ACT - NUMANA 7
7
Istifanus ne lɛ bǝn sahindiri
1Fe, ngɔŋ ane abɛ na ndum kɛ Arik, arib Istifanus tedi, <<ilɛ mɛ yi didik yi?>>
2Fe Istifanus adi, <<Izhineba amunzumɔr ben angɔŋgɔŋ, wɔm zhin, Arik Ngɔŋ ne tsar Ibrai tsǝntsǝm mɔr tu maa ndi ne yi ne Bagadaza, ndi ba ne zǝne sɔŋ ne Haram ba. 3Arik Ne diu tedi, <<Lu ne tun mi, ne min kɛ amunzumin, te kɔmɔ ne tun yiŋ ndi me tei tsa ru.>>
4<<Fe a lu ne ntun yi Chaldiyawa, te kɔ te sɔŋ ne Haram. Ndi tetɛɛ maa ne ku, Arik ne gliu te nyɛ amkpa waŋ ndi izhin ku sɔŋɔ. 5Ama iwa ne tu maa, ba yi ne gadu maa ba kɔ watsɔb. Ne nǝgu anu te di iwa atei nǝgu ntuno, iwa ben amumun amaa, kɔ ndi ba yi ne vǝvǝn ne mkpaŋa ba. 6Ki yiŋ ndi Arik ne blai: <Ne di nga kɛ Ibrai a te yi acɛn ne tun nuŋ, aner abɛ tuno ate duŋ ba ayi agɛn a tei sak ba ya har ase amkplik. 7M tei sak ba ya ndi agɛn> Arik ne di <me tei gli ba ngli rumɔ te duŋ ba bǝ gbar me ne amkpa waŋa.> 8Ne nek Ibrai anu akɛ kɔk zǝk, fe Ibrai ne ŋli Ishaku te kɔgu zǝk ne bɛr yi tander, fe Ishaku ne ŋli Yakubu, fe Yakubu ne ŋli atsintsim mɔr amɛ awur ane yaa.
9<<A tsǝntsǝm mɔr ne kyak yi kɛ Yusuu, te baŋu alɛb, ne gliu te kɔmɔ ne Masar, ankyak Arik ne yi ben abɔu 10ne gliu a gli rumɔ ne min kɛ ya, te nǝgu azhizhi adidik ben Firauna itum ne Masar ne nǝgu Gli aneshir abɛ kɔb maa bɔbɔk
11Ankyak ijin ne vuŋ gar kɛ Masar ben Kanana, ben ya mimin atsintsim mɔr ne yaŋ kili. 12Ama Yakubu ne wɔ adi ikili iyi ne Masar, ne shar atsǝntsǝm amɔr ne tsin kɛ ku ti. 13Nǝ tsin kɛ yaa Yusuu ne gli tu ma agli rumɔ ben amunzumen, Firauna ne na zhi ka Yusuu ayi ŋɔ. 14Fe Yusuu ashar ben tetɛɛ maa Yakubu abɛ ŋyɛ, ben amunzumen, aneshir sɔk taŋgba ane tuŋ te bɛ nyɛ yigu ne Masar. 15Fe Yakubu akɔ kɔmɔ ne Masar, ayi muɔ wa ne ku ben atsintsim mɔr. 16Fe ne vu ba te kɔmɔ ne shekem, te shur ba ne bɛ keŋ ndi Ibrai ne lɛb kɛ ne zɔb, ben amumun bɛ Hamɔr ne shekem.
17<<Ankyak ndi mkpaŋ ne te ndi kiyiŋ ndi Arik ne bla Ibrai, aneshir mi atei te du ne tuŋ yi Masar. 18Ne na shur itum nuŋ ne Masar waŋ ndi bane zhi Yusuu ba. 19Itum waŋa ne vuŋ aner amɔr, te zin sak atsintsim amɔr ya, azǝn duŋ a tyak amumun mɔr hrie, te abɛ ku.
20A yi kpaŋa kɛ ne ŋli Musa, vǝvǝne ne rɛ gɔŋ, ne suyir ihwa tar ne kɔb tetɛɛ ma. 21Ndi nɛ tyak gu azhɔk ne bɛm, iva Firauna ne baŋu te gliu, ndi vǝvǝn ne ŋli maa. 22Fe ne tsar Musa izhi yi Masarawa, ne yi neshir ne klik ne lɛ ben na kiki nuŋ.
