka, 39napo butali bwa mumwanya napo butali bwa kuya pasi, napo findu fyosi mufipeliwa fyosi fyo fingatupaghulannya utwe ku lughano lwa Chala, loli mwa Kilisitu Yesu u Malafyale witu.
Currently Selected:
Aba Loma 8: SSTP
Highlight
Share
Copy
Want to have your highlights saved across all your devices? Sign up or sign in
