प्रेशित 6

हांत सेवकोहों निवडीइलोअ

1तियां दिहोमेहें जाहां सेलाआं गणती खुब वादी वोल्यी, तेहेलाम ग्रीक बाशा गोगनारे इब्री बाशा वालांपोअ टुटणे वोल्ये, के दाड़ख्यीइ वाटणीइ सेवामेहें आमाआं रोंडाअली बायहींइं कोडो कालजी नाहां कोअतो. 2ताहराअ ते बारा सेला विश्वास्याआं मंडड़ीही तियांआं जागे हादीत कोइत पोन्सू बोहाड़्यू ताहरोअ कोयो, “ओं बोराबर नाहां, के आपू देवोअ वसन सोड़ीत कोइत खाअलान पीइलाआ सेवामेहें रोअहूं जोवे. 3तियाहा काजे, ए पाव्हीइला, तुमू आपामेहें रोत हांत हाजा माट्योहों जे पवित्र आत्मा वाअहीं आन बुद्दी वाअहीं पोआला ओय, तियांहां निवड़ीत ल्या, मोन्ज्ये आमू तियांहां या कामोअ काजे ठरवी देहूं. 4पोन आमू ते प्रार्थना आन वसन कोत आपीइलाआ सेवामेहें लागीत रोहूं.”

5ए गोठ आखी मंडड़ीही पोट्यी, ताहां तियां स्तिफन नावोअ एका माट्योहो जो विश्वासो वाअहीं आन पवित्र आत्मा वाअहीं पोआलू ओतू, आना फिलीप, प्रोखुरुस, नीकानोर, तीमोन, परमिनास, आन अंताकियावालू नीकलाव जो यहुदी बोण्युतो, यांहां निवड़ीत लेदा. 6तियांहां प्रेशितोंअ हुंबर उबा राख्या आन तियां प्रार्थना कोइत तियांपोअ आथ मेक्या.

7देवोअ वसन पसरीइतो गोयो आन येरुसालेमोमेहें सेलाआं गणती खुब वादीत गोयी; आन पुंजारका जातीइ वारुज जोओं या विश्वासोहो मानित लेदू.

स्तिफनोअ तोआइलोअ

8स्तिफन देवोअ वोडी मेरवानी आन ताकते वाअहीं पोआइत कोइत माअहोंअ सामने समत्कार आन वोडे वोडे कामे देखाड़तुतो. 9ताहां तिया यहुदी आराधनालयोमेहें रोते जें सुटली जातीइ यहुदी माहें कोत गणाअतेते, आना कुरेनी आन अलेक्झांद्रिया सेहरोअ आन किलिकिया सेहरोअ, आन आसियाआ माअहूंमेहें रोत थोड़ेक ऊठीत कोइत स्तिफनोअरी सुलाए वोल्ये. 10पोन आत्मा स्तिफनह एहेलिही बुद्दी आप्यी के तो जाहां बी गोठी कोअतुतो, तेहेलाम तियाआ गोठीही ते खोटी ठरवीत ने सेका. 11ताहराअ ते थोड़ाक माअहुंहूं ओं कोय तेहें सिकाड़ी देदे, “आमू याहा मोशेए आन देवोअ विरुद्धामेहें निंदा कोअत्लाहा उनाअया.” 12ताहराआ माअहें आन डायहां आन कायदाअ मास्तर ए आखा पोडकीत उठ्या आन स्तिफनह तोइत कोइत पोन्साअ सामने लेताया. 13आन ठोग साक्शीदार उबा कोअया, तियां कोयो, “ओ माटी सादा या पवित्र जागाआ आन मोशेए नियमोंअ निंदा कोअहे. 14काहाके आमू याहा एहें कोत्लाहा उनाअयाहा के ओज ईसु नासरी या मंदिरोहो निसे पाड़ी देये, आन तियीं रितिही बोदलीत टाकी देये जे आपुहूं मोशेप रोत जोड़्यीही!” 15ताहां आखा माअहूं जें पोन्सामेहें बोठेते, तियापोअ नजर टाक्यी ताहां तियाआ सोब देवदुतोअ होस देख्यी.

Currently Selected:

प्रेशित 6: NST25

Highlight

Copy