Lamentations 1
1
Lung'ong'u kwa vandu va Yelusalemu
1Filoja kwa mbwani yimemili vandu,
ponopawu yivahela vandu!
Yaveli yimanyika gati ya milima,
ponopa yiva kucha ngalimlyangu.
Yavelili kucha muhumbu gati ya mbwani,
ponopawu yiva mvanda.
2Pamihi posi, ukulila kwa lihingili, misosi yikumwayika.
Kwahela hata yumu gati yawu yawutamili na yawujangijangili.
Vaghanja vaki vonda vawushengeta, vava fimdwama vaki.
3Vandu va Yuda vayenda kuluhamila vakugobuleka kwa uvanda.
ponopa vakwikala na vandu va milima yingi,
lakini vakupata ha mahali pa kupumulila vosi yivamsakeyi vavakamula pavava mugobuleku.
4Deha yisilola Siyoni sikung'ong'uteka, nongwa kwahela mundu yapita kuyenda kulihungu,
kwahela chindu mumilyangu ya Siyoni, vatambika vaki vakulila kwa lung'ong'u,
vakavali vaki vakung'ong'uteka na mbwani yeni yiva mulung'ong'u.
5Vafimdwama vaki ndi yivavatavala na ndi yivafwamuka.
Bambu Chapanga kawutesha kwanongwa ya uvifyi wawu.
Vana vaki vakamuliwa na kuyeghiwa kutali.
6Vandu va Sayuni seku yawu yosi yiwuka,
vakomi vaki vava kucha sheshi yapota pandilu,
kunu vava vasosuvavfu vavatuvili vafimdwama vawu.
7Mumajuva vaki va gobuleku na kuyuvatika,
Yelusalemu vava na ngumbungumbu na sanja hela vandu vaki pavakamuliweyi na vafi.
Pawukamuliwili na fimdwama vaki, kwahela wa kuvatanga.
Vala yivavaweshili vaki vasekilelili gobuleku yawu.
8Yelusalemu yagolili wafu mkomi, vadayiliwili ha kwanongwa ya sambi shawu.
Vonda yivavelili vakuwujuma, ponopa vakuwubedala nongwa yikuwoneka chiloja.
Veni vakulila kwa lung'ong'u na kwififa.
9Wafu wawu wawonikili lipala lakini veni vavelili na hoshu ha na mbelu yawu.
Kuwa kwaki kwavelili kukomi munu, kwahela mundu yaweshili kuwujangajanga.
Yuwi Bambu Chapanga loli gobuleku yangu nongwa vafimdwama vangu vangwesha.
10Vafimdwama vaholola mawoku vawu, vapoka findu fyosi fitalamili.
Kavawona vangutungu va Vayawudi vakwingia munyumba yaku,
vandu vala Bambu Chapanga yavakanili kwilumba na vandu vaki.
11Vandu va Yelusalemu vakuyeleja kusaka filivi.
Vakutawula findu fyawu yifitalamili ili vayendileli kwikala.
“Yuwi Bambu uloli ndambu wuubedaliwa.”
12“Munoli nenga!” Yumwi yimupita mudeha, wuli mukuyihola chindu ng'odu.
Loli! kwahela yagobuleka mundima kucha nenga,
gobuleku kanyeghela Bambu Chapanga lijuva lya maya vaki vakalipili.
13“Asunushili motu kufuma kumbindi, unungusha mbaka mumingendewu yangu.
Kandeghela lwafu kang'omesha, pambeli kang'uyisha kumbeli,
kaneka mkiva hela na msosuvafu pamusi posi.”
14“Kasivalanga sambi shyangu shosi na kukungasha mahali pamu.
Kawopa mungulu yangu kucha ng'oyi, kawusha liwovi lyangu.
Bambu Chapanga kagola ngamuliwina vandu yindivalemwa kuvatova.”
15“Bambu Chapanga avalemili vangandawu vangu yivadima.
Alayishili vamachonda vang'ulayi nenga.
Vamatangi nga wuvavatanga misabibu Bambu kavadanganyisha vandu vosi va Yuda.”
16“Kwanongwa ayi ngulila, mesu vangu vakusulula misosi.
Ndivahela mundu yansikisha, kwahela yajangajanga.
Vana vangu vakiva, nongwa chimdwama wangu kangwesha.”
17“Nguwolosha mawoku kumbindi lakini kwahela yandanga.
Bambu Chapanga kavika amuli kwilata nenga Yakobu vajovi vangu vavi vafimdwama vangu.
Yina nenga Yelusalemu ndiva mwafu gati yawu.”
18“Lakini Bambu Chapanga kava telatela nongwa bedala ngayiku yaki.
Mumbikanishi nenga yumwi vandu vosi, mloli gobuleku yangu.
Vasongolu vangu na vakavali vangu vakamuliwa vayeghiwa kuluhamila.”
19“Ndavakemili vala vaghanja vangu lakini veni vanshengeta.
Vatambika na vavaha vangu vafwila kumbwani pavasaka filivi,
ili vaweshi kunana na kuva na liwovi.”
20“Loli yuwi Bambu Chapanga ndambu wugobuleka!
Ndima yangu yikung'ong'oteka nongwa ndikuvifya.
Aku panji kumema gobuleku na munyumba kuna njifwa.”
21“Vandu vapikana panila kwa lung'ong'u, kwahela yangola mawoku.
Vafimdwama vangu vosi vapikana gobuleku yangu.
Vakusekilela nongwa kunyeghela danganyishu.
Lila lijuva liwujangili dawuliyeghi, wuliyeghi ili vavi kucha nenga.”
22“Uvagoleli kucha uvifyi wawu wosi.
Uvagoboli kucha wugobolagha nenga kwanongwa ya uvifyi wangu wosi.
Ngung'ong'uteka kwanongwa ya kugobuleka na ndima yangu yikushulula.”
Currently Selected:
Lamentations 1: OTNdambBL
Highlight
Share
Copy
Want to have your highlights saved across all your devices? Sign up or sign in
The Old Testament in Ndamba @The Word for The World International and Ndamba Language translation. All rights reserved.
