Matîo 2
2
Pazsé nò na mecÿɔ́ʼsaŋ fǒ mbuʼ sǎʼnèm ńtó ńgyá Yěsô
1Mé la zyé Yěsô á tÿǒsoŋ Mbɛ́tèlehɛm, á tsɛ̀ɛ pàga ngwòŋ Jẅindê, á fʉ̀ʼ gie Elônde laa fùɔ. Etsɔ́ pazsé nò na mecÿɔ́ʼsaŋ fó láʼ pɔ́b mbuʼ sǎʼnèm ńtóo Yelúzálèm, 2ńgwá ńzɛ́te ngie: «À fùɔ pà Yúndà gẅie mé ka nyě ńzyé yé la, à gwɔ̌ pɔ́ nzɔ̌? Á nue peg ka tyé láʼ peg mbuʼ sǎʼnèm, ńgyá cÿɔ́ʼsaŋ we, tà peg tóo páʼɔɔn léŋwɔ́ʼ nnɛ́ mvfò yé.»
3Afùɔ Elônde la gwɔ́ tà ńjúʼu yɛ̌ nò, á pú, ńcuʼu twó yé, ńcuʼu twó patsẅé Yelúzálèm ntsèm. 4Fùɔ Elônde leen ńké ńtóŋ metándá panuŋepwɔʼ pâ pakyagte lepʉ̌ Mǒonsê tsɛ̀ɛ láʼ, ńzɛ́te wɔ́b jʉʼ gie mé lɔ́ɔn ńgee zyé Nzàʼnkÿo wó. 5Pɔ́ shwóŋo yé ngie: «Á Mbɛ́tèlehɛm, á tsɛ̀ɛ pàga láʼa Jẅindê, mélàʼmie ntsẅìnkʉ̀ Ssé la ŋweʼe ngie:
6“Á gʉa na gù Mbɛ́tèlehɛm, á tsɛ̀ɛ pàga ngwòŋ Jẅindê,
ɔ̀ te tsetsɛ̀ɛ metÿǒsoŋ pà Yúndà ńdeen ńgwɔ́ pɔ́ nzsònzèm wɔ́,
á nue afùɔ gẅie à ge láʼ sáʼ pʉ̀a pɔ́ɔn pà Ésàlayɛ ge láʼ kẅɛ pɔ́ tsetsɛ̀ɛ pi#2:6 Mis 5:1.”»
7Elônde leen ńké éshú shú ńtóŋ pazsé nò na mecÿɔ́ʼsaŋ, ńzɛ́te wɔ́b kwàʼ fʉ̀ʼ gie cÿɔ́ʼsaŋ ka kẅɛ. 8Afʉ̀ʼ kuʼ, á túmo wɔ́b Mbɛ́tèlehɛm, ńgɔɔn né pɔ́b ngie: «Pi gʉa ńcÿó nnɛ́, ńtúŋte nò na múɔ ŋwɛ́; pi lɔɔn ńgyá yé, pi gÿo mèŋ n zsé, tá à cʉa púʼu, n gʉa yɔ́ɔn ńŋwɔ́ʼ nnɛ́ mvfò yé.»
9Pazsé nò na mecÿɔ́ʼsaŋ júʼu nò gie fùɔ Elônde gɔ̌ɔn, ńcʉ́me mánzsè. Ńgíŋe ńgyá cÿɔ́ʼsaŋ gẅie pɔ́ la gyá mbuʼ sǎʼnèm la. Á gwɔ́ mvfò pɔ́b ńgiŋe, ńgʉa tà ńkúu jʉʼ gie múɔ aa wó, ńdeen ńtyé. 10Pɔ́ la gyá cÿɔ́ʼsaŋ púʼu, ḿbú ńkág tɛʼ. 11Pɔ́ la zyɛ́ʼ ńkúu ndá, ńgyá múɔ pɔ́ má we Malîɛ, ńŋwɔ́ʼ nnɛ́ mvfò yé, ńná mekùʼ mé; afʉ̀ʼ kuʼ, pɔ́ taʼ pɔ̀ɔn sɔ́b, ńkẅile tʉ̌ ngɔ̂ɔ pɔ́ laméndɔ̀ɔn ntí pʉ́a, ńdɔg ńnéŋe shʉ̀ŋe múɔ.#2:11 Laméndɔ̀ɔn gie áa jʉʼɔɔn áa na shwóŋe felaŋsé, ńgwɔ́ encens mbɔɔ mîi. 12Afʉ̀ʼ kuʼ, e Ssé lɔg njÿòon shwóŋo wɔ́b ngie pɔ́ pɔ́ɔn légíŋe ḿbiŋe lejʉ́ŋ fùɔ Elônde. Pɔ́ leen ńké ńcʉ́ʼ ḿpfó pɔ́ nzsè ndyɛ̀ʼɛ tá ḿbiŋ né láʼ pɔ́b.
