प्रेशित 4

पोन्साअ सामने पेत्र आन योहान

1जेहेलाम पेत्र आन योहान माअहुंहूं ओं कोत आपताते, ताहां पुंजारा आन मंदिरोअ डायहां आन सादूकी तियांअहें आया. 2तियांहां खुब खोत लागी काहाके ते बेनू जोओं माअहुंहूं सिकाड़ताते के ईसु मोल्याम रोत जिवीत उठ्युहू आन ओज तो पुरावू होये के मोल्ये बी जिवीत उठे. 3ताहां तियां पेत्र आन योहानोहो तोइत कोइत बिहीरे दिही जाआं जेलेम मिक्या, काहाके वेल पोड़ीत गोयीते. 4पोन वसन उनाअनारा मेहें रोत वारुज जोओं विश्वास कोअयू, आन तियांआं गणती एक आंदास पास हाजार एतीही ओत गोयी.

5बिहीरे दिही एहेलोह ओवो के तियांआं आधिकारी, डायहां आन कायदाअ मास्तर, 6तिहींमेहें पुंजारा हन्ना आन कैफा, योहान, अलेक्झांडर आन जेताहा पुंजाराआ कुटूंबाअ ओता, आखा येरुसालेमोमेहें टोलू वोल्या. 7ते तियां प्रेशितोहों विसमेहें उबा राखीत फुसा वोल्या, के “तुमू ओं काम कोड्ली सेक्ती वाअहीं आन कोडाअ नावो वाअहीं कोअयो?”

8ताहरुउ पेत्रे पवित्र आत्मा वाअहीं पोआईत कोइत तियांहां कोयो, “ए माअहोंअ पुढाऱ्यों आन डाया: 9या लेंगड़ा माहुंउंरी हाजी गोठ ओवी, ताहां किहा वाअहीं हुदरीइल्यू कोत आमापोअ तियाआ बाप्तिम आज सौकीशी जर कोअताय, 10ताहां तुमू बी जाईंत ल्या, आन आखे इस्राएली माअहें बी जाईंत लेय के, नासरेथवाला ईसु ख्रिस्ताआ नावसे ओं माहुंउं तुमाआं हुंबर हाजलोज उबो रोयोहो, जियाहा तुमू क्रुस खांबोपोअ टांग्यू, आन देवे तियाहा मोल्याम रोत जिवाड़्यू, 11ओ ईसु तोज माटी होये, जियाआ बाप्तिम लेख्योहो के,

“‘ओ तोज डोण होय जियाहा तुमू राजमिस्त्र्यां बी विण कामोअ ठरव्यू

आन तोज कोपराआ वोडु डोण ओत गोयू.’

12“बिहीरा कोडाज वाअहीं तारण#4:12 तारण सुटका, पापोअ माफी नाहां; काहाके होरगाआ निसे माअहूंमेहें फाशोअ कोड्लोज बिहीरो नाव नाहां आप्यो, जिया वाअहीं आपुहूं तारण जोड़ीत सेके.”

13जेहेलाम तियां पेत्राअ आन योहानोअ हिम्मत देख्यी, आन ओं जाअयों, के ए आड़ाम्या आन सादा माटी होये, ताहां बोगलाअया; आन तियांहां मुंदू पोड़्यू, के ए ईसुउरी रोयाते. 14तिया लेंगड़ा माहुंहूं जो हुदर्‍योतो, तियांअरी देखीत कोइते, तियांआं विरुद्दाम ते किज ने कोत सेका. 15पोन तियांहां आराधनालयोअ बारथे जायतेहें कोयोन ताहराआ तियां तियांआं विसार कोआ वोल्या, 16“आपू यां माअहोंअरी की कोअहूं? काहाके येरुसालेमोम रोनारे आखे माअहूं देख्योहो, के यांवाअहीं एक नावासी समत्कार देखाड़्युहू; आन आपू तियाआ नाकार नाहां कोइत सेकता. 17पोन याअकाजे के ए गोठ माअहूंमेहें फाशीइ वादार पसरीत ने जाअहूं जोवे कोत आपू तियांहां धमकी देत्ला, के ते या नावोवाअहीं फाशाआ कोडा माअहोंअरी गोठी ने कोअहूं जोवे.”

