Mateo 26
26
Chilangano chokubulaya Jesu
(Mako 14:1,2; Luka 22:1,2; Joni 11:45-53)
1Jesu paakapeja kulebeleka mawhi yaya, wakati kubalayijwa babe, 2“Munoziba kuti kwasala mazhuba mabili kuti kuswike iPasika, nokudalo Mwananhulumyana woNhu unoopilwa ekahamilwe ponchinjikwa.”
3Ndipo batebuji bakulwana nabatungamili babanhu bakabungana pengumba yontebuji unkulwana, waluwhi Keyifasi, 4bakalangana kuti bangonsunga chini Jesu nenzila yobuchengeji, bombulaye. 5Koga bakati, “tisite alo nonshaji wemiliya, nokuti kungaba nokusogajikana mukati mwabanhu.”
Jesu Unogubwa kuBhetani
(Mako 14:3-9; Joni 12:1-8)
6Jesu wakati eli kuBhetani mungumba yaSimoni wakabalwalabo mapelembuji, 7eligele petebuli elikumulya, kwakaswika umwe unhukaji eli nefukwana lyamafuta obunde anodula kasa, akadila munsholo mwaJesu. 8Balayijwa babe pabakazwibona yezwi bakanyemeswa nazwo, beti “Azanisilwani? 9Mafuta obunde yaya ngana atengeswa nemali inji, ikapiwa basheti.”
10Jesu wakajiziba indangalilo jabo, akati kwabali, “Ini muunyaja unhukaji yoyu? Zwaanditila chinhu chibuyanana. 11Nokuti basheti mobeli nabo unshaji wose, koga amutobeli nami unshaji wose. 12Kudila mafuta obunde pombili wangu, wazwita elonganyila kujikwa kwangu. 13Chokomende ndinoti kwamuli, pose panoobhaunulwa indebo imbuya yeyi munyika yose, yezwi zwaata zwinoolebwa sechikumbulujo chiche.”
Judasi Unocheta Jesu
(Mako 14:10,11; Luka 22:3-6)
14Pakalepo umwe wabegumi nababili, waluwhi Judasi Isikaliyoti, wakenda kubatebuji bakulwana, 15akati, “Mungandipani ndingopila Jesu kwamuli?” Ibo bakondipa makumi matatu esiliva. 16Kuvila yoyo unshaji wakashaka inzila yokuuncheta.
Jesu Unolya Chilayilo chePasika Chopejeleja Nabalayijwa Babe
(Mako 14:12-21; Luka 22:7-13,21-23; Joni 13:21-30)
17Nezhuba lyotanga lyechinkwa chisina unkukumuso balayijwa bakezha kuna Jesu, beti, “Ngokupi kwaunoda kuti tinokulonganyila kuti ulye iPasika”
18Wakati kwabali, “Indani muguta kunoomwe unhu, munoti kwaali, ‘uNdayiji wati iye, unshaji wangu waaba pelyo, pengumba iyo ndipo pandichalyila iPasika nabalayijwa bangu.’ ”
19Balayijwa bakata sezwabakalayijwa naJesu bakalonganyila kulya kwePasika.
20Pakwakati aba madeko, wakagala petebuli, nabalayijwa bali gumi nababili, 21pabakabelya, wakati, “chokomende ndinoti kwamuli, umwe wenu unoondicheta.”
22Ibo bakahetela kasa, bakatanga kuumbhuza umwe nomwe, beti, “Ndimi na, Tezi”
23Wakabashandula eti, “Iye wabiga luboko mundyilo nami, ndiye uchandicheta. 24Mwananhulumyana woNhu unoonda nenzila yakakwalwa, koga lutaka kunoyo uchacheta Mwananhulumyana woNhu! Zwaluba zwibuyanana kunhu yoyo, ngana asakazwalwa.”
25Judasi, unoba iye wakoncheta, wakati “Ndimi na, Tezi”
Jesu wakati kwaali, “Seni waleba.”
Chilayilo chaShe
(Mako 14:22-26; Luka 22:14-20; 1 BaKolinte 11:23-25)
26Bakati bechinolya Jesu wakatola chinkwa, akachikombolela, akachimedula, akachipa balayijwa babe, eti, “Tolani mulye, yoyu umbili wangu.”