Mé lɔgɔ́ múɔ ńkÿo ńgee tsɛ̀ɛ ngwòŋ Egíbtò
13Pazsé nò na mecÿɔ́ʼsaŋ la gwɔ́ tà ńgʉa, Yesyɛ̂b lyé njÿòon, ńgyá cÿɔ́ʼ Cʉ̀apʉ̀a kẅɛ, ńgɔɔn né yé ngie: «Lu ssé ńkaa múɔ, pi lâ mápfò kÿo, ńgʉa lé tsɛ̀ɛ ngwòŋ Egíbtò ńnéŋe wó. N ge gÿo shwóŋo gú fʉ̀ʼ gie ɔ̀ ge piŋ nzèm. Á nue Elônde ge faʼa múɔ wɛ̂ lézẅé yé.» 14Yesyɛ̂b lu ssé pɔ́ letsẅɛ́ʼ, ńkaa múɔ, pâ mápfò gʉa lê tsɛ̀ɛ ngwòŋ Egíbtò. 15Ńdáʼ ńnéŋe wó tà fùɔ Elônde láʼ ńkwé. Mɔɔn menò lɔgɔ ḿbumte na páʼ Cʉ̀apʉ̀a Ssé la tʉ́ njÿó ńdɔg ncwò ntsẅìnkʉ̀ we ńgɔɔn ngie: «Mèŋ n da tóŋo Míŋ wɔ̀ɔn, á fó tsɛ̀ɛ ngwòŋ Egíbtò ḿbiŋ nzèm.»
Elônde gÿǒ mé zẅéte púɔ mepÿɛ́ á Mbɛ́tèlehɛm
16Elônde la gwɔ́ tà ńgyá ngie pazsé nò na mecÿɔ́ʼsaŋ ka fʉte yé, ńgyáŋa lóŋ tɛʼ. Ńdeen ńtúm pʉ̀a ngie pɔ́ gʉa tÿǒsoŋo Mbɛ́tèlehɛm tà mbɔɔ menkwɔʼɔ́ tÿǒsoŋ, ḿbú ńzẅéte penkʉ́ ntsèm pie é kǔʼ ngùʼ pʉ́a, mbɔɔ pie é nyé te kuʼ ngùʼ pʉ́a. Ńgÿo púʼu ńdɔgɔ ńdʉŋte na fʉ̀ʼ gie pazsé nò na mecÿɔ́ʼsaŋ la shwóŋo yé ngie cÿɔ́ʼsaŋ ka kẅɛ. 17Á lɔgɔ púʼu ḿbumte na nò gie Yelemî ntsẅìnkʉ̀ Ssé, la tʉ́ njÿó ńgɔɔn ngie:
18«Mé jǔʼ mé gwɔ́ tÿǒsoŋo Lámà ńcÿo ngwòŋ,
ńne ńkɔ́ʼɔ legwé, ńdʉa.
Á gwɔ́ Lǎshÿɛ̂ gẅie à lʉa penkʉ́ pé, mélàʼmie pɔ́ kweté.
Á pú te né ńkwoŋo ngie mé tsíʼi ntse nÿɔ́g mé wɔ́#2:18 Yel 31:15.»
Mé lɔgɔ́ múɔ fó tsɛ̀ɛ ngwòŋ Egíbtò ḿbiŋ nzèm
19Elônde la gwɔ́ tà ńkwé, Yesyɛ̂b lyé njÿòon á Egíbtò, ńgyá atsɔ̌ cÿɔ́ʼ Cʉ̀apʉ̀a kẅɛ, 20ńgɔɔn né yé ngie: «Lu ssé, ńkaa múɔ, pi lâ mápfò piŋ nzèm lê tsɛ̀ɛ ngwòŋ Ésàlayɛ. Á nue pʉ̀a pie é kɔ́ɔn faʼa lézẅé múɔ kéen ńkwéte.»
21Yesyɛ̂b lu ssé, ńkaa múɔ, pâ mápfò ne ḿbiŋe nzèm né tsɛ̀ɛ ngwòŋ Ésàlayɛ, 22á júʼ ngie Alekelawúsè zɔ ne sáʼa pàga ngwòŋ Jẅindê, tà fó páʼ tá we Elônde ka kwě, ńne ńcÿɔʼɔ légʉa Jẅindê, ńdyé njÿòon, Cʉ̀apʉ̀a kága tuŋó yé. Á cʉ́ʼ ńgʉa pɔ́ né tsɛ̀ɛ pàga ngwòŋ Ngalílîa. 23Ńgʉa tà ńkúu wó, ńne ńtsẅé tsɛ̀ɛ tsɔ̌ tÿǒsoŋ, mé tóŋo lê Nǎzalɛd. Á lɔgɔ ḿbumte na páʼ pantsẅìnkʉ̀ Ssé la tʉ́ njÿó ńgɔɔn nò na Nzàʼnkÿo ngie: «Mé ge láʼ tóŋo yé lê nyìŋ Nǎzalɛd!»
© 2026, CABTAL