Imbombo 25

U Pabuli pamaso pa Fesita

1Bo u Fesita afika mubuyo bwake, ghakilapo amasiku matatu po akabukagha ku Yelusalemu ukufuma ku Kesaliya. 2Ko abalongosi ba baputi na balongosi ba Chiyuda bakisa ku kwake ninongwa ya Pabuli, 3bakamusuma u Fesita ukuti abapelele ichisa pakumutuma u Pabuli ku Yelusalemu, pakuti bakabatika ukuti bamughoghe musila. 4U Fesita akamula akati, “U Pabuli akusungiwa mujela ku Kesaliya, po une ngulonda pakubuka losulu. 5Baleke abalongosi binyu bamo babuke poka nune ku Kesaliya nukuyugha inongwa ya mundu yuyu, pala anangite chimo.”

6Bo u Fesita ikala nabo amasiku eyiti pamo teni, akabuka ku Kesaliya, ilya ningelo lyake akikala pachitengo chakulongelapo inongwa nukulamula ukuti bise nu Pabuli pamaso pake. 7Bo u Pabuli afika, aba Yuda bo bakafumagha ku Yelusalemu bakamusyungulila nukwanda pakumutamandila u Pabuli ifindu ifipala pala, fyo bakapotwa pakusimikisya. 8Loli u Pabuli pakwipoka mwene akati, “Ndanangitepo nachimo ukuyana nindaghilo sya Chiyuda, pamo inyumba ya Chala, pamo kwa Kesali.”

9Loli u Fesita akalondagha pakubahobosya aba Yuda, po akamulalusya u Pabuli akati, “Imba ukulonda pakubuka ku Yelusalemu ukuti inongwa yako yilongiwe kula kula pamaso pangu?” 10Loli u Pabuli akati, “Ngwimilila pandasi pachitengo cha bulongi icha Kesali, ko mbaghile pakulongiwa, ku ba Yuda ndabanangilepo nachimo ukuyana namo uwe usimanyile akisa. 11Po pala nananga, pamo nabomba chimo cho mbaghile pakughoghiwa nacho, ndakukana pa kufwa, loli pala aba Yuda syo bakuyugha site syanaloli, atalipo na yumo yo angambika munyobe syabo, ngukusuma ukuti inongwa yangu yilongiwe nu Kesali.” 12Bo u Fesita ayughisannya na balongi abanine, akamula akati, “Wasuma ukuti inongwa yako yilongiwe nu Kesali, kwa kesali ko ukwisa pa kubuka.”

U Pabuli pamaso pa Agilipa nu Belenike

13Bo ghakilapo amasiku, umalafyale u Agilipa nu Belenike bakafika kwa kesaliya pakumupokela u Fesita. 14Bo bikalako amasiku amingi kula kula, u Fesita akamulingannya umalafyale nisya nongwa ya Pabuli akati, “Muno muli umundu yumo yo u Felikisi akamuleka mujela. 15Bo nabuka mu Yelusalemu abalongosi ba baputi na basongo ba Chiyuda bakisa ninongwa yake, sona bakanda ukuti ndumule ukuti u Pabuli akananga. 16Loli ngababusya ukuti indaghilo sya Chiloma sitakwitikisya pakumubika umundu munyobe sya banongwa yake, bo atakomanite nabo ukuti abe nulusako lwakwiyimila mwene. 17Bo bisa kuno, ndakataghapo akabalilo, loli ilya ningelo lyake ngikala pachitengo cha kulongelapo inongwa nukulamula ukuti bise nu mundu yula. 18Bo abanongwa yake bimilile, loli batakamupapo nayimo inongwa imbibi yo nginong’ona ukuti bangamupa. 19Loli ukudalingana kwabo kukaba kwakuyana ni chiputo chabo, sona nisya Yesu yo akafwa, loli u Pabuli akati mumi. 20Bo napotwa pakubusikisya ubwanaloli bwa nongwa iyi, ngamulalusya u Pabuli pala akulonda pakubuka ku Yelusalemu ukuti inongwa yake yilongiwe kula kula. 21Loli bo u Pabuli asuma ukuti bamusunge mujela mupaka po u Kesali atumula inongwa yake, po ngalamula ukuti bamusunge mujela mupaka po ngwisa pakumutuma kwa kesale.”

22Po u Agilipa akamubusya u Fesita akati, “Nalondagha ukuti mwifwe umundu uyu nemwene.”

Akamwamula akati, “Ningelo ukwisa pakumwifwa.”

23Ilya ningelo lyake u Agilipa nu Belenike bakisa nu bughindikiwa ubukulu nukwingila mu nyumba yakukomanilamo, poka na basongo ba basilikali na balongosi aba kaya kala, po u Fesita akalamula ukuti bise nu Pabuli, po akisa nawe. 24Po u Fesita akati, “Malafyale Agilipa, na bandu bosi bo bali nutwe muno, mukumutesya umundu uyu, yo aba Yuda bosi muno na mu Yelusalemu bakanda pakukuta ukuti atabaghile pakuba kubumi. 25Loli une ndakamwaghapo ni nongwa nayimo yo abaghile pakufwa nayo, po pakuti umwenecho akalonda ukuti inongwa yake yilongiwe nu Kesali, po ngatumula ukuti abukaghe kula kula. 26Loli une ndenasyo nasimo isyanaloli ukuti ningamusimbila umalafyale u Kesali nisya yuyo, po nisa nawe pamaso papako, napa malafyale u Agilipa ukuti pala wabusikisya inongwa yake, ningaba nasyo isyakusimba. 27Pakuti chingaba chabupunganu ku kwangu ukutuma umukayidi ukusita kuyugha inongwa yo anangite.”

Currently Selected:

Imbombo 25: SSTP

Highlight

Copy