Imbombo 17

Mukaya ka Tesalonika

1Bo u Pabuli nu Sila bakupulusannya mukaya ka Amufipoli na ka Apoloniya, bakafika mukaya ka Tesalonika ko kukaba inyumba ya kwiputilamo iya ba Yuda. 2U Pabuli akingila mu nyumba ya kwiputilamo ukuyana nu muteto wake, po mumasiku matatu agha kutusya akayughisannya nabo nisya masimbo, 3akabalingannya nu kusimikisya ukuti abaghile u Kilisitu pakutamiwa ngani nu kusyuka kubufwe, sona nukuti, “U Yesu yuyuyu yo ngufumusya ku umwe, yo we Kilisitu.” 4Po bamo bakamunnyengelela nukumukonga u Pabuli nu Sila, na ba Giliki abingi bo bakamwiputa u Chala, na bakolo abingi aba subiliwa.

5Loli aba Yuda bamo bakaba na kabini, sona bakababungannya bamo aba kayilo akabibi muminalo nukupanga akabukutila, po bakandisyagha ifyongo mukaya akakulu, bakakindila ku nyumba ya Yasoni, ukwinong’ona ukuti pamo koko bangamwagha u Pabuli nu Sila ukuti babafumikisye ku chilundilo cha bandu. 6Loli bo bapotwa pakubagha, bakamughusila u Yasoni poka nabitiki bamo pamaso pa balaghili ba mukaya akakulu, bakakolela bakati, “Abandu aba basambulannya ichisu chosi, ipano bisa na mukaya kitu, 7sona u Yasoni abapokela, po bosi bakunangannya indaghilo sya Kayisali, pakuyugha ukuti kuli umalafyale uyungi yo bakuti, we Yesu.” 8Po abandu bosi poka na balongosi bamukaya, bo bifwa sisisi bakakenuka ngani. 9Abalaghili bakamulipisya u Yasoni na banine indalama ukuti bakabasatule nukubuka.

U Pabuli nu Sila mukaya ka Beleya

10Ubusiku bula bula, abitiki bakamutuma u Pabuli nu Sila ku Beleya, bo bafika bakingila munyumba ya kwiputilamo. 11Abene abandu ba mukaya ka Beleya bo bakaba namahala ukukila aba mukaya ka Tesalonika, pakuti bakapokela amasyu nu moyo ghosi, po isiku ni siku bakamanyila mu masimbo ukuti bamanye pala syo u Pabuli akayugha sikaba sya bwanaloli. 12Po abingi bakasubila, na bakolo aba Chigiliki abamanyikwe, poka na banalume abingi. 13Loli bo aba Yuda aba mukaya ka Tesalonika bifwa ukuti amasyu gha Chala ghalumbiliwa nu Pabuli ku Beleya, bakisa kula kula nukwanda pakusongelesya nukwandisya ifyongo pakati pa chilundilo cha bandu. 14Po papapo napapo abitiki bakamutuma u Pabuli piloboko lya nyanja, loli u Sila nu Timoti bakasyala kula kula. 15Po bo bakamusindikila u Pabuli bakabuka nawe mupaka ku Ateni, po u Pabuli akababusya ukuti u Sila nu Timoti bamukonge mwalubilo, po bakafumapo.

U Pabuli akulumbilila mukaya ka Ateni

16Bo u Pabuli akubalindilila mukaya ka Ateni, umoyo wake ghukakala ngani bo atesya akaya kosi kiswile ni fifwani. 17Po akasusannya na ba Yuda na bakwiputa mu nyumba ya kwiputilamo, nabo akakomanagha nabo muminalo isiku ni siku. 18Abamanyisi bamo aba mu Epikuliya nu Sitoyiki bakasusannya nawe. Bamo bakalalusya bakati, “Imba umukonyofu uyu akulonda pakuyugha choni?”

Abanine bakati, “Akuboneka ngati akulumbilila abachala abagheni,” Chifukwa akalumbilila isya Yesu nu kusyuka ku bufwe. 19Po bakamusenya nukubuka nawe po bakabungana pa Eliyopagasi, ko bakamubusya bakati, “Tukulonda utumanyisye ichimanyisyo ichipya cho uli pakufumusya. 20Pakuti wisile nifindu ifigheni fyo tukwifwa mumakutu ghitu, po tukulonda ukuti tumanye ukuti ifindu ifi fikung’anamulaki.” 21(Bosi aba mu Ateni na bagheni bo bakikala mula mula akabalilo kosi ukusita kubomba nachimo, loli ukuyugha kwene nu kuteghelesya ifindu ifipya.)

22Po u Pabuli akimilila pakati pabuyo bwa kubunganapo ubwa Eliyopagasi nukuti, “Mwe bandu bamu Ateni, ngutesya ukuti mufyosi mwe bakwiputa ngani. 23#Yoh4.22.Pakuti bo ngwenda mukaya nu kutesya mumalo ghinyu agha kwiputilamo, ngachagha nichighemo cho chisimbiwe ukuti, ‘Kwa Chala umusita Kumanyikwa.’ Po weyo mukumwiputa ukusita kumumanya, we yuyo ngubafumukisya umwe. 24#1 Bany8.27; Yis42.5; Imbo7.48. U Chala yo akapela ichisu chapasi na fyosi fyo filimo, pakuba we Malafyale wa kumwanya nichisu chapasi, atakwikala mu nyumba sya Chala isya kusengiwa ninyobe sya bandu, 25#Mas50.8-12.pamo atakubombeliwa ninyobe sya bandu, ngati pala akusobelwa chimo, pakuti umwene weyo akubapa abandu ubumi nu mughi ni fingi fyosi. 26Ukufuma mufikolo fyosi ifya bandu akapela umundu weka, ukuti bikale pachisu chosi ichapasi, akabikila nganila akabalilo akakwikalila, sona nimbaka sya kwikalila kwabo, 27#Aba Lom1.20.ukuti bamulondaghe u Chala, pamo ukumulondesya nu kumwagha, napo umwene atakuba kubutali muyumo mwa utwe, 28pakuti

‘Mu mwake, tuli nu bumi, tukwenda, sona tuliko.’

Siyanite bubu namo abakwata inyimbo binyu bakati,

‘Pakuti nutwe twe bana bake.’

29“Pakuti nutwe twe bana ba Chala, tutakinong’onaghe ukuti u Chala ayanite ni chifwani icha golide, pamo icha siliva, pamo icha ibwe, cho chikabisiwa akisa na mahala gha bandu. 30Akabalilo ko abandu batakamumanyagha u Chala akabalekelela, loli ipano akulamulila abandu bosi kosi ko bali ukuti bapinduke nukusileka imbibi syabo. 31Pakuti abikite isiku lyoka lyo akwisa pakulongela ichisu cho bakwikalamo abandu aba bwanaloli ukwendela mu mundu yo amusalite, abasimikisya sisisi abandu bosi pakumususya kubufwe.”

32Bo bifwa isya kusyuka ku bufwe, bamo bakamobesya, loli abanine bakati, “Tukulonda tukwifwe ukuyugha sona nisya isi.”

33Po u Pabuli akafumapo palukomano lwabo. 34Loli bamo bakamukonga nu kusubila, uwa mubamo akaba we Diyonisiya uwa mubuyo bwa Eliyopagasi, nu mukolo yumo yo ilita lyake akaba we Damalisi, nabanine bo bakaba nabo.

Currently Selected:

Imbombo 17: SSTP

Highlight

Copy