Tetkempet 32
32
Kecak tumna
1Minadung Moses lamlwatu gade nghung riham kedi ngau kegai dau, penui ncüt lwe Aaron de twagwalu nah pe dage rangdi, “Gwanglu, anuide herabe mie ge teibeu lo cide de peu anui dwa tet kerane. Aipau Moses de ziemne au, Egypt deu gade anuide ngngwa mpet kebeube de, pecu daipai teidi bi anui ci meda.” 2Cine Aaron penui dage rangdi, “Kecak nli teu kela nnui nau nlidung nah nnui napeimedung nah napuimedung nlidung keu mpetlu, delwe cidung a da teu gwanglu.” 3Mina pelane kecak nlidung penui kwendung ga kebam gade keu mpetlwe cidung Aaron da teu gwangbeu. 4Pa kecak penui ba gade keulu nah cide perehi gage tei suilu nah pa herabe mie hetum rehi gage teilu. Pecai penui hangge ge dage rangdi, “Aidungde nnui rabedung, Israel, Egyptme deu gade nnuide ngngwa mpet kebeu be.” 5Aaron aide ngau keludau, pa recabam ge hetum dwa gage teilu eh pa rang mdugai: “Ncünne RAMPAUBE de twa kera hengyi ge bam zie.” 6Minadung pecai benai tingcang nuge cuhlu nah keru ratak teigai nah kangbau recadung teugwang. Iciu eh penui bam lwe tyei nah sak, nah pecai sak kemie kezeu gai kelak ngyi ge cuhdi.
7Pecai RAMPAUBE Moses de mpau, “Gwang nzet cu, n minadung ziemne, nangne Egyptme deu gade ngngwa kempetmedung, penui katei kesia ta teibam dida. 8Ih nnui dage sam kai kebeu lampui de penui gi zette dida. Penui herabe mie hetum rehi gage teilu nah cide reca di nah cide de ratak teibeu. Penui hangge ge dage rangdi, ‘Aidungde n rabedung, Israel, Egyptme deu gade nnuide ngngwa mpet kebeu be.’” 9Pecai RAMPAUBE Moses dage rangdi, “Ih aipau minadung de ngauda. Pielo, penui au pelung ketak minadung ge lie. 10Cu au, acu kam kera teiso. Penuide a rata süt dizie, cine Ih penuide ngkap dizie. Pecai Ih n dade heleuh kedi ge tei beuzie.” 11Dede Moses RAMPAUBE pe Tinggwang de teilu kebui tane kam bam. Pa rangdi, “RAMPAUBO, daitei n minadung de n rata lano, nang Egyptme deu gade n kengkieng kedi le nah n ba kengkieng le ngngwa mpet kelume de? 12Egyptmedung, ‘Pa penuide kemau lungcet gade nzang mpet, penuide lamlwatu gade teitsetdi kera nah kideu miakngau gade penuide ngkapzing di kerane?’ de eh daitei rang ra no. N rata gade nreulu nah n mina de saja peu kera aide gade caili beulo. 13Nsung gailo n kilame, Abraham nah Isaac nah Israel de, penui dage n katei n sampet eh penui dage rangdi, ‘Ih nnui leuhmedung teipwa tinggimdung ga hegidung kieege teibeu zie, nah Ih hangdeu aidung pelane nnui leuhmedung de peu zielie Ih rang kebeu de. Kelungta penui cide gum luzie.’” 14Pecai RAMPAUBE pe minadung de tei keherei kera pa rang kegai de gade cailidi.
15Pecai Moses lamlwatu gade nreu caili eh nghung di, samkakkelu hezai tangtsu kwak kena de pe ba gage pwalwe. Tangtsu kwak de kena lam de raupwa bam, pe dwa le nah pecai le de. 16Tangtsu kwak kena de Tinggwang pekatei pe bata, nah kerau de Tinggwang katei rau, tangtsu kwak gage pekau raugai. 17Joshua minadung ma sahgai kecu kwa siulu ge, pa Moses dage rangdi, “Ramzeuki cika keregi kecu kwa siu.” 18Dede Moses rangdi,
“Cide au ngkieng kelu kwa ma,
nah minadung de ngam kedi kwa de ma,
dede lei ketei kwa Ih siu.”
