Esther (Hebrew) 4
4
Modikayi akuluva utangi wa Esta
1Modikayi pamanyili fyonda yifibwitukili asatangili yingwa shaki, afwalili lilobotu na kwibunga lifu. Pambeli apitili gati ya mbwani kunu palila kwa lishu likomi kwa lung'ong'u. 2Ayendili mbaka pamlyangu wa nyumba ya mutwa, lakini aweshili ha kwingila, nongwa kwahela yawesha kwingila kunu kafwala lilobotu. 3Mumikoa yonda lilawu lya mutwa kulifikili, kwavelili na chivembu chikomi gati ya Vayawudi vayikaja kulya valila na kudadava kwa Chapanga avatanngi vandu vatangalili vaghalafukili mulifi kunu vafwala milobota.
4Topi vatangi va Esta na vandumindumi vaki va nyumba vamyendela vamuwombela, na mweni muhumbu ang'ong'utikili munu, amuyeghelili Modikayi yingwa afwali badili ya milobotu, lakini Modikayi asilemili. 5Pambeli Esta amkemili Hasaki yumu gati ya vandumindumi va mutwa yivafuniwili yaveli akumkimbanikila Esta, amlayishili kwa Modikayi ili amanyi kucha chindu liki yichimgobola Modikayi na kwanongwa liki. 6Topi Hasaki afumili paluvagha kamuyendela Modikayi pawulongolu ya mlyangu wa nyumba ya mutwa. 7Modikayi amuhimulilili Hasaki fyonda yifimfumbukilili pamu na mbiya sila Hamani shamjangili kuhomba mulusanja lwa mutwa, ili Vayawudi vadanganyishiwi. 8Pambeli kamupa baluwa nga yila ya kwaa yilanduliwili aku Shushani, ili amlangushi Esta, na kumuwombela ayingili kwa mutwa, akamsivi na kumluva avawoneli lusungu vandu vaki. 9Hasaki awuyili kwa Esta na kumuwombela fyosi fyadetili Modikayi. 10Pambeli Esta kamuwombela Hasaki awuyi kwa Modikayi akamuwombeli naha, 11“Vandumindumi vonda va mutwa na vandu vonda kufuma mikowa yonda vamanya kucha, mundu yoyonda yula ghavi mlulumi awu mdadala, yayingila muuwa wa mutwa ngajila kukemiwa na mutwa akuwulayiwa. Ila yula yasonyiwa lukweku lwa chumang'andu akunana. Nenga ngemiwa ha kwa mutwa ali lijuva lya milongu mitatu.”
12Modikayi papatili unjagila kufuma kwa Esta, 13amuwuyishilili lulayilayi alu Esta, “Kotoo kwihola kucha dawunani pitu Vayawudi vosi kwanongwa yuwi kuva munyumba ya wutwa. 14Leki yuwi pawunyamala chipindi achi, utangi na ulowolu dawuvavafumbukili Vayawudi kwa deha yingi, lakini yuwi pamu na lukolu lwaku damuwulaghiwi. Ghani yamanyili kucha yuwi kuva muhumbu kwanongwa ayi!”
15Topi Esta amuyangulili Modikayi naha, 16“Yendi, ukavakungashi Vayawudi vonda yivavelili Shushani, mwikaji kulya kwa nongwa ya nenga, mukotoo kulya wala kulanda kwa majuva matatu. Na nenga pamu na vandumindumi vangu datwikaji kulya ngimu yumwi. Pambeli nenga danyingili kwa mutwa hata leki malawu vanganisha. Hata leki pandifwa kwanongwa ayi, leki ndifwi.” 17Topi Modikayi kawuka na agolili nga wadetili Esta.
Currently Selected:
Esther (Hebrew) 4: OTNdambBL
Highlight
Share
Copy
Want to have your highlights saved across all your devices? Sign up or sign in
The Old Testament in Ndamba @The Word for The World International and Ndamba Language translation. All rights reserved.
