LUK - NUMANA 9
9
Yesɔ ne shar awur ane yaa
1Ndi Yesɔ ne zhɔ awur ane yaa, ne nek ba mgbyamgbyaŋ ben klik te abɛ Gli anerim arumɔ te na abɛ lɔ tǝ bɛ rɛ, 2te shar ba abɛ kɔte du lɛ kɛ kɔb Arik tena duŋ abɛ lɔ abɛ rɛ. 3Ne bla ba kǝr abɛ baŋ ikinuŋ agli ba ne tsin mǝne, kǝr abɛ baŋ mkpɔk ki ba, ben abubu ba, kǝr abɛ na Gli ikili ben azɔb ba, kǝr abɛ na Gli anklu anuŋ ba. 4Ikɔb keŋ ndi izhin te yir kɛ, izhin bɛ sɔŋɔ ne kǝ gar mkpaŋ keŋ ndi izhin te duŋ ntuno. 5Fe aneshir abɛ ntuno bate ta zhin ba, izhin bɛ klu gbumgbuk ye aza min shur ba te duŋ ntuno, bɛ yi ngir ndi izhin ne yir kɔbɔ.>> 6Ne me ne vuŋ tsǝn te yir ntuntun, te bla lɛ kɛ Arik te na duŋ abɛ lɔ are.
7Ankyak itum ndi azho te Hiridus ne wɔ kiki yiŋ ndi awur na yaa abaŋa anai. Susun maa ne cɔkla, ndi ne blau te di ne lik Yɔɔna gli rumɔ ne bɛ, 8Anuŋ adi ayi Iliya wa ne munoru, anuŋ adi ayi cice nuŋ ne bla shar ye Arik ne lu tsitsir. 9Ankyak Hiridus adi, <<Mne kyaŋ tu kɛ Yɔɔna. Tei ŋɔwa, waŋ ndi mwɔ kiki yiŋɛ ne tɔ amaa?>> Ne te te wa abɛ yigu.
Yesɔ ne nek aneshir azhin tuŋ kili
10Ndi abɛ zǝ Yesɔ tsin amɛ wur ane yaa baŋa ne kama nyak. Ne bla Yesɔ kiyiŋ ndi ne na. Ankyak ne Gli ba te kɔmɔ ne Batseda, 11Fe aneshir tetɛk ne wɔ te zeu. Ne ta ba te lɛ bene ba ne lɛ kɛ kɔb Arik. Te duŋ abɛ lɔ are.
12Ndi kab arik ne te, awur ane yaa ne nyɛ diu, <<Duŋ aneshir abaŋa abɛ kɔmɔ ne ntuntun te kɔ te wɔb ikili ben kpǝmkpa yi kur, te amkpa ne kur ben ikili ba yime yaŋa ba.>>
13Yesɔ adi ba, <<Izhin bɛ nek ba kinuŋ atali.>>
A sagu ma tedi, <<Tayi ne mbwab durgba me tuŋ ankyak ben ambɛ amɛ yaa, fena ta bǝ yir min ntun te lɛb ntsan aneshire abaŋa ikili.>> 14(Alulum neyi azhin atuŋ ne amkpama.)
Ankyak Yesɔ adi abɛ zeu na ndumo, <<Duŋ zhine ba azesɔŋ ntentek aner sɔk tutuŋ.>> 15Abɛ zeu na ndumo akɔ na kiyiŋ ndi ne diba, ankyak kɔte ŋɔwa a zǝ sɔŋ. 16Fe Yesɔ abaŋ mbwab durgba ime tuŋ tena baŋ ambɛ amɛ yaa te tɔ shu te ben Arik te mlige. Te nek abɛ zeu na ndum bɛ ta gab aneshire. 17Bɔbɔk aneshir ne li te hrii, ankyak abɛ zǝ Yesɔ na ndum ne vu ikili ndi ne dǝk ashak sisa mee wur ane yaa.
