Esther (Hebrew) 3
3
Hamani akwilata kuvawulagha Vayawudi
1Pambeli pafipitili afi mutwa Ahasuelu kamkwesha, Hamani mwana wa Hamedati, mwana wa Mwagagi, kuva mkomi pitu vonda yivavelili pamu na mweni. Hamani aveli mwana wa Hamedata kufuma chileli cha Agagi. 2Vala vandumindumi vosi va mutwa yivayikalili pamlyangu wa mutwa, vamgondamila Hamani mbaka pasi, nongwa alu ndi lulayilayi lwa mutwa. Vosi vagolili nahawu ila Modikayi weka yaki, agondamili ha wala kufugama mbaka pasi. 3Topi vandumindumi va mutwa vayikalili pala pamlyangu wa mutwa vamudashili Modikayi, “Mbona yuwi ukugola ha amuli ya mutwa?” 4Kila lijuva vamuwombilili Modikayi achileki chitiba achi, lakini Modikayi ajumilili ha. Alemili kugola nawula kwanongwa mweni Myawudi, daweshi ha kumgondamila Hamani. Topi, vamuwombela Hamani ili valoli kucha daayiwunishili chitiba cha Modikayi. 5Hamani akalalili munu pamanyili kucha Modikayi akumgondamila ha wala kumfugamila. 6Pamanyili kucha Modikayi aveli Muyawudi, ayiholili kumuwulagha Modikayi weka hela ha. Topi alamulili kuvawulagha Vayawudi vosi, muwutwa wa Ahasuelu.
7Mumwaka wa lilongu na mbili wa utavala wa mutwa Ahasuelu, mumwesi wa kwaa, wuvawukema mwesi wa Nisani, Hamani alayishili vagoli doo, kupata lijuva na mwesi, lijuva ali angamalishili milandu ya kuvawulagha vayawudi. Topi vagolili doo na yaponikilili mulijuva lya lilongu na mchechi, mumwesi wa lilongu na mbili wuvawukema mwesi wa Adali.
8Topi Hamani amuwombilili mutwa Ahasuelu “Kuna vandu kufuma milima yiwutunga kila mahali muwutwa waku. Vandu ava vava kila mkowa. Veni vava na malawu va paweka nakamu na vandu vengi vosi, na veni vakupikana ha malawu vaku, kwanongwa ayiyikukudayila ha kuvayiwunishila. 9Pawudayila yuwi mutwa, layili vandu ava vadanganyishiwi. Na nenga ngukujanga, kucha dandawuli madini va mbiya tani lilongu viki mulusanja lwa mutwa.”
10Topi, mutwa awopulili peti yaki mukuwoku, yavikileyi lihundu, kamupa Hamani mwana wa Hamedati, Mwagagi chimdwama wa Vayawudi. 11Pambeli mutwa amuwombilili Hamani, “Wkali na vandu vaku na mbiya asi goleli nga wuudayila.”
12Topi lijuva lya lilongu na tatu lya mwesi wa kwaa, vala chiyandika va mutwa vakemiwili. Vayandiki baluwa yimu kwa kila mkowa na kwa kila detelu ya vandu nga mutwa Ahasuelu walandulili na kuvikiwa lihundu kwa peti yaki mweni. 13Baluwa shayeghiwili na vandumindumi kumikowa yosi ya mutwa payilayila kuyananga na kuwulagha pamu na kudanganyisha Vayawudi vonda vadokwa na vakomi, vadadala na vana kwa lijuva limu. Mulijuva lya lilongu na ndatu lya mwesi wa lilongu na mbili, ndi mwesi wa Adali, wuwula wula vadayiliwili kukamuliwa mumgoha findu fyawu. 14Fivelili mubaluwa ayi fyadayiliwili kutawuliwa kila mkowa, na kulanduliwa kwa milima yonda na vavi ndemindemi lijuva lilila lila.
15Vandumindumi vawuka vayenda kalopu kwa lishu lya mutwa, Baluwa ayi yalanduliwili mumbwani ngomi ya Shushani. Vandumindumi valandulili mumikowa yosi. Mutwa na Hamani vayikalili pasi na kulanda, lakini vandu va mbwani ya Shushani yajuluvalili.
Currently Selected:
Esther (Hebrew) 3: OTNdambBL
Highlight
Share
Copy
Want to have your highlights saved across all your devices? Sign up or sign in
The Old Testament in Ndamba @The Word for The World International and Ndamba Language translation. All rights reserved.
