Levime 1
1
Keru Reca
1RAMPAUBE Moses de qugai nah kangbau kebam paiki gade pe dage ranggai, 2“Israelme minadung dage marang gai lo nah penuide rang beulo, ‘Mi keheibe de nnui kak gade reca RAMPAUBE dage keugwang kecudau, nnui gu reca nnui gu kaunedung gade ket keugwang lu, hetum hau gade mede meurün hau gade.
3Magade pegu reca cide keru reca hetum hau gade cai, pa peseu zamra mezing cube peu maisia. Pa cide kangbau kebam paiki gu kimui gade peu maisia, cinzwa lude RAMPAUBE dwa gade cide luulu bui. 4Pa keru reca peu gage peba hwa gai zie, nah cipau cai pe nding gade cide luulu eh pekatei pe ziemne kemau gilu kera ta tei luzie. 5Cipaucai pa RAMPAUBE dwa gade hetumseu de gitset maisia. Aaron napeime cingkumedung, paiki kimui gade recabam gage hejai pwa kezin gai zie. 6Cipaucai pa keru reca cide pegeu gau zie delwe cide dim kecai luzie. 7Cipaucai cingkupei Aaron napeimedung reca bam gage mi twa gai zie nah mi ga tsing kebam de keu petau gage kai luzie. 8Cipau cai Aaron napeimedung cingkumedung, ne dim kecai keludung pebam gage kai luzie, pepeu nah peca si eh, tsing mi ga kebam reu ga reca bam reu gage. 9Dede pe lungnetdung nah pe pidung pa dui le huidi maisia. Cipaucai cingkube ne recabam gage keru reca pelane ru gai beu zie. Cide a ziemene perim kehengui pwa peu zie; cide au a dage mi gade reca tei gai kebeu ge. 10Magade keru reca ziemne pegu reca hekaune hau gade, meurün ge mede hemeu ge, pa peseu zamra kemakbe pwapeu maisia. 11Pa cide recabam tingpeule leu de RAMPAUBE dwa gade gitset maisia. Aaron napeime, cingkumedung ne cipau jai de recabam pembie pelane gage kezin gai zie. 12Pa cide dim kecai luzie pepeu nah peca de si eh, nah cingkube ne dim kecai keludung recabam gage mi ga kebam tsing reu gage kailu maisia, 13dede pe lungnetdung nah pe pidung pa dui le hui maisia. Cipaucai cingkube ne cipau pelane pwapeu zie, nah cide recabam gage ru dizie. Cide au keru reca ge eh, nah cide au RAMPAUBE ziemne perim kehengui ge peu zie, cide au pe dage mi le keru reca tei kegai ge zie.
14Magade pa RAMPAUBE dage nruinedung keru reca pe mapeu kepeu cide nruinedung gu keru reca cai, pa pe reca cide tamhau mede repuine nage keu gwang maisia. 15Cingkube ne cide recabam gage keugwang maisia, pe peu keriak dizie, nah recabam gage cide ru zie. Cipau cai pezai cide reca bam gu pembie gage lwa gai maisia. 16Pa pe mbi nah pelung ga kebam dung keumpet dizie, nah kelienpwa recabam gu tingnaimiak kepetle ge kai nzeu dizie, mimang bütdung kekai bam gage. 17Pa pe hesiudung gade cide teurak maisia, dede pa cide zi kena tei di kera be ma cipau cai cingkube ne cide recabam gage ru luzie, mi ga tsing kebam gage. Cide au keru reca ge zie, nah cide RAMPAUBE ziemne perim hengui keyi ge zie; cide au reca mi gade pe dage tei kegai ge.
Currently Selected:
Levime 1: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
