Tetkempet 23
23
Kenzuibe nah ngaugia zaidung
1Nang mi keheige ha kemret sam rangso. Nnui kemret zierang tei eh mina kesaime de nzang so. 2Nnui makesia tei kerane hemaa be caisui so, mede nnui hemaa be lam sui eh ma kemzuibe rang nggah kecu zierang teiso. 3Nnui kegahme ge tutiak kecu dau heneu herüt teiso. 4Nang n ngauraube tumseu mede pe gada lampui gade pakla eh ngaucai, nang gwa cailigwang pecu peulu maisia. 5Magade ncu ngaurau kelame kangge gu gada pe pwet pung tetgai lak eh hangdeu ga kaumie kebam nang ngaucai, nang mina cipaude de pütdi kerabe ma. Nang pecu ngha bi maisia pe gada de peu cuh dailu kerane. 6Kegahme ge tutiak bamga kegwangdau pe nzeu mlai diso. 7Kemret eh mide kemmau ta keteime de ngngwa hemaa so, nah mau kemakme de mede masang kelame de teitset so, kedanemene Ih pe zai kesiame de au mpüt lak. 8Madaude hetauhenim lu so, kedanemene hetauhenim au mina miak teiciet dila, nah makesangme samdung teikebwak dila. 9Nang sangme de teikeherei so, nnui sangme teilung zai ci kebamne, kedanemene nnuide Egyptme deuga sangme ge tei eh lungh. 10Mmi herok ge ziemne nang n deu gage heleuh gi gaizie nah cika lungh kebeube hekwa luzie. 11Dede nang mmi hena bekum cide puh mene peu pelui bamlu, iciude nnui kakga mina kegahme tyeilu kerane. Penui gi kegaide, renaamkaune tyei luzie. Nnui gu kubeluh nah olive luhdung de nnui cinzwa tei luzie. 12Lang herokne ting ga nnui ta teizie, dede lang henane benai nnui mtaklu maisia. Ainzwa teilu iciude nnui tumseu nah nnui gadadung kemtak ngau lubui, nah iciude nnui kilapui napei nah sangme keheibede mtaklu nah penuide teimcang lu kerane. 13Ih nnui dage rangkebeu dungde kingnei siak delu. Hera keda zidung rang mdu so, mede peu n mui gade cidungde zi kerang de suiso.
Tingkum ramsang ngyidung kecum
14Nang mmi ramsang piacum acu kerüt peu eh hengyi lu.#23:14 Tet. 34:18-23, Hez. 16:1-17 15Nnui Cehi Kaikemak Tangku Ngyi mnei lu. Ih nnui dage rang kebeu nzwa, nnui tsehi kai kemak tangku lang henane tei zie. Cipau ting ga, Aviv bekei#23:15 Aviv bekei Hebrewme tingkum ria gade peicai aide ndui (Mar) nah kezing (Aprl) da. nnui a dwaga ge liazie, ainzwa kerane peting aide riem pwabam. Aipau kei dega nnui Egypt gade mpetlu. Dede nnui ba mta eh a dwaga nnuide lia so. 16Nnui Luhlüt Ngyi de hengyilu maisia, nnui nnui luhdung gade petsi raitube luhlüt kecudau. Iciu eh pe mmi cang gwang de Kehekwa Ngyi hengyilu maisia, nnui nnui luhdung gade luhlüt hekwa kecudau. 17Nnuida kebam mipei pelane mmi ramsang piacum RAMPAUBE Tinggwang dwaga gwang maisia. 18Nnui hejai pwa a dage ratak tei kebeudau cehi kekai tangku pwa acu reca so. A dage hengyi ratak teikegai maca tingmui gade tingcang kecang kaizeu so. 19Nnui deu gade luhlüt kelu raitube nah yitube a kiga teu gwanglu maisia, RAMPAUBE nnui Tinggwang ki ga. Nang hemeuna de pepui tungdui ga kebamdau cide lang kerabe ma.
Lampui telei kera Tinggwang samgwabe
20Nnui lampui ga nnui dwa kwa kera tinggimgwabe de Ih nnui dage langgai beuzie, nah Ih heni mteipwa kebam gage nnuide ngngwa gwanglu kera. 21Pe kwa kingneilu nah pe sam mzailu. Pe rata teiso, kedanemene pa nang gikahkedi mau au gibeu laklu. Ih ne pecu langgai dilu.#23:21 Ih ne pecu langgai dilu. a zi peda la. 22Nang pe samdung mzai kesanglu liecai nah Ih rang kebeube leune de tei lucai, ciucai Ih n ngauraumedung ngauraube tei dizie nah nang reniakelame de renia zie. 23A tinggimgwabe nnui dwaswa rai eh nnuide Amoritme, Hittitme, Perizzitme, Canaanme, Hivitme, nah Jebusitme da ngngwa gwang beuzie. Ih penuide ngkap zing dizie. 24Nnui penui rabedung da keumie so, penuide reca deso, mede penui tei keladung nzwa teiso. Meliene, nnui penuide ngkap zing dilu nah penui tsusumdung tei kecai dilu. 25Nnui RAMPAUBE nnui Tinggwang de recalu maisia, iciu de, pa ngu tangku nah dui samlam beuzie. Ih mateei leune nnui kakgade keu kezia beuzie. 26Nnui deuga mipui nagah puime depeu pe na kei dilak. Ih nnuide teilung ketie peuzie. 27Nnui mie kera deuga acu hing kera kaigai beuzie. Nnui mina kedau leune de Ih teitset dizie. Ih peu nnui ngauraume pelane de peu nnuide hing eh penui nreutet dizie. 28Nnui dwaswa ga Ih tangkuidung langgai beuzie iciu eh Hivitme, Canaanme, nah Hittitme de nnui dwa gade gwampet dizie. 29Ih penuide nnui dwa gade mmi ge lung gage gwampet dilak, iciugai cai hangdeu be gidi zielu, nah teikuudung nnui ziemne kieeham dizie. 30Meliene, Ih penuide kecamna gege eh nnui dwa gade gwampet dizie nnui lungh hinglu eh hangdeu de gumlu kemaktane. 31Ih nnui deuraidung Jaaidi Kegie gade Philistinme Jaaidi kecangh gage kai beuzie, nah hetaideu gade Euphrate Kereuki kecang. Hangdeu cika lungh kebamme reu ngkienglu kera Ih nnuide peuzie. Nnui penuide nnui dwa gade gwampet dizie. 32Nnui penuide ngngwa eh nah penui rabedung de ngngwa eh samkak gede teidi kerabe ma. 33Penuide peu nnui deuga lungh kerabe ma, mecai penui nnuide teipwa a dage kemau teigai zie. Nnui penui rabedung de reca cai, aide au nnui ziemne hebaih ge bizie da.
Currently Selected:
Tetkempet 23: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