23<<Ndi Musa ne tei a se sɔk nas, fe susun maa gliu te kɔmɔ ben amunzumen Isrelawa te di a bɛ gar ben a bɛba. 24Ndi ne yik awɔnǝ Masar azǝn sak zumen iyah ne ta zume ne, te ŋur awɔnǝ Masar aŋun. 25Musa nɛ yik tɛ di amunzumen te zhi tedi Arik atei duŋ ba zhi ayi wa atei taba shur. Ama bane zhi ba. 26Ndi bɛr ne ŋan, anuŋ azǝn tsik mgbu, fe ne wɔb te wa bɛ bin atu mǝne, a diba, <Aner abaŋa izhin iyi amunwa fa; aye nii duŋ zhin wɔb akla ne kpa min?>>
27Ama iwaŋ ndi awɔb zumen ne klama adi Musa te di, <iŋɔwa ne nǝgu ngɔŋ bene bɛ ta te bɛ te ta ambuk? 28Udi uwɔb te ubɛ ŋun me ndi une ŋun awɔnǝ Masar alaŋai?> 29Ndi ne wɔ lɛ kǝŋe Musa ne klu akɔmɔ ne ntun yi Madayana, te ŋli amumun aya amɔ.
30<<Ankyak, ndi Musa ne te ase sɔk nas, ine shar ayou Arik nuŋ ne ru kliu ne min lu ne awu aye ahwaŋ ayi gbahir ne gbu yi sanai. 31Ndi Musa ne yik amɛ, ne vuŋ anu ne ki yiŋ ndi ne yige. Ndi ne tib te wa abɛ tɔ, fe a wɔ kɔr kɛ Arik idi: 32<Ayi nga Arik ayou atsintsim min, Arik ayou Ibrai, ben Ishaku ben Yakubu.> Fe kpa kɛ Musa ku rǝu, bane na vuŋ susun te tɔ ba.
33Fe Arik adiu tedi, <<Kpob akpaza mi, te amkpa ne kli ami awaŋa ayi tsetser. 34Mne na yik iya yiŋ ndi aneshir muŋ ne Masar ayige, mǝne yik iya men, mǝne nzi tem ta ba shur, nyɛ azizaŋ tǝm sharu ne Masar.
35<<Ankyak Musa waŋ ndi ne kyagu ne lɛ maa, tedi <Ŋɔwa ne nugu ngɔŋ bene abɛ ta te bɛ te ta ambuk?> Ayi wa Arik ne sharu abɛ yi ngɔŋ bene abɛba te na taba shur ine shar ayou Arik ne blau ndi ne ru kliu ne wu. 36Ne gli ba agli rumɔ, ne ngɔŋ keŋ ndi ne na kiki yi vuŋ anu ne tun yi Masar, ben nek sesen, ben mine ahwaŋ har a se sɔk nas.
37Waŋa ayi Musa waŋ ndi ne di Isrelawa te di, <Arik atai nek zhin ne bla shara maa ne min kɛ amunzumin, ir keŋ ndi ne lɛ ke me.> 38Ayi wa ayi waŋ ndi ayi ne akaba ane zizik ben ne shar ayou Arik ndi ne lɛ bene bɔu ne igbu yi Sinai ben atsintsim amɔr, ayi wa ne ta lɛ kɛ vli Gli tama.
39Ankyak atsintsim mɔr ne kyak zǝ lɛ maa te var kɛ, a susun men ne kama kɔmɔ ne Masar. 40Aner Isrela adi Haruna, <Na ta arik anuŋ ndi atei li ti mɔr te Musa waŋ ndi ne gli ta rumɔ ne Masar, bata ne zhi ki yiŋ ndi ne vuŋu ba!> 41Ne kpaŋa ne lak ivǝn alandɔŋ. te tuk kɛ amkpur, te nyer ne ki yiŋ ndi aba ne nai ne ŋɔk men. 42Ne me ne duŋ Arik ne kam goŋ anǝk ba, ne duŋ ba abɛ zǝ arik ane na ne aŋɔk amen, ben cinces, ir keŋ ndi cɛr ne mplɛ kɛ abɛ bla shar yi Arik ne di:
<<<Izhin aner bɛ Isrela
Ayi Nga izhin ne tuk me amkpur
Te tsik me ibaŋ yi
A ase sɔk nas ne zizik?
43Izhin nek arik ne Molɛk ngɔŋ ben kpa cinces iyi arik Rafan, akpa yuŋ ndi zhi ne lak ne ŋɔk min te zhin bɛ zǝkuri,
Nga M tei gli zhin te kɔmɔ te izhin bǝ yi agɛn ne goŋ Babila.
44<<Kukub atsintsim mɔr ne yi ne bur kɛ du lɛ ne zizik, ir keŋ ndi Musa ne di abɛ na kɛ, ir keŋ ndi ne yik kɛ. 45Bur kǝŋe atsǝntsǝm amɔr ne takɛ ne mkpaŋ kɛ Joshuwa, ne kpaŋ kɛŋ ndi ne ta tuno bǝn aner baŋ ndi Arik ne yar ba ne tii men, ibur kǝŋe yime har kpaŋ kɛ Doda, 46Waŋ ndi ne yik iki didik te ben Arik, te wɔb te wa bɛ mee Arik you Yakubu akabaŋkɔŋ. 47Ama ne yi Solɔmɔn wa ne yi ne me Arik akabaŋkɔŋ ma.
48Ne me, Arik Ngɔŋ ba sɔŋ ne kɔb kɛ me neshir ba. ir keŋ ndi Ishaya ne di:
49<<<Arik, ne di, ishu kɛ yi akpa ne sɔŋɔ muŋ, Mimi yi amkpa ane sak aza muŋ, izhin te mem ikɔb irtake? Arik arib. Ai mee yi amkpa ane sɔŋ sik amuŋ?
50Ba yi aŋɔk amuŋ ben mgbyamgbyaŋ muŋ kɛ me ne na kiki yiŋɛ kai?>
51Istifanus adi ba<<Izhin abɛ kyak wɔ lɛ, izhin abɛ dur, abaŋ ndi atɔŋ men ne taraku, kɔte kpaŋ takǝ izhin kyak wɔ izhu yi tsetser, ir keŋ ndi a tsǝntsǝm min ne na! 52Ne min kɛ abɛ shar ayou Arik ayi tawa atsintsim min ba ne sagu ya ka? Ne ŋlɔk abaŋ ndi ne bla ŋyɛ iyi ne ta aneshir shur, waŋ ndi zhin ne zin sagu ya. 53Ayi zhine ba ne ta lɛ kǝ cɛr yi Musa ben a bǝ shar Arik, ama zhin ne kyak zǝ kɛ ne yak.>>
Ne ŋun Istifanus
54Ndi angɔŋgɔŋ abɛ Yahudawa ne wɔ me, ne te mfu goŋ, te ŋu aŋin, ne tu maa. 55Ama Istifanus, izhu yi tsetser ne shak kpama, ne shur ayi ne shu, ne yik ngɔŋ kɛ Arik, ben Yesɔ a klikli ne ŋɔk li kɛ Arik. 56Fe Istifanus adi, <<Tɔ zhin, me yik shu klikli bu, me yik Yesɔ aklɛ kli ne ŋɔk li kɛ Arik.>>
57Fe ne ŋur ruru, te ku a tɔŋ men te kamu ku susun zhiin, 58Ne gliu te ru goŋ tun te zin tyagu ne kpaŋ, abaŋ ndi ne yik ne tyak Istifanus ben Venenzak nuŋ, azhɔu te Shaulu.
59Ndi ne zin tyak Istifanus ne kpaŋ, iwa a zin ben Arik, tedi, <<Arik ta zhu muŋ.>> 60Akyak a tar gbarum ne mimi, te lɛk kɔr, te di, <<Arik duŋ yaŋ ba zumimin yiŋɛ ba.>> Ndi ne bla me fe aku.
Currently Selected:
ACT - NUMANA 7: NAA
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria