Levime 11
11
Ketyeipuk Mci nah Mcikemak
1RAMPAUBE Moses penai Aaron dage marang eh, pa rang eh cu, 2“Israel minadung dage rang beulo, ‘Nnui kideu ga makaune bam kecudung kakgade kering kaune aidungde tyei lubui. 3Nang makaune keheibe de pe nginglwak pang kepungbe nah tanglit lwe ketyei be tyei lubui. 4Dede makaune kesadung keliet lwe tyei daila dede penui nginglwak pang lama nah cidung au nnui tyei lak zing, makaune ut kenzwadung, kedanemene pe nginglwak pang ma aidungde nnui ziemne mci ma. 5Delwe baktwak de si, kedanemene cide pe za gade pe taktyei de pe mui gage keliet nghang dai eh cide gi tyei dai la kecu ziemne dede penui nginglwak pang ma, aide de n ziemne mci ma. 6Rabbit de si, kedanemene cide pe za gade pe taktyei de pe mui gage keliet nghang dai eh cide gi tyei dai la kecu ziemne dede penui nginglwak pang ma, aide de n ziemne mci ma. 7Hebak, pe nginglwak pang dede keliet nghang lwe tyei lama delwe aide de nnui ziemne mci ma. 8Nnui aidungde tyei sia bi nah penui tsai kedi pumdung tung de so. Aidungde au nnui ziemne mci ma.
9Makaune duidi ga liede mede hereukidung ga liede kelunghdung pe siu nah pe lip kepungbedung nnui tyei lubui. 10Dede ringkebam kaunedung pe siu mede pe lip bam kemakbedung dui kedi ga mede hereukidung ga kelunghdung, nah dui ga mlai kebam leunedung nah dui ga kering kaune kebam leune, nnui cidungde ngkaulu maisia. 11Cidungde ngkau bi maisia delwe nnui cidung tyei siabi, delwe penui ketsai pau de ngkaulu maisia. 12Makaune keheibede dui ga lungh kecudung pe lip nah pe siu pung kemakdung de ngkau lu.
13Nruine aidungde ngkau lumai sia, nah nnui tyei sia bi kedanemene ma aidungde kengkaube kecune, liengumpui, herarui nah herarui ketiakbe, 14liengchikna, nah helie keheibede, 15hegak leune, 16biangkang peki nzwa kepung be nah biangkang mra mtei swet kela be, seagull nah, helie keheibe de. 17Nnui biangkang keceudung nah biangkang dilau de kecudung nah duiruidung, 18biangkang kehabe, biangkang, heka tui ketyei ruine, 19stork, heron keheibe de, hoopoe nah takladung de si eh ngkau lu maisia.
20Makaune pe hesiu keteidung pepi mdai le tet kecudung de nnui ngkau lu. 21Dede makaune lim lu nah pe pi mdai le penui pi hangdeu ga nsaulu keladung nnui tyei lubui. 22Nnui tangrim keheibe de, tingtiakbe pui, tangking, mede tangrimdung tyei lubui. 23Dede makaune pe pi mdai kebamdung lim keladung nnui ngkaulu maisia.
24Nnui aipau kaudung ketsai paau tung dicai nnui tinghegi kecang mci ta dizie. 25Keheibe de makaune ketsai paaudung de tungdi cai pe niadung hetadi maisia nah pa tinghegi kemaktane hera bam dizie. 26Makaune keheibede pe nginglwak pang cang kemak nah tanglit lwe tyeila kemakbe au nnui dade mci ma. Cidungde tung kedi keheibe de mci tadi zie. 27Makaune keheibe de pe pi mdai le tet kecudung kakgade pe pideu le tet kecudung, cidungde nnui ziemne mci ma. Keheibe de cikenzwa ketsai paau tung dicai tinghegi kemaktane mci mene bam dizie. 28Keheibe de makau aidung ketsaipaau pwa kecu tei liecai pe nia heta di maisia nah pa tinghegi kecang mci ta dizie. Aipau kaunedung nnui ziemne mci ma.
29Makaune hangdeu ga bwa kecubedung kakgade aidungde nnui ziemne mci ma: weasel, heza, heratangkune kedibe, 30kaka, tangku, kikwabe, ngietangrine, heratangkune. 31Makaune bwa eh tet keladung kakgade mneu nah lia la kecudung nnui ziemne mci ma. Keheibe de aidungde tsai kedibe tung lie cai tinghegi kecang mci ta dizie. 32Magade aidungde tsai di eh madung gega nghai mie gai dicai cidungde mci ta dizie, tsing, pai, teigeu mede roso paile tei kelubedung liede. Ketakeheibedung liede nah keu keheibe ta tei kecube liede cide dui gage mpung di maisia, aidungde tinghegi kecang mci ta dizie. Iciulude aidungde mci luzie. 33Lidei li mede keheibe ga de mci kemak kaune cak lütdi cai cipau li ga kebam de mci ta dizie delwe, cipau li de tei msiadi maisia. 34Taktyei keheibe tyeilu kerabedung magade cipau li gade dui kai di liecai mci ta dizie. Sak kera keheibe de cipau li ga kebam be mci ta dizie. 35Aipau kaudung ketsai paaudung de nghai mie gai kedidung mci ta dizie; magade cide mimang mede mibung keceube lie de, cide tei kecaidi maisia. Cidungde au mci ma nah n dade de cidungde mci mene bam maisia. 36Duilet mede dui tekwa dui twak kera mci bam lubui; dede keheibe de cika kebam ketsai kaudung tung kecume mci ta dizie. 37Magade ma leuh ling kerabedung reu ga chak mie lwa di liede ma leuh cidungde au mci bam zie. 38Dede magade ma leuh gage dui tei hwa di lie cai nah makaune pau pereu ga chak mie lwa dicai aidungde mci ta dizie.
39Nnui tyei zie lie bam kecu makaune tsai di lie cai, tsaidi kecu paude keheibe de tung dicai tinghegi kecang cipau de mci ta dizie. 40Keheibe de tsai di kecu kaude teih tyeilu cai pe nia heta di maisia nah pa tinghegi kecang mci ta dizie. Keheibede makaune ketsai pau de pwa cai pe nia heta di maisia nah pa tinghegi kecang mci ta dizie. 41Makaune keheibede hangdeu ga bwala kecudung de ngkau lu maisia, nah cidungde tyei siabi. 42Keheibe kau pe za le lia kecudung, nah keheibe kau pe pi mdai le tet kecudung mede pe pi kekiee ge bam cai makauna hangdeu lia tet kecudung nnui aidungde tyei sia bi kedanemene ma aidungde ngkaulu maisia. 43Nnui kering kaune lia delwe mneu la kecube, cidungde le nnuide tei hera diso, iciu eh nnui heradi melu kerane. 44Kedanemene Ih au RAMPAUBE n Tinggwang nkatei ncu kai mci pwa bam lu zie, ciziemne, mci bam lu, kedanemene Ih au mcilu. Nkatei ncu peu makauna keheibe hangdeu ga mlai keladung de peu tei hera diso. 45Kedanemene Ih au RAMPAUBE, nnuide Egypt gade nzang mpet kebeube nnui Tinggwang teilu kerane. Ciziemne nnui mci maisia kedanemene Ih au mcilu.
46Hezai aide au makaunedung ziemne, nruinedung, kering kaune dui ga mlai keladung lia nah hangdeu ga keheibe kaune bwa keladung ziemne, 47ainie mci kemak nah kencibe keu ntsam lu kerane nah kering kaunedung tyeilu kebui nah kering kaune tyei gai kelakbedung.’”
Currently Selected:
Levime 11: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