Biturus ne ta Yesɔ
18Ndi Yesɔ ne su yir te zen ben Arik te bɛ zeu na ndum ne nyɛ bene bɔu, a rib ba te di, <<Aneshir adi Me yi ŋɔwa?>>
19Asaga, <<Anuŋ adi uyi Yɔɔna ne su aneshir, anuŋ adi uyi Iliya, anuŋ ana di uyi ne bla shar ye Arik ne kukub ndi ne ku aru.>>
20<<Fe izhineba fa?>> A rib ba. <<Izhin di nga Me yi ŋɔwa?>>
Biturus adi, <<Kristi ne rɛ ben Arik>>
21Yesɔ ne gbaŋ ba atɔŋ te di kǝr abɛ bla nuŋ lɛ kǝŋe ba. 22Ankyak adi, <<Izu Neshir atei yik iyah tetɛk ben angɔŋgɔŋ aneshir atei na kyagu, ngɔŋ aner abɛ na ndum Arik bene abɛ tsar lɛ kɛ Arik atei na kyagu te na ŋunu ama atei lu tsitsir ne bɛr yi ntar.>>
23Fe adi ba bɔbɔk mǝne: <<Waŋ ndi ate zǝm, abɛ kyak tu maa tena baŋ tu kuŋkun kɛ gen maa te zǝm kɔte bɛr tayi. 24Neme waŋ ndi ba te kyak tu maa ba atei suk kɛ, waŋ ndi ate kyak susun maa atei yik kɛ. 25Ayi ki didik iye ni te neshir abɛ yik kiki yi gɔŋmimi bɔbɔk te suk susun maa? 26Waŋ ndi te te shisha muŋ ben ilɛ muŋ, Izu Neshir atei na te shisha maa ndi ate nyɛ ne ŋgɔŋ maa ben ŋgon kɛ Tetɛɛ maa ben abɛ shar zhɔ Arik bɛ yi tsetser. 27Mbla zhin lɛ didik, anuŋ ndi ake klɛ yaŋa batei yik ku teshe yik Ŋgɔŋ kɛ kɔb Arik ba.
Isen kpa
28Ndi bɛr tender ne gayir ndi Yesɔ ne bla kiyiŋɛ, Ne Gli Biturus, Yɔɔna ben Yakubu te gar tu gbu te kɔmɔ ben Arik. 29Ndi ne zen bene Arik, iti maa ne kam sen, nkluŋklu maa ne kam te klikla ndi laŋ lu kɛ baŋ ayi. 30Aneshir aya, Musa ben Iliya, 31aru klɛ ne ngɔŋ men, te lɛ ben Yesɔ. Alɛ lɛ kɛ lu maa tɛ kɔmɔ nǝ shu ndi sɔŋ yi shaga ne Urushelima. 32Biturus bene akpa amaa, ina ne vuŋ ba ngɔŋ fe ndi ne kama si, ne yik ngɔŋ kɛ Yesɔ ben aner ayaa aklɛ klɛ bene bɔu. 33Ndi anere aduŋ Yesɔ, Biturus a diu, <<Ngɔŋ, ne rɛ ndi ta yi ayaŋa, duŋ ta na abur amɛ tar izhin bɛ yi mi, izhin bɛ yi kɛ Musa, izhin bɛ na yi kɛ Iliya.>> Bane zhi kiyiŋ ndi ablai ba.
34Ndi azǝn lɛ, akpa ne nyɛ ku ba, fe ate sisik ndi ne yir akpa ma. 35Ikɔr ne rurɛ amkpama, te di, <<Waŋa ayi Zumuŋ, waŋ ndi Mne hriau; wɔ zhin ne wu.>> 36Ndi ikɔro ne lɛ, ayik Yesɔ akɛkli kiki maa. Abɛ zǝ Yesɔ na ndum ne Gli ki yiŋɛ ne susun amen, bane bla nuŋ kiyiŋ ndi aba ne yige ba.
Yesɔ ne na Vǝvǝn waŋ di Kituk ne yiru.
37Ndi bɛr ne ŋan, fe ne zi are gbu, ntsan aneshir ne nyɛ bene bɔu. 38Neshir nuŋ ne miŋ mǝne aru te zhɔ, <<Nǝ Tsar, me benu teu bǝ tɔ zumuŋ, iwa anaga yi zumuŋ ankyak. 39Izhu mimin ne yiru te duŋu ate ahwa te tuk azhaku ne mimi te tsik kpaakpa te ru ante nenu. Ba duŋu ba aŋɔk kpa maa shur amkpaa. 40Mne mben abɛ zeu na ndum abɛ nau tǝ nɛ nau alakakana.>>
41Yesɔ adi, <<Izhineba kab kɛ yaŋ ta nyɛmɛ ne susun amin,>> <<Amkpaŋa aben mne sɔŋ bene bɛ zhin tena vuŋ susun bene abɛ zhin? Gli Vǝvǝne mi nyɛmɛ.>>
42Ne me ndi Vǝvǝn ne sɔŋɔ nyɛ, shetan baŋu tyak zhɔk ne mimi te duŋɔ tsik kpaakpa. Ankyak Yesɔ avǝ izhu mimiŋe te duŋǝ ru ne kpa kɛ vǝvǝne, fe vǝvǝne are Yesɔ avuŋ anu nek tetɛɛ maa. 43Ankyak aneshir bɔbɔk asak aŋɔk nenu ne iki ngɔŋ ndi Arik ne nai.
