Aba Loma 6
6
Ukufwa kumbibi nukuba nu bumi mwa Kilisitu
1Po tungati choni? Imba twendelelaghe pakwikala mu mbibi ukuti ichisa chongelelepo? 2Awe, napo papala! Utwe twafwile ku mbibi, po imba tungendelela buli buli pakwikala mu mbibi? 3Imba mutasimenye ukuti twe bosi po tukosiwa mwa Kilisitu Yesu, tukosiwa sona mu bufwe bwake? 4#Aba Lom8.11; 1 Kol2.12. Pololi mu losyo tukasiliwa poka nawe mu bufwe, umwakuti ngati mo u Kilisitu akasyukila kubufwe mu bughindikiwa bwa Wise, po umwakuyana bubu, nutwe twikale nu bumi ubupya.
5 #
Filp3.10-11. Pakuti pala tukwikala poka nawe mu bufwe bwake, tukwisa pakwikala nawe poka pakusyuka kubafwe ngati mo akasyukila. 6Tusimenye ukuti ingalo yitu ingulu yikakomeliwa poka nu Yesu pambinjika, ukuti ingalo situ isya mbibi sinanganike, umwakuti tutakabe sona basya ba mbibi. 7Pala umundu afwa, asatuliwa ku bulaghili bwa mbibi. 8Loli pala tufwile poka nu Kilisitu, tukusubila ukuti tukwisa pakuba sona nu bumi poka nawe. 9Pakuti tusimenye ukuti u Kilisitu asyukite ku bufwe, po te akafwe sona, ubufwe bute nu bulaghili papake. 10Ubufwe bo akafwa, akafwa ku mbibi lyoka. Po ubumi bo akaba nabo bo bumi mwa Chala. 11#Gal2.19-20.Umwakuyana bubu, mwimanye mwebene pakuba ngati mwe bandu abafwe ku mbibi, loli muli nu bumi kwa Chala mwa Kilisitu Yesu.
12Pololi mutakitikisye ukuti imbibi yilamulilaghe imibili yinyu imifwe, umwakuti mwifwile ifinyenwa fyake. 13Mutakiyipe ichigaba chimo icha mubili winyu ku mbibi ukuti chibombe imbombo imbibi. Loli mwiyipe mwebene kwa Chala, ngati bandu bo basyuka bubu kubufwe, sona bali nu bumi. Mwiyipe imibili yinyu kwa Chala ukuti yibombe imbombo ingoloke. 14#Aba Lom8.2.Pakuti imbibi yitakwisa pakuba nu bulaghali papinyu chifukwa mute pasi pa bulaghili bwa ndaghilo, loli pasi pachisa cha Chala.
Ukuba basya ba bugholoke
15Po imba tutichoni? Imba tubombe imbibi chifukwa tuli pasi pa bulaghili bwa lulaghilo, loli tuli pasi pa chisa cha Chala? Awe, napo papala! 16Imba mutasimenye ukuti bo mukwiyipa mwebene ukuti mube basya ba mundu yo mukumwifwila ko kuti mwe basya ba mundu yo mukumwifwila. Sona pala mwe basya ba mbibi timufwe. Loli pala mwe basya ba Chala, timube bagholoke. 17Loli amapalo ghabe kwa Chala, napo kale mukaba mwe basya ba mbibi, loli ipano mukwifwila nu moyo winyu ghosi, ubwanaloli buli mufimanyisyo fyo mukapokela. 18Umwe mukasatuliwa ku mbibi, sona ipano mwaba basya ba babugholoke.
19Nguyugha ukuyana nu bundu chifukwa chakupotwa ukuyana ni mibili yitu. Kale mukiyipa mwebene pakuba mwe basya bafinyali nu bunyonganu, umwakuyana bubu, mubaghile mwiyipe mwebene ngati mwe basya ba bugholoke, ukuti mubebikemo.
20Po mukaba basya ba mbibi, mukaba basatuke ku bugholoke. 21Imba mukakabapo choni pakubomba ifindu fyo ipano fikubakosya isoni? Pakuti ubumalilo bwa kubomba ifindu ifi, bo bufwe! 22Loli pakuti ipano mwasatuliwa ku mbibi, po mwaba mwe basya ba Chala. Cho mwakabapo bo bwikemo, sona ubumalilo bwake bo bumi bwa bwile na bwile. 23Pakuti amalipilo gha mbibi, bo bufwe. Loli ichabupi icha Chala, bo bumi bwa bwile na bwile mwa Kilisitu Yesu u Malafyale witu.
Currently Selected:
Aba Loma 6: SSTP
Highlight
Share
Copy
Want to have your highlights saved across all your devices? Sign up or sign in