19Moses ramzeuki ga gwang nna kecudau, pa hetum nah minadung helim lim kebam ngaulu. Pa pe rata sütdi. Pa pe ba ga tangtsu kwak kena kela de lamlwatu pi gage kelien mpet gai nah ci kena de teipang di. 20Pa mina ne tei kelu hetumseu de keulu, cide rudi, cide tei hecaira dedi, nah cide dui gage rui gailu. Delwe Israelmedung de peu cide sak kera pa teigai.
21Pecai Moses Aaron dage rangdi, “Mina aidungde n dage daipai teigai no, ciu eh nang penui dage kemau kedi aikenzwa teugwang kebeu?” 22Aaron rangdi, “N rata peu heu diso, a mpaube. Nang mina aidungde de cibam, penui dai kenzwa ge kemau tei neu labi. 23Penui a dage rangdi, ‘Anui dwa tet kerane anuide herabe tei beulo. Aipau Moses de ziemne au, Egypt deu gade anuide ngngwa mpet kebeube de, pecu daipai teidi bi anui ci meda.’ 24Cine Ih penui dage rangdi, ‘Caugame kecak bambi, penuide peu cide keu mpet lulo beu.’ Penui kecak pwa acu peu nah Ih cide mi gage keliengai, nah hetum aide mpetlu.”
25Minadung pakpwa eh kezeulu kemak Moses ngaulu (Aaron penuide kezeulu kemak ziemne, penui ngauraumedung de peu penuide henui teidi). 26Pecai Moses ramzeuki kimui ga saplwe rangdi, “Caugamme RAMPAUBE kilam bie kerame, a da gwanglu.” Levime pelane pecu twagwalu. 27Moses penui dage rangdi, “RAMPAUBE Israel Tinggwang, aide rang: ‘Peu mige ge kecu de pe kingtie pwalu nah ramzeuki tu ge gade tu ge ga mpet nah nlütlu, nah pe sinabe, pe zangnabe nah pe kidabe de teitsetdi lu.’” 28Moses daipai rangbeubi Levime teilu. Cipaunai mina cang cum kenzwa ge tsaidi. 29Moses Levime dage rangdi, “Nnuide henai RAMPAUBE tagwa tei kera kailu da, nnui mige ge kecu nnui name nah nnui sinabe dage hetatei mmau kegaine, cine RAMPAUBE henai pe samlam nnuide peu lubui da.”
30Pecai benai Moses minadung dage rangdi, “Nnui kemau kedi ge tei dida. Ih cu lamlwa ga RAMPAUBE da hang zie. Nnui mau de tei mcilu kera Ih tei kerane.” 31Moses RAMPAUBE da cailigwang nah kekietei, “Oh, mina aidungde kemau kedi ge tei dida nah penui katei kecak le herabe teilu. 32Dede cu, ngaunggia eh penui mau gibeu lo; dede magade nang teigai lak dicai, nang laisiukwak rauteu kela gade a zi kemai dilo.” 33RAMPAUBE Moses dage rangdi, “Caugamme a dage kemau teigai bi, Ih cipaume de a laisiukwak gade pe zi keu mpet dizie. 34Cine cu miecu, Ih n dage rang kebeu heni ga minadung de nzang gwanglu. Pielo, a tinggimgwabe n dwaga nzang lazie. Dede cipaunai Ih penui de saja peu zie, Ih penui mau ziemne saja peu zie.” 35RAMPAUBE minadung dage mateei ge langgai kedanemene Aaron tei kegai de, penui hetum tei kecune.
Currently Selected:
Tetkempet 32: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
