ACT - NUMANA 4
4
Biturus ben Yɔɔna ne tii kɛ abɛ te ambuk
1Ane Biturus ben Yɔɔna ayi ne min kɛ lɛ ben aneshir fe angɔŋgɔŋ aben abɛ blɛ akabaŋkɔŋ ben aner abɛ Sadukiya akɔ nyɛ ben aba. 2Asusun amene acɔk ala ndi abɛ shar abɛ Yesɔ azǝn tsar aneshir tena bla ba ilɛ kǝ lu Yesɔ ne bɛ. 3Fe ne vuŋ Biturus ben Yɔɔna, ne kab amgbalu, te shur ba ne jaru aŋub bɛr ŋan. 4Aner tetɛk ndi ne wɔ ilɛmɛ ne nek asusun amen, idu mǝne neyi aneshir azhin atuŋ.
5Ndi iber ne ŋan atɔtum, ben anǝŋkub ben abɛ tsar lɛ kɛ atɔra ne biŋ ne Urshelima. 6Anas Amamgblɛ ine na ndum Arik, ben kayafa, ben Yɔɔna, ben Iskandari, ben abaŋ ndi ayi ŋa kɔb kɛ ine na ndum Arik ge. 7Ne zhɔ Biturus ben Yɔɔna ne atsutsu amen, te rib ba tedi: <<Izhin ne na kiyiŋɛ ne mgbyamgbyaŋ kɛ ŋɔɔ, kɔka ne sak kɛ ŋɔi?>>
8Fe ndi Izhu Tsetser ne shak Biturus, a diba tedi: <<Izhin angɔŋgɔŋ abɛ Gli aneshir bǝ anuŋkub aneshir! 9Ate yi ndi zhin tei tǝ ambuk aliŋ netu ayi nerne aglugluk ndi ne nau ki didik te duŋu are, te rib ta te anii ne duŋu are, 10Fe, izhin bǝ men zhi, izhineba, ben aner abɛ Isrela: Ayi ne sak kɛ Yesɔ kristi ne Nazara, iwaŋ ndi izhin ne kpaŋu ne kuŋkun kɛ gen, iwaŋ ndi Arik ne duŋu ne lu ne bɛ, netu amaa ineshir waŋa aklikla adidik ne atsutsu amin aliŋ. 11Yesɔ wa ayi <<mkpaŋ yiŋ ndi izhin abɛ mɛ ne kyagǝ, iyi ne kam tǝ mkpaŋ yi nju ki.>>
12Ita zhɔk inak rɛ ben Yesɔ ankyak, isak nuŋ ba na yime ne gɔŋmimi keŋ ndi ne nek aneshir ndi iteita aneshir shur>>
13Fe, ndi ne yik vuŋ susun ane Biturus ben Yɔɔna, nena yik ba ba yi aner abɛzhi ankyak ba, aye aner abɛ iyah, ne vuŋ anu, te tanyɛme ben abɛba, nɛ men ayi ben Yesɔ re kukub. 14Fena ndi neyik ineshir waŋ ndi ne duŋu areme a klikli ben abɛba, bane yi ne kiyi di ba. 15Ne di ba, abɛ ru ne Akabaŋkɔŋ ŋɔ, akɔ tuŋ abiŋ te lɛ ne akpa. 16Te di, <<Ta tei na aneshir abaŋa kikini?>> Ki yiŋɛ aneshir abɛ sɔŋ ne Urshelima, neyik ki yi vuŋ anu ne kiyiŋ ndi nenai, ankɔŋ anedi aba tei timu ba yime ba. 17Tǝ ta bǝ yara nǝ lɛ kǝŋe tǝ nɛ shak abɛm, tabǝ di ba, abɛ duŋ na lɛ ben inuŋ nǝ sak kɛ Yesɔ ba.>>
18Fe azhɔ Biturus ben Yɔɔna, te vǝ ba, tedi abɛ duŋ na lɛ ben nuŋ, kɔ abena tsar nuŋ ne sak kɛ Yesɔ ba. 19Ankyak Biturus bǝn Yɔɔna a tanyɛ bama te di, <<Tɔ atei ndi Arik neyik nɛrɛ tǝ ta bɛ zǝ lɛ min kɔ maa, izhin bɛ tɔ. 20Atai taba kam, bata yi ne ki naa ba ta tei bla ki yiŋ ndi tane wɔi ben ki yiŋ ndi ayi amɔr neyik.>>
21Ndi nena vuŋ ba, ne shur ba bane zhi ir keŋ ndi atai sak ba iyah ne ayi aneshir ba. Aneshir azǝn gbar Arik sak ne kiyiŋ ndi ayige. 22Iner waŋ ndi nena ki yi sak ŋɔk nenu netu maa te duŋu areme nǝ kam ase sɔknas.
