ACT - NUMANA 26
26
1Fe Agaribas adi Bulus, <<Ne nǝgu mkpaŋ kɛ lɛ.>>
Akyak Bulus anab ŋɔk te vuŋ lɛ te di: 2<<Itum Agaribas! M ne yik pur ne ti mi te bɛ ta tu muŋ zhɔk ne lǝlɛ yiŋ ndi Yahudawa avuŋ me gli ne lalɛ, 3Ne me une zhi kiki yiŋ ndi Yahudawa anayi ben lǝlɛ mǝne. Neme me benu bɛ shur kpa te wɔm zǝǝ.
4<<Ane Yahudawa bɔbɔk ne zhi isɔŋ muŋ nak rɛ nzak muŋ, nak men ku ti, ne min kɛ aneshire mɔr ben Urshelima ne kam nyak aliŋe. 5Ne zhi men rɛ kukub, ate yiŋ ndi atei zi goŋ te di Me yi Bafarisi ndi ayi sak iyah ne min kɛ ankɔŋ ne ben Arik amɔr. 6Mǝne nyak susun te me yik shak ki yiŋ ndi Arik ne bla atsintsim mɔr ane yi ayi me ŋubǝ ne kpaŋ kǝ te ambuk abɛ yime. 7Waŋa ayi kpa nyak ndi ne yi akɔb a wur ane yaa abaŋ ndi ne nek tu ne zǝ Arik ibu ben aririk te zin zhɔk susun ka iku ne lɛ shaga, ne zhɔk susun yiŋɛ Yahudawa a zin blai, Itum. 8Iyi kikin te zhin di Arik alǝk aner bɛ ku te kyak ta zhin nyɛmɛ?
9<<Nga ne tu muŋ, me yik tedi ne rɛ te me yik kiki tetɛk, ne ti yiŋ ndi akyak sak kɛ Yesɔ Banazara. 10Me ne na me ne Urshelima, ne men azhɔk abɛ zǝ Arik anuŋ ne jaru aŋɔk yi angɔŋgɔŋ abɛ na ndum Arik. Mǝne vu aneshir tetɛk nku ne jaru, ne kpa anuŋ ŋlɔk ne tanyɛme muŋ. 11Mne sak ba iyah tetɛk ne akabaŋkɔŋ amen, mǝna wɔb ba ne ankɔŋ ne lalɛ, ir keŋ ndi me te mfu ngɔŋ bǝn abɛba mǝne zǝ ba azaza izǝ yi a goŋɔ tuk, te zǝn sak ba ya.>>
12Itum Agaribas iber nuŋ yeme, me tsin kɔmɔ ne Damaskɔ abɛ na ndum Arik angɔŋgɔŋ ne nǝm anu tena shar men. 13Nɛ aririk kpakpas me ne vuŋ ankɔŋ, Itum Mne yik laŋ ne ire shu, ne naŋ laŋ yi aririk, ne hrie kam mǝ zǝk bǝn akpǝkpa abǝ tsǝne muŋɔ. 14Ndi ta ne hrie ne mimi, mǝne wɔ kɔr nuŋ ndi kɛ Yahudawai idi, <Shaulu, Shaulu, ayi ni duŋu sak me yai? Bai iyah ka ubǝ zin te zor bene bɛm.>
15Ankyak me rib tedi, <<Uyi ŋɔwa Arik?>
Fe Arik adi, <<Ayi Nga Yesɔ ndi uzǝn sak me yaa maa. 16Ama lu kli adidik, mǝne tsa ru tu muŋ te bɛ yi ne bla lɛ muŋ ne kiki yiŋ ndi une yik ne yi mi ne tu muŋ, me tei blau kiki nuŋ ne ti. 17Mne ntau nzhɔk ne aŋɔk aye aner ami ben Yahudawa. Mna sharu bene beba 18Te ubɛ bu ba ayi, te abɛ duŋ bu te kam aŋyak laŋ, te duŋ zǝ shetan te kam zǝ Arik, te bɛ yis ba zumimin men, te abɛ li gadu ben abɛ yi tsetser, te ne tanyɛme bene bɛm.>>
19Amɛ Itum Agaribas bam ne kyak blau ki yiŋ ndi mǝne yigǝ ire shu ba. 20Ne ku ti mǝne bla aneshir abɛ Damaskɔ lɛ kɛ Arik, te na bla Urshelima ben tuntun yi Yahudiya, te na bla abaŋ ndi bai Yahudawa ba, tedi abɛ duŋ na kimimin te kama zǝ Arik, te na ndum kɛŋ ndi te tsar duŋ na zumimin mǝne. 21Yiŋe ne duŋ Yahudawa ne vuŋ me ne min akabaŋkɔŋ te wɔb te aba bɛ ŋun me. 22Ndi mǝne yik sak ŋɔk yi Arik, nga waŋ har a zǝzaŋ me zin bla angɔŋgɔŋ ben amumun, bam bla kinuŋ ba anak iki yiŋ ndi abɛ bla ishar yi Arik ben Musa ne di ite na 23tedi iyi anenen Almasihu abɛ yik iyah, ayi wa atei ku te na kuti lu ne bɛ, te bla aneshir laŋ yiŋɛ.>>
24Bulus ayi ne min kɛ lɛ, akyak Festas atsaŋu te lɛk kɔr te di, <<Bulus uyi kpukpur, izhi mi iduŋ dar vuŋu.>>
25Bulus adi bam landar ba, ineshir ngɔŋ Festas, bam yi kpukpur ba, me lɛ didik ne min kɛ sik susun. 26Itum Agaribas, une zhi lɛ kǝŋɛ bɔbɔk, me na lɛ ben abɔu ne susun zhin, mǝne zhi ba ki yiŋ ndi ne naŋ Itum dɔ ne kiki yiŋɛ bɔbɔk, ba kiyiŋ ndi ne suyir ba. 27Itum une tanyɛme ben abɛ bla ishar yi Arik yi? Mǝne zhi une tanyɛme.>>
28Fe Itum Agaribas akɔ di Bulus, <<Fe ne ivǝ mkpaŋ kǝŋe uwɔb te ubɛ kam duŋ me yi krista?>>
29Bulus a di, <<Ne ivǝ kpaŋ kǝŋe kinuŋ te ya na ngɔŋ, me ben Arik, ba wa kiki mi ba, te vuŋ baŋ ndi azǝn wɔm aliŋe, abɛ yik keŋ ndi iyime, bam tanyɛmɛ te abɛ yir jaru ndi nga ba.>>
30Fe Itum alu kli a didik, ben abaŋ ndi akɔ sɔŋ ben abɔu. 31Ndi ne bin atu men amkpa azhiin te kpa anu te di. <<Ineshir waŋa bane na kinuŋ ndi ate kpau te ŋunu ba.>>
32Agaribas ne di Festas tedi, <<Abɛ di ba Bulus ne Gli lɛ ma te kɔmɔ ben kaisar ba ta abɛ zu gu azhɔk.>>
Currently Selected:
ACT - NUMANA 26: NAA
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria