Lamentations 2
2
Kulatuliwa kwa Yelusalemu
1Kwa maya vaki Bambu Chapanga kavagubika vandu va Sayuni muchisi,
chivayidumbila Isilaeli kachidanga pamlima.
Lijuva lya maya vaki kayidangila kutali hata Nyumba yaki ya kudadavila.
2Ngajila lusungu Bambu Chapanga kasidanganyisha kaya shonda sha Yakobu.
Kwa maya vaki kabowola viwu sha vandu va Yuda.
Wutwa wawu na vatwa vakamuliwi na soni.
3Kaliwisha liwovi lyonda lya Isilaeli, pakalalili.
Kaleka kuvatanga Vayisilaeli pavatang'anili na fimdwama vawu.
Amdanganyishili Yakobu kucha motu mkali, aweshili kuyananga kila chindu.
4Kakwegha msali waki kucha chimdwama, na liwoku lyaki lya mlilu liva ndemindemi.
Kucha wula chimdwama kavawulagha valulumi vonda yitwivayidumbileyi.
Atukalalili munu kwa yufwi kava kucha motu.
5Bambu Chapanga kava kucha chimdwama,
Nyumba shaki shosi kasibowola na viwu shaki kasibowola.
Kavayongishela vandu va Yuda fivembu na dadawu.
6Nyumba yaki yitumdadavila kayibowola kucha chidimilu muchiwunga.
Bambu kamgola Sayuni ayivasughi mihungu na majuva va Kupumulila aku Yuda.
Kwa maya vaki makomi avalemili vatwa na vatambika.
7Bambu Chapanga kayibedala fyalu yaki na Nyumba yaki ya kudadavila kayileka.
Viwu sha nyumba sha kumbwani kavalekela vafimdwama vabowoli.
Vavika chowu amu munyumba ya Chapanga kucha chowu cha chipindi cha lihungu.
8Bambu Chapanga akayilateyi kubowola luviwu lwa mbwani ya Sayuni,
alingili ili abowulili kila ligonguveli mba amalili.
findangawala fya migonguveli na viwu sha panji kasigola shosi sidanganyiki.
9Malawu vaki vavakotosha, mikolukolu yaki ya myuma yibenangiwa benangiwa.
Mutwa na vakomi vaki vava kuluhamila gati ya milima.
Vakulongushiwa kandi ha na ngayiku, na vambuyi vaki vakupata kandi ha milotu kufuma kwa Chapanga.
10Vavaha va Yelusalemu vayikala jii,
vayibunga lifu kumutwi na kufwala milobota kulangusha lung'ong'u.
Na vakavali vagondamisha mitwi yawu.
11Kalila mbaka mesu vaki vatupa, ndima yangu yigilimbuka.
Ndima yangi yiva na lung'ong'u nendu kwanongwa vandu vangu vakudanganyishwa.
Kwanongwa vana vadokwa vakusova mumbalimbali ya deha sha mbwani kwanongwa vavahela filivi.
12Kwanongwa ya njala vakuvalilila vamavawu,
kunu pavashulula kucha vandu yivagobulekili mudeha sha mbwani,
na kunu pavafwila mumawoku va vamavawu.
13Ndikuwombeli liki yuwi Yelusalemu? Ukwifana na ghani yuwi Yelusalemu?
Kwifwana na ghani ili wuvi na seku, yina yuwi mbwani yiwuvelili nyanyi.
Njifwa shaku sitangala kucha bahali, ghani yawesha kukulowola.
14Vambuyi vaku vakugubutulilili ha milotu yaku
na vakuwombilili lipala ha uvifyi waku ili uleki wafu waku,
tepu vakulotilili milotu ya ufyangu na yingajila unakaka.
15Yivapita mudeha vakukubedala na kukuyovishela yuwi Yelusalemu,
Vakutikanya mitwi yawu kwa mbedalu na kudeta,
“Wuli, ayi ndi yila mbwani yivayilili pitu mbwani shosi kwa uvayisi?”
16Vafimdwama vaku vosi vakukuyovishela, vakukuchefula na kukuwonela maya,
kunu pavadeta? “Ayu tumdanganyisha!
Lijuva litulivetili lifika na tuliwona!”
17Bambu Chapanga kagola fila fyayilatili,
chayilatili pakwandi kadanganyisha ngajila lusungu,
kavagola vafimdwama vasekileli kulatuliwa kwawu,
kavakwisha vangandawu valulumi va vafimdwama vaku.
18Vandu va Sayuni vakumlilila Bambu,
pamusi na pamihi misosi yikwitika kucha lweni,
kulila na kudadava ngajila kupumula!
19Pamihi posi yimuki kandi na kandi kumlilila Bambu,
Mviki lipala Bambu yifivelili mundima yaku na wumluvi akutangi.
Holoshi mawoku vaku kumbindi dadavili vana vaku,
vana yivashulula na njala poposi mudeha.
20Yuwi Bambu Chapanga wiholi,
Wuli, kuna yoyosi kumgolela ngimu wutugolili yufwi?
Hata vala vamawu va vala vana vawu?
Wuli, hata vatambika vawulayiwi munyumba yaku?
21Fikongu fya fijana na vavaha fiwonja mulifu mudeha,
Vasongolu na vakavali vangu vawulayiwa kwa lipanga.
Vawulayiwa ngajila lusungu lijuva lya maya vaku.
22Kuvalalika kulihungu vafimdwama vangu, yivagombili kila mwambu,
lijuva lya maya vaku yuwi Bambu kwahela yanyelepukili awu kunana.
Vala yindivalelili mbaka vakula vafimdwama vangu vavadanganyisha.
Currently Selected:
Lamentations 2: OTNdambBL
Highlight
Share
Copy
Want to have your highlights saved across all your devices? Sign up or sign in
The Old Testament in Ndamba @The Word for The World International and Ndamba Language translation. All rights reserved.
