Mishingo 11

Chiwijo chaPita kuGubungano lyokuJelusalemu

1Bapositoli nabanakwaina bakabegala kuJudiya bakawha kuti Bokuzhe bakatambula iwhi lyaMwali. 2Nokudalo Pita paakenda kuJelusalema, yabo begapo lyemhalajo bakanyenyejana naye, 3beti, “Iwi wakendilani kubanhulume basilomhalajwa, akale ukalya nabo?” 4Koga Pita wakatanga akababujisisa munzila ilolonganyika: 5“Ndakaba ndili muguta lyeJopa ndinamata, akale sonhu umulota ndakabona chibono, chinanga uncheka unkulwana udelejwa uva kudenga ukabhatwa mapazu mana, ukezha kwandili. 6Pandakalingisisa, ndakabona imhuka jenyika nezwibanda, namakabi akale nenyuni jinopululuka. 7Ndakawha iwhi liti kwandili, ‘Nyamuka Pita, bulaya akale ulye.’ 8Koga imi ndakati, ‘Ne, Tezi akuna chinhu cheshambwa kana chiloswibha chanuchangwina mundomo mwangu.’ 9Koga iwhi lyakandishandula kabili, liva kudenga liti ‘zwacheneswa naMwali usizwiti zwineshambwa.’ 10Yezwi zwakatikana lutatu, akale zwose zwabwilizwa akale kudenga. 11Noyo unshaji, banhulume batatu bakaswika pengumba pataluba, batumwa kwandili beva kuKesaliya. 12UMpepo wakandibuja kuti ndinde nabo, ndisina lushalulo. Yaba banakwaina bashanu banamwempela naibo bakandipelekeja, akale tikangwina mungumba yonhulume yoyo. 13Iye wakatibuja nokubona kukwe ingilozi ilimile mungumba yiye eti, ‘Tuma umwe kuJopa, enoshoba Simoni unowhi Pita, 14iye unokuzibisa chilayilo chichakuchija iwi nemhuli yiyo yose. 15Pandakatangisa kulebeleka, uMpepo Nchena wakabhulukila pabali, sezwakatikana kwatili pakutanga.’ 16Ndakakumbulukwa mawhi aShe, kuti wakati, ‘Joni wakabhabhatiza nevula koga imwi munoobhabhatizwa noMpepo Nchena.’ 17Kana, Mwali akabapa chipo chimwempela nasu patakadimbwa munaShe Jesu Kristo, imi ndimi aani kuti ndijibise Mwali?” 18Pabakawha yezwi bakawhilijiswa. Ibo bakakuja Mwali beti, “Ngweno Mwali wapa bokuzhe naibo kuti beshandukile kubupenyu.”

Igubungano lyokuAntioki

19Ngweno yabo bakatatauswa nenjabiso yakatikana pezhulu paSitivini, bakenda bakanoswika kuFonisiya akale kuSaipulasi akale nokuAntiyoki, belebeleka iwhi kubaJuda chete. 20Koga pakabeli nabamwe babo, banhulume bokuSaipulasi akale nabokuSayilini pabakaswika kuAntiyoki bakalebeleka nabaGiliki bebhaunula nezwaShe Jesu. 21Luboko lwaShe lwakabeli nabo, akale banhu banji bakadimbwa bakashandukila kunaShe. 22Indebo yeyi yakaswika munzebe jegubungano lyokuJelusalema akale bakatuma Bhanabhasi kuAntiyoki. 23Paakaswika wakabona chipiwo chaMwali, wakashanta akale akabasungwaja kuti begale bakabimbika kunaShe nokuzwipila nomwoyo unsimu; 24nokuti iye wakaba eli unhulume umbuya, uzhele noMpepo Nchena akale nokudimbwa. Banhu banji bakazwibuza kunaShe. 25Nokudalo Bhanabhasi wakenda kuTasusi kunopyanga Saulu, 26paakongwana, wakombuza kuAntiyoki. Kwegole lyose, bakashangana nabegubungano, belayija igapo igulwana, muAntiyoki ndikwo kwakatanga balayijwa kuwhi, maKristo. 27Munayo mazhuba bapolofeti bakenda kuAntiyoki beva kuJelusalema. 28Umwe wabo waluwhi Agabhasi, wakamilika akapolofita, ebujwa noMpepo kuti kunooba nebhamba igulwana munyika jopasi lyose, yezwi zwakatikana mumazhuba obutongi bwaKilaudiyasi. 29Umwe noumwe wabalayijwa wakazwipila, mwaanotubulila, kutumija lubhancho kubanakwaina bakabegala kuJudiya, 30bakazwita yezwi, bakatumila Bhanabhasi naSaulu kuti benozwiswincha kubakulwana.

Currently Selected:

Mishingo 11: LTP

Highlight

Copy