27Wakatola unkombe akaboka, eti, “Inwani mose, 28nokuti yeli ilopa lyangu lyechivumilano lichakutukila banji kutila kuti luchinyo lulekejelwe. 29Ndinoti kwamuli, andichinoonwa kabili, chinwiwa chonchelo wonzhambi, kuswikila yelyo izhuba lyandichochinwa bupya namwi mubushe bwaTate bangu.”
30Pabakati bakwimba lwimbo bakabhuda benda kudunhu lyamaOlivi.
Jesu Unolebambeli nokuLambwa kukwe naPita
(Mako 14:27-31; Luka 22:31-34; Joni 13:36-38)
31Ngweno Jesu wakati kwabali, “Busiku yobuno imwi mose munonditizha, nokuti kulokwalwa kuti ‘Ndinooloba undyisi, imhwizi jedanga jinoomwayika.’ 32Koga mushule mokumuka kwangu ndinoomutangila kunda kuGalili.”
33Pita wakashandula, eti, “Kojoba bamwe bose bakatizha nokuda kuko, imi anditokulamba.”
34Jesu wakati kwaali “Chokomende ndinoti kunawi, busiku yobuno unondilamba katatu, igukulume lisanu lyakokolika.”
35Pita wakati kwaali, “Kojoba kuli kufa nawi, anditokulamba.”
Bose balayijwa bakaleba alo.
Jesu unonamata muGesemani
(Mako 14:32-42; Luka 22:39-46)
36Jesu wakenda nabo kubugalo bunowhi Gesemani, akati kubalayijwa babe, “Galani yopa, ndikumunda yopaya kunonamata.” 37Wakatola Pita nabanabanhulumyana baZebhedi babili, akatanga kuhetela nokunyajikana kasa. 38Wakati kwabali, “Moyo wangu uloshulubala kasa, kuswikila pakufa, galani yopa, mulinde nami.”
39Wakakwenda inhambo inshomanana, wakafhigama, akakotama chiso chiche chikaguma pasi, akanamata, eti, “Tate bangu, kana zwitubukana, unkombe wokujiijwa yoyu ngaupinde kunami, kusibe sokuda kwangu, koga sokuda kwenu.”
40Wakabwilila kubalayijwa, akabawana belilele, akati kunaPita, “Amungalinde nami kwe awa limwempela chete? 41Lingani, munamate kuti musingwine mukukwejwa, umpepo unoda zwawo, koga umbili unabutela.”
42Akale lwabili wakasundubukila kwakale, akanonamata, eti, “Tate bangu, kana unkombe yoyu usinotubukana kubhiswa ndisanwa, ngazwitike sokuda kwenu.” 43Wakabwilila akale akabawana balala, nokuti ihope jakabakababhata.
44Wakabasiya, akenda kunonamata kechitatu, eleba mawhi akalewo. 45Wakezha kubalayijwa, akati kuna ibo, “Muchilele munyetutukwa zwenu? Bonani waswika unshaji, akale Mwananhulumyana woNhu ukumuchetwa mumaboko abachinyi. 46Nyamukani tikwende. Lingani, uncheti wangu wabapelyo.”
Kusungwa kwaJesu
(Mako 14:43-50; Luka 22:47-53; Joni 18:3-12)
47Echinolebeleka, Judasi wakaswika, umwe wabegumi nababili, elinebunga igulwana bekabhata makwalabaza neswimbo, batumwa nabatebuji bakulwana nabatungamili babanhu. 48Feno uncheti wakapa chitondejo eti, “Yoyo undichamyonta, mumbhate, ndiye.”
49Wakenda kuna Jesu pakalepo, akati, “kwaswibha Ndayiji!” Akomyonta.
50Jesu wakati kunaiye, “nkwaina, ini uli yopano?”
Bakondila bakombhata akale bakonsunga. 51Hezwo, umwe waabo baluba naJesu wakabhisa igwalabaza lilye, akakwapula inzebe youmwe undanda wontebuji unkulwana. 52Jesu wakati kwaali, “Bwiliza igwalabaza lilyo pabugalo bwalyo, nokuti bose banobhata igwalabaza banopalajwa negwalabaza. 53Autoyeya na kuti ndinotubula kukumbila kuna Tate bangu kuti benditumile pakalepo makapo engilozi jabalwi anopinda pegumi lina mabili? 54Biya anoozhajikijwa chini makwalo, anoleba kuti zwibe alo.”