Abɛ zǝ Arik ne ben Arik
23Ndi ne shur ane Biturus ben Yɔɔna ne akama kɔmɔ ben aneshir amen, te kɔte bla ba ki yiŋ ndi abɛ na ndum Arik ben angɔŋgɔŋ abɛ akaba ne bla ba. 24Ndi abɛ zǝ Arik ne wɔ me, ne lɛk akɔr amen te ben Arik ne susun zhiin, te di, <<Ŋgɔŋ ne Gli shu ben gɔŋmimi, ben inǝk ngɔŋ, ben kiki yiŋ ndi yi ne min mǝne. 25Waŋa Izhu tsetser, ire anu akɛ ntsǝntsǝm amɔr Doda ivǝnmi tedi
<<<Anii duŋ aneshir ate mfu
Anayi aneshir ankyak
Aneshir ana kam tii?
26Atum abɛ gɔŋmimi ne kpa kum, abɛ te ambuk ne bine, te zǝn te zɔr bǝn Arik, bǝn Almasihu.>>
27Ane Hiridus bǝn Bilatus ne bine ben aneshir bǝn aneshir abɛ Isrela tetɛɛ zor ben Yesɔ vǝvǝne mi neyi Tsetser, iwaŋ ndi ne duŋɔ akam ate Almasihu. 28Ne biŋ atu te abena kiyiŋ ndi ne kpai netu maa ibǝ te, ne mgbyamgbyaŋ maa ben susun maa. 29Azizaŋa Arik, tɔ ikiyiŋ ndi ne akpai aŋyak, te nek Vǝn mi ilɛ kǝ bla tena nǝgu vuŋ susun. 30U nab ŋɔk mi tena aneshir are, ana kiki yi sak aŋɔk nenu ben kiki iyi vuŋ anu, nǝ sak kɛ tsetser kɛ Yesɔ vǝn mi.>>
31Ndi ne ben Arik, amkpa waŋ ndi aklɛ klimɛ ajaŋ, fe akɔ duŋ izhu tsetser yir ba, akɔ du ilɛ kɛ Arik iyaŋ sisik.
Abɛ zǝ Arik ne gab kiki ne akpa mɛn
32Bɔbɔk abɛ zǝ Arik nɛ nǝk atu ne asusun amen azhiin, ilɛ mǝne nayi zhiin,inuŋ ba adi ikinuŋ iyi maa kiki maa ba se ibǝyi imen bɔbɔk. 33Abɛ na ndum Arik ne lɛ ne mgbyamgbyaŋ netu yi lu Yesɔ ne bɛ, ina didik iyi netu mǝne. 34Inuŋ bane yaŋ kinuŋ ne min mǝne ba, abɛ huhwaŋ, bǝn akɔb ne vui alɛb te gli azɔbɔ nyɛmɛ 35ne nyak ge ne ti kɛ abɛ na ndum Arik, ne gab kikime ir keŋ ndi imɔ neshire iyime.
36Ayi nemin kɛ na amɛ fe Yusuu, Balawi, ayi awɔnǝ kuburus, ndi abena ndum Arik ne zhɔu te Barnaba, (ndi ayi iner ne susun), 37Ne baŋ ahwaŋ amaa alɛb, te Gli azɔbɔ anyɛ nyak ne ti kɛ abena ndum Arik.
Currently Selected:
ACT - NUMANA 4: NAA
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria