LUK - NUMANA 14

Yesɔ ne yir kɔb Bafarisi

1Ne bɛr Sɔŋ sik, Yesɔ ne gar li kili ne kɔb kɛ ŋgɔŋ nuŋ awɔnǝ Ferisawa, aneshir ne suu ayi. 2Ne muɔ ner nuŋ ne lɔ iwu mbwak ne nyɛ kliu ne ti. 3Yesɔ ne rib ane Ferisawa ma ben abɛ zhi nkan alɛ ngɔŋ te di, <<Ire te bɛ na ner ne lɔ ne bɛr yi sɔŋ sik ka abɛ duŋ ini?>> 4Ba ne bu anu ba. Fe Yesɔ avuŋ nɛrɛ te duŋɔ are te diu abɛ kɔmɔ.

5Fe Yesɔ arib ba, <<Iŋɔwa ne miŋ mine te vǝvǝne amaa kɔ vǝn wuwu maa te zhaku ne dudu kɛ amashir ne bɛr Sɔŋ sik te ba tei yir te baŋu agli rumɔ kai?>> 6Ankyak bane di kinuŋ ba.

7Ndi ne yik acɛn anen mben didik ne abɛm, fe abla ba nkanlɛ: 8Ate yi ndi nuŋ ate zhɔ zhin igyaŋ yi kpa ŋa, kǝr zhin bɛ nen abɛ yi sɔŋ didik ba, inuŋ waŋ ndi ne zhɔu ndi ayi ŋgɔŋ anaŋu te nyɛ. 9Ner ne gyaŋa atei diu <<Lu te nek waŋa mben mi.>> Fe utei lu ne miŋ kɛ shisha te nǝgu mbene te kam wɔb abɛ avetsɔb zisɔŋɔ. 10Ne me ate yiŋ ndi te zhɔu igyaŋ utǝ gar ubǝ zisɔŋ ne mben yiŋ ndi ba yi didik ngɔŋ ba, fǝ ner ne gyaŋa te nyɛ, atei diu ikpa muŋ lu kam zisɔŋ ne mben didik yiŋɛ. <<Amɛ aneshir abɛ gyaŋa atei nǝgu ŋgɔŋ mi. 11Ne me ner waŋ ndi aliktu maa ne shu atei gliu aŋyak mimi, iwaŋ ndi azǝ itu maa azhɔk ne mimi Arik atei lɛgu akɔmɔ ne shu.>>

12Fe Yesɔ adi nɛrɛ, <<Ate yi ndi utei zhɔ aneshir li kili yi aririk kɔ iyi amgbalu, kǝr bǝ zhɔ akpa mi ankyak ba, kɔ amun zumin, kɔ amun va min kɔ aner abɛ rɛ nga min ankyak kɔ apkaami abɛ yine ki yi ŋɔk ba; utǝ na amɛ, atei na zhɔu agar igyaŋ men. 13Ate yi ndi utei na igyaŋ, zhɔ abɛ yik iyah, ben abɛ amkpɔk aza, ben abɛ sɔŋ aglugluk, ben abɛ amfik ayi, 14kɔ bate zhɔu te ubǝ yaa ba ba, a tei sagu anu adidik. Ne me utei ta shar didik ne bɛr yi lɛk aneshir abɛ yi atsetser.>>

Nkanlɛ ne atɔ yi igyaŋ ŋgɔŋ

15Ndi nuŋ ne sɔŋ ali kili ben Yesɔ ne wɔ me, adi Yesɔ, <<waŋ ndi atei li kili ne kɔb Arik ne nǝgu anu adidik.>>

16Yesɔ adiu: <<Ner nuŋ ane tei na igyaŋ ŋgɔŋ ane zhɔ acɛn tetɛk. 17Ndi mkpaŋ kɛ gyaŋa ne te ne shar igen amaa abɛ kɔte abla acɛn abaŋ ndi ne zhɔ ba gyaŋa te di, <Nyɛ zhin, te neka na kɔte ni aŋyak.>