18ताहां पेत्र आन योहानोहो हाद्या आन आदेश आपीत कोइत कोयो, “ईसुउ नावोवाअहीं किज मा सोकहा आन कीज मा सिकाड़हा.” 19पोन पेत्र आन योहाने तियांहां उत्तर आप्यो, “केहें आमू देवोअ गोठी रोत वादार तुमाआं गोठ मानीइली, ओं देवोअ नजरेम केतोह बोराबर होय तो तुमूज ठरवा. 20काहाके, ओं ते आमा वाअहीं ने ओत सेके के, जो आमू पाल्यो आन उनाअयाहा, तो ने कोंव.” 21ताहां तियां पेत्राहा आन योहानोहो फाशीइ धमकी आपीत कोइत सोड़ी देदा, काहाके माअहुंउं वोजेसे तियांहां डोंड आपीइलाअ कठीण ओत गोयो, याअकाजे के जे घटना ओवीते तियीइ काजे आखे माअहें देवोअ स्तुती कोअतेते. 22तो हुदरीइनारो माहुंउं, जियापोअ ओं हुदरीइलाअ समत्कार देखाड़्युतो, सालीही वोर्ह्यों रोत वादार डायो ओतो.

विश्वासी माअहोंअ हिम्मतोअ काजे प्रार्थना

23पेत्र आन योहान सुटित कोइत तियांआं जोड़ीदारोअ जागे आया, आन जो कि बी आधिकारी आन डायहां तियांहां कोयोतो, तों तियांहां कोताप्यो. 24#निर्ग 20:11; नहे 9:6; भजन 146:6ओं उनाइत तियां एक मोन ओत कोइते जोरे आवाजोम देवोहो कोयो, “ए मालिख, होरगो, धरती, दोर्‍या आन तियामेहें जों किबी होये, तों आखो तुमेज बोणायोहो! 25पवित्र आत्मा वाअहीं ताआं सेवक आमाआं कुलपती दाविद याआ जिबानी वाअहीं तुमे कोयो,

“‘बिगर यहुदी माअहूं दोंगू काहा माताड़्यू?

आन देसो देसोअ माअहें फालतू योजना काहा बोणायी?

26 # भजन 2:1,2 प्रभु आन तियाआ ख्रिस्ताआ विरुद्दाम

धरतीइ राजहां उबा रोया,

आन पुडारी आखा एकठा ओत गोया.’

27 # मत्तय 27:1,2; मार्क 15:1; लुक 23:1,7-11; योहान 18:28,29 “काहाके हुदाअलीज ताआ पवित्र सेवक ईसुउ विरुद्धामेहें, जियाअ तुमे अभिशेक कोअयू, हेरोद आन पंतीयुस पिलात बी बिगर यहुदी आन इस्राएल वालाअरी या होयरोमेहें एकठा ओवाहा, 28काहाके जों किबी पेल रोत ओवे तेहें काजे ताआ सेक्ती आन इश्शा वाअहीं ठरव्योतो, तोंज ते कोअहूं जोवे. 29ओमे ए प्रभु, तियांआं धमकी देअलाअहें पाल; आन ताआ सेवकोहों ओं वरदान आप, के ताआ वसन वोडी हिम्मतो वाअहीं कोत सेके. 30तू ताआ आथ हुदारीइलोअ काजे नांबू कोअ, काहाके समत्कार आन वोडे वोडे कामे ताआ पवित्र सेवक ईसुउ नावो वाअहीं ओवुहूं जोवे.”

31जेहेलाम तियां प्रार्थना कोइत लेदी, तेहेलाम तिहींइं तो जागू आलित गोयू जिहीं तें एकठे ओवेते, आन ते आखे पवित्र आत्मा वाअहीं पोआइत गोये, आन देवोअ वसन हिम्मतो वाअहीं कोतापते रोये.

विश्वासी माहें तियांआं मालधन वाटीत खात्ले

32विश्वास कोअनारा माहुंउं मंडड़ी एका मोनोअ आन एका जिवोअ ओती, एतेहे जाआं के कोडोज बी सोताआ मालधन माआं ने कोतोतो, पोन आखो बादो गोवांदीमेहें सालतोतो. 33प्रेशित वोडी सेक्ती वाअहीं प्रभु ईसुउ जिवीत उठीइलाअ साक्शी देता रोया आन तियां आखा पोअ वोडी मेरवानी ओती. 34तियांमेहें कोडोज गरीब ने ओतो, काहाके जियांपोअ खेते, नेत कोएं ओते, तियांहां तें वेसी वेसीइ जे किंमत आवतीते तेज किंमत आपी देतेते; 35आन तियीही प्रेशितोंअ गुडाअ जागे मिकतेते; आन जेहलीही जियाहा गरज रोतीते, तियाआ पुरमाणे हारेक जोओंहों तें वाटी देतेते.

36योसेफ नावोअ सायपरसोअ एक लेवी ओतू जियाआ नाव प्रेशितहों बरनबास, मोन्ज्ये “हिम्मत आपनारु.” मिक्यतो. 37तियाआ थोड़ेक खेते ओते, जियांहां तिये वेशे, आन खेतोअ किमतेए पोशा लेतावीत कोइत सेलाअ गुडाअ जागे मिकी देदा.

Currently Selected:

प्रेशित 4: NST25

Highlight

Copy