55Panooyo unshaji Jesu wakalebeleka kubunga lyabanhu, eti, “Mwezha namakwalabaza neswimbo kondibhata, soti ndimpanduki na? Izhuba nezhuba ndalugala muTempeli ndilayija, koga amujakandibhata. 56Koga zwose yezwi zwatikana kuti zwizhajikije zwakakwalwa nabapolofeti.”
Yopo balayijwa bose bakonsiya, bakatizha.
Jesu unomiswa mbeli kweGota
(Mako 14:53-65; Luka 22:54,55,63-71; Joni 18:13,14,19-24)
57Yabo bakabhata Jesu bakonsenga kunaKayifasi, untebuji unkulwana, kwakabakabungana balayiji bomulawo nabatungamili babanhu. 58Koga Pita wakontobela eli kule, mane kuswikila kulubazhe lwontebuji unkulwana, akangwina mukati akagala nabalindi eda kubona kuti zwinopela chini. 59Batebuji bakulwana namakulukota bakapyanga busumikiji bwokuniepela Jesu kuti bombulaye, 60asi apana bubakawana, kojoba basumikiji bokuniepa bakezha. Kumapejelejo kwakoowanika babili, 61bakati, “Yoyu unhu wakati, ‘Ndinotubula kukolomola itempeli lyaMwali, ndikalibakulula mumazhuba matatu.’ ”
62Untebuji unkulwana wakanyamuka, akati, “Iwi, aunenshandulo na? Ini yaba banhu besumikija zwibi pezhulu papo?” 63Koga Jesu wakanyalala. Untebuji unkulwana akati kwaali, “ita ikowhe naMwali umpenyu, utibuje kuti ndiwi Kristo Mwananhulumyana waMwali na”
64Jesu wakati kwaali, “Wazwileba woga. Koga ndinoti kwauli, kuvila ngweno munoobona Mwananhulumyana woNhu eligele kululyi lwoWamasimba, ezha eli pamakole edenga”
65Untebuji unkulwana wakajelula zwimbalo zwizwe, akati, “watuka Mwali. Biya tichinani nobusumikiji? Mwazwiwhila mwoga ngweno kutuka Mwali kwaata. 66Imwi moyeyani nazwo?”
Bakashandula, beti, “Unokwelela lufu!”
67Bakatanga kuumfhila mate kumesho, bakondoba nefayindi. Bamwe bakomakula, 68beti, “Polofita kwatili, iwi Kristo! Ndiani wakuloba biya!”
Pita Unolamba Jesu
(Mako 14:66-72; Luka 22:56-62; Joni 18:15-18,25-27)
69Pita wakabeligele palubazhe. Unshingikaji wakezha kunaiye, akati kwaali, “Naibo wabeli naJesu wokuGalili.”
70Koga iye wakalamba pambeli pabo bose eti, “Anditozwiziba zwaukumuleba.” 71Paakakwenda akalingisa kushubo, umwe wabashingikaji wakombona, akabuja bakabeli pelyo kuti, “Unhu yoyu wabeli naJesu weNazaleta.”
72Iye wakalamba akale ekowha, eti, “Anditounziba unhu yoyu.”
73Mushule mwonshaji unshomanana yabo bakabelimile pelyo bakasendela, bakati kunaPita, “chokomende, ndiwi umwe wabo, tawha nondebelekelo uwo.”
74Ndipo paakatanga kutukana ekowha eti, “Unhu yoyu anditounziba.”
Pakalepo lyakakokoleka igukulume. 75Pita wakava ayeya mawhi akalebwa naJesu okuti, “Unoondilamba katatu, igukulume lisanu lyakokolika.” Iye wakabhuda pazhe akanolila zwineshungu.
Currently Selected:
Mateo 26: LTP
Highlight
Share
Copy
Want to have your highlights saved across all your devices? Sign up or sign in
The word for The World International
