ACT - NUMANA 19
19
Bulus ne Afisa
1Ndi Apolɔs ne yir kɔrintiya, Bulus ne baŋ ankɔŋ te zǝ ntuntun te kɔmɔ ne Afisa. Ne muɔ ne yik anuŋ abɛ zǝ Yesɔ 2te rib ba te di, <<Izhin neka ta Izhu tsetser yi?>>
Adiu, <<bata ne zen wɔ lɛ kɛ zhu tsetser ba.>>
3Fe Bulus arib, <<Tǝ ne su zhin ne amashir kikini?>>
Adi, <<Ndi na iyi Yɔɔna,>>
4Bulus adi, <<Yɔɔna ne su aneshir te bɛ duŋ zumimin. Ne bla aneshir abɛ duŋ zumimin te tanyɛmɛ ben waŋ ndi atei nyɛ ne goŋ maa, ndi ayi Yesɔ.>> 5Ndi ne wɔme ne tanyɛme Bulus ne duŋ a su ba ne sak kɛ Yesɔ. 6Fe Bulus ne sak ba ŋɔk, Izhu tsetser ne nyɛ ba, fe akɔ lɛ aŋa kaŋkaŋ tetɛk te du ilɛ kɛ Arik. 7Ne ayi aner awur ne ayaa bɔbɔk mǝne.
8Bulus ne yir Akabaŋkɔŋ te du ilɛ kɛ Arik yaŋ te sisik ihwa tar, te te atam goŋ ne atu yi kɔb Arik. 9Ne me anuŋ ne kyak te klik tu: te kyak tanyɛmɛ te kyak Ankɔŋ ndi Bulus ne blau ma ne min neshir. Fe Bulus aru te duŋ ba. Te gli abaŋ ndi azǝ Yesɔ te gar amkpa ne tsar ayi Tirana te tsar ba kɔte bɛr tayi. 10Neme Bulus ne tsar ba ilɛ kɛ Arik asi yaa te duŋ ane Yahudawa ben Larbawa ndi akɔ sɔŋ ne ntun yi Asiya ne wɔ lɛ kɛ Arik.
11Arik ne na iki duŋ aneshir asak aŋɔk ne ne ne atu ye Bulus, 12ne vu aŋaŋklu kɛ yis akli ben ki su maa agli aneshir abaŋ ndi alɔ, te sak ne kpa men te rɛ ben anerim ne na ru ne kpa kɛ aneshir.
13Yahudawa nuŋ ne yir ntun te di aba Gli anerim agli rumɔ ne akpa ye aneshir ne sak kɛ Yesɔ. Te di, <<Ne sak kɛ Yesɔ ndi Bulus abla lɛ ma, Me di zhin bɛ ru.>> 14Amumun ataŋgba bɛ awɔ ne Yahudawa ndi ayi ngɔŋ abɛ na ndum kɛ Arik ndi azhɔu te si ba, aba na kiyiŋ. 15Ne bɛr nuŋ yi me irim adi ba, <<Mǝne zhi Yesɔ te na zhi Bulus, zhineba yi ane ŋɔwa?>> 16Fe iner waŋ ndi ayi ne nerim atuk asɔŋ ba te klik anaŋ ba ankyak aklu ru ne kɔbɔ mgbawun ne zhizhi ne kpa men.
17Ndi Yahudawa bene Larbawa ndi ayi ne Afisa ne wɔ lɛ kǝŋe sisik ne vuŋ ba, neme sak kɛ Yesɔ ne yik ta tetɛk. 18Aner tetɛk ndi ne ta Yesɔ ne ru tetɛk te bla kiyiŋ ndi aba ne nai. 19Aner tetɛk ndi atɔ ne gli amplɛ ye na ndum men gli rumɔ te goŋǝ ne min aneshir. Ndi ne tɔ za kɛ amplɛ ayiŋ ndi ne gɔŋǝ ma atei te azɔb azhin angɔŋ amɛ tuŋ. 20Ne me lɛ kɛ Arik ne shak amkpa te na klik ngɔŋ.
21Ndi kiki yiŋ ne na, Bulus ne baŋ ne susun maa wa tei gar Urshelima, wa te zǝ Makidɔniya ben Akaya. Bulus adi, <<Te yi ndi mte yir amɔ me te na gar Roma.>> 22Ne shar abɛ lɔgu na ndum amɛ yaa, Timoti bene Arastas, ne