Ndi kɔte ŋɔwa ne sak aŋɔk nenu ne kin yiŋ ndi Yesɔ ne nai, ne di abɛ zeu na ndum mɔ, 44<<Shur zhin atɔŋ amin te wɔ zhin kiyiŋ ndi M tei bla zhin. atei vuŋ Zu Neshir asak ne aŋɔk aneshir.>> 45Ne me bane zhi kiyiŋ ndi ablai ba. Ne sui ayir bama, te duŋ ba kǝr abɛ Gli ba, ne te sisik rib Yesɔ ilɛmɛ.
Ŋɔwa atei yi ŋgɔŋɔ
46Abɛ zǝ Yesɔ nadum ne te antam ne kpa men te ŋɔwa atei yi ngɔŋ ne min mǝne. 47Yesɔ, ne zhi lɛ kɛ susuno mǝne, abaŋ vǝvǝn vǝtsɔb te duŋɔ klɛ ne kɔnsa maa. 48Fe adi ba, <<Waŋ di ne ta vǝvǝn vǝtsɔb waŋa ne sak muŋ ne tam, waŋ di ne tam ne ta waŋ ndi ne shar me, waŋ ndi wa ayi vǝtsɔb ne miŋ mine wa atei yi ngɔŋ ne miŋ min.
49Yɔɔna adi <<Ŋgɔŋ, tane yik ner nuŋ agli anerim gli rumɔ ne sak mi fe tane te te bǝ yaru ma, te ba yi ne min mɔr ba.>>
50Yesɔ adi, <<Kǝr yar zhin ne wu ba,>> <<Waŋ ndi ba kyak zhin ba, ayi amɔr.>>
Samariyawa ne kyak Yesɔ
51Ndi mkpaŋ ne te kɛ baŋ Yesɔ te kɔmɔ ne shu, Yesɔ ne ta nyɛmɛ te wa atei gar Urushelima. 52Ne shar abɛ bla shar abɛ kuti, ndi ne gar te yir ntun yi Samariya te bɛ na kiki anyagu; 53ankyak aneshire abɛ muɔ bane tau ba, ndi a sɔŋɔ kɔmɔ ne Urushelima. 54Ndi abɛ zeu na ndum amaa, Yakubu ben Yɔɔna ne yik amɛ, aribu te di, <<Ŋgɔŋ, une tanyɛme te tabǝ duŋ lu rɛ shu te goŋ bai?>> 55Ankyak Yesɔ akama tɔ ba te vǝ ba, 56fe a kɔmɔ ne ntun nuŋ.
Iluk yi zǝ Yesɔ
57Ndi ne tsǝnetsin ne ankɔŋ, ner nuŋ adi Yesɔ, <<M tei zeu ŋgar kɔte me ndiu gar.>>
58Yesɔ adiu, <<Wuwuoma ayi ne amkpa ne kur, aŋliŋlɔ ayi ne anjer, Fe Izu Neshir ba yi ne amkpa ane kur ba.>>
59Yesɔ adi ner nuŋ, <<Zǝm.>>
Ankyak nɛrɛ adi, <<Ŋgɔŋ, duŋ me nkɔte ru tetɛɛ muŋ ba liŋ.>>
60Yesɔ adiu, <<Duŋ abɛ ku abɛ ru akpa mɛn abɛ ku, fe iwa bɛ kɔte bla lɛ kɛ kɔb Arik.>>
61Ner nuŋ ne na di, <<M tei zeu, Ngɔŋ; bɛ duŋ me kam kɔmɔ ntǝ bla anere bǝ kɔmuŋ baliŋ.>>
62Yesɔ adiu, <<Waŋ ndi te sak ŋɔk ne ŋa ne lɔn te kama tɔ goŋ bane mla ne na ndum ne kɔb Arik ba.>>
Currently Selected:
LUK - NUMANA 9: NAA
Highlight
Share
Copy
Want to have your highlights saved across all your devices? Sign up or sign in
The word for the World International and The word for the World Nigeria
