Tetkempet 40
40
Paiki kelim
1Cidau Rampaube Moses dage rangdi, 2“Mmi keheci hekeizie raitu benai nang recapaiki de limlu maisia, kengkwa paiki de. 3Cika ge zierang samkakbung de kailu maisia nah nang cipau dwa gage kehezupai le samkakbung de limlu maisia. 4Table de pwa nlütlu maisia nah maniadung cipau reu gage kailu. Pecai nang mitaubungbam de pwa nlütlu cipau reu gage mitaubungdung kailu maisia. 5Nang samkakbung dwa gage mariem kehengui ru kerane kecak recabamde kailu, nah nang recapaiki kimui gage kehezupai limlu. 6Nang reca rugai kerane recabam de recapaiki kimui dwa gage kailu, kengkwa kera paiki. 7Nang kengkwa paiki penai recabam kakgage batiakkwak kedi de kailu delwe nang cide gage dui kailu. 8Nang cide kigu tei twagwalu maisia, delwe nang kigu kimui gage kehezupai limlu. 9Nang keheniak ca de keulu delwe recapaiki ga kebam maniadung pelane maca le keniaklu. Nang mania pelane cide a dage teimci gailu maisia; iciude cide mci luzie. 10Nang recabam nah pe netdung pelane keru ratak ziemne keniaklu maisia. Nang recabam de tei ntsamlwe acu peulu maisia iciude a dade cide mci gidi zie. 11Nang hetageu batiakkwak nah pe singkam de keniaklu delwe a ziemne keuntsam lu maisia. 12Cipaucai nang Aaron nah pe name de kengkwa paiki kimui ga ngngwa gwanglu, delwe nang penuide duile hui dilu. 13Nang Aaron depeu a ziemne keuntsam kelu paini de teulu, pecu keniaklu, delwe pecu tei mcilu ciu eh pa cingku ta tei eh a gwa teilu kerane. 14Nang pe name de ngngwa gwanglu delwe penuide peu kemci ncwadung de ncwalu. 15Nang penuide keniaklu maisia, nnui penui pei de keniak kelunzwa eh ciu eh penui cingkume tei eh a gwa teilu kerane. Penui keheniak aide ne penuide peu cingkume tei lamui luzie penui leuhme ceheu pelane ga.” 16Moses aide teilu; RAMPAUBE pecu rangkebeu leune pa nzuilu. Pa ma aidung pelane teilu.
17Cine penui paiki de lim cuhlu, mmi pe kena bekum kei raitube zie raitu benai penui Egypt gi kedicai. 18Moses recapaiki de lim cuhlu, pe singkam de kamlu pe bam gage, pe ra ralu, pe hekingdung keulu, nah pe tsiadung sumlu. 19Pa paiki reu gage pe cum le gumlu, delwe cipau reu gage hegwa gum de kailu, RAMPAUBE Moses de aja kebeunzwa. 20Cipaucai pa samkakkelu hezaidung de pwalu delwe paiki gage kailu. Pa samkakbung ringgoidung gage pe pakdung kailu delwe pe gum gumlu. 21Pa samkakbung de recapaiki gage pwa nlütlu. Pa kehezupai le samkakbung de lim kaplu cide sunglu kerane, Rampaube pecu aja kai kebeunzwa. 22Cipaucai, Moses kengkwa paiki gage table de kailu, pe lungki pai lim kenzeu gwale, kemci ni nreule mbie gage. 23Pa tangku de pe rehi tei eh Rampaube dwaga table de gage kailu, Rampaube pecu rangkebeu nzwa. 24Pecai pa mitaubung bam kengkwa paiki gage kailu, table de gade, recapaiki tingbangle tuga. 25RAMPAUBE dwade cikade pa mitaubung mtaulu, RAMPAUBE rangkebeu nzwa. 26Pa kehengui kecak recabam de kengkwa paiki gage kailu, kehezupai lim kenzeu dwa gage. 27Pa marim kehengui ca de rugai, Rampaube pecu aja kai kebeunzwa. 28Pa recapaiki kimuiki gage kehezupai de limlu. 29Pa keru ratak ziemne recabam de paiki kimuiki dwa gage kailu, kengkwa paiki ga. Pa cipau reu gage keru reca penai mei reca ratak teigai beu, Rampaube pecu aja kai kebeunzwa. 30Pa batiak kwak de paiki penai recabam kakgage kailu delwe pa hui kerane cikage dui kailu. 31Moses, Aaron nah pe name penui ba nah penui pidung cikade hui dila. 32Penui kengkwa paiki ga kelütdau nah penui recabam ga kegwangdau. Penui katei penuide hui mcilu. RAMPAUBE Moses de aja kebeunzwa. 33Moses recapaiki nah recabam de rie twagwalu nah kehezupai de kigu kimuiki gage limlu. Ainzwa eh, Moses heta pelane tei canglu.
RAMPAUBE kemdu
34Pecai hemwa ne kengkwa paiki de gumlu, nah RAMPAUBE kendu dene paiki puidi. 35Moses kengkwa paiki ga lüt gailak di kedanemene hemwa ne cide gum kelune nah RAMPAUBE kendu dene recapaiki de teipui kedi ziemne. 36Israelme hemwa de recapaiki reu gade cuh kedi daune, Israel minadung penui hebeuh ketei ga tetpet dila. 37Dede magade recapaiki gade hemwa gahdi mecai, cidau minadung ramzeuki gade mlai lama. Hemwa de teucuh kemaktane penui cika bamla. 38Israelme pelane hebeuh tei kelatane, RAMPAUBE hemwa de tingna ting pelane recapaiki reuga bamla, nah tingmui ting pelane pe miheu de cipau reuga bamla.
Currently Selected:
Tetkempet 40: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