18Fena bɔbɔk mǝne adi aba batei nyɛ ba. Ine kuti me ne di, <Mne ntashi lɛb ahwaŋ, M tei ngar ntɔu. Zuk me zhɔk.>

19<<Nuŋɔ anadi, <Mne lɛb alandɔŋ abɛ lɔn atuŋ, me ŋgar duŋ ba lɔn atɔ. Zuk me zhɔk.>>

20<<Fe nuŋ ana di, <Mne ntashi nta iwa, bam tei yik nyɛ ba.>

21<<Igene ne akama aŋyak te bla atu kɔb amaa lǝlɛ yiŋɛ bɔbɔk. Fǝ ner ne kɔbɔ abaŋ afuk te di gen amaa <Ru kɔmɔ andanda ne nkunkɔŋ te yir min ntun te zhɔ abɛ yik iyah, ben abɛ amkpɔk aza, ben abɛ amfik ayi ben abɛ yaŋ lɛ.>

22<<<Igene ne di, <Ŋgɔŋ, iki yiŋ ndi une blam mne nka nai.>

23<<Fǝ atukɔ mɔ adi gen amaa, <Kam kɔmɔ ne nkuŋkɔŋ yi ntuntun muɔ tsɔtsɔb ben ntuntun ngɔngɔŋ te bla aneshir abɛ nyɛ tetɛk te bɛ anyɛ te shak kɔmuŋ. 24Mbla zhin, ba nuŋ ne min kɛ abaŋ ndi mne zhɔ ba igyaŋa ndi atei li gyaŋ yiŋɛ bene bem.>>>

Iyah iyi ne zǝ Yesɔ

25Ntsan aneshir tetɛk ne zǝ Yesɔ, ankyak akama tɔ ba te di: 26<<Waŋ ndi ate nyɛ bene bem ndi ba te kyak tetɛɛ maa, ben iyah maa, ben iwa maa, ben amumun amaa, ben amunzumen, ben amun va men, ben susun maa ba, batei zǝme yir ba. 27Waŋ ndi ba te baŋ mkpɔk kuŋkun kɛ gen maa te zǝm ba ba tei yi ne zǝm ba.

28Ate yi ndi inuŋ ne miŋ mine atei mee iki ngɔŋ, ba tei sɔŋ te tɔ ka wa ayi ne zɔb ayiŋ ndi atei mlau mee kime klɛ kai? 29Teyi ndi ate sak itanda kɛ mee me te bate klik ba, iwaŋ ndi ate gar te yik kɛ atei zhabu, 30te di, <Nɛr waŋa ne mee ki te gun kɛ alakakna akana.>

31<<Kɔ Itum ndi atei gar ikum ben Itum nuŋ. Batei zǝ sɔŋ te bla tɔ ka wa atei Gli abɛ tei ikum azhin wur te nyɛ tsik mgbu ben waŋ ndi anyɛ ne abɛ tei ikum azhin amɛ sɔk yaa kai? 32Ate yi ndi batei klik ayir ba atei men ashar anuŋ abɛ kɔte ayik akpa ndi anaga ri yi gbagbaŋ te aba bɛ lɛ biŋ. 33Ne me, waŋ ndi ba wa tei vu ki maa anǝk bɔbɔk ba ba tei zǝm ayir ba.

34<<Imaŋ rɛ, ate yi ndi imen maa te ru, itei na kikin te men ndi imaŋ i? 35Ba tei rɛ na ndum kinuŋ ne ahwaŋ ba, batei na flu ki li kɔ bǝ rɛ kinuŋ yi mimi ba; atei tyak kǝ ahrie. <<Waŋ ndi ate yi ne atɔŋ ayi wɔ, abɛ wɔ.>>

Currently Selected:

LUK - NUMANA 14: NAA

Highlight

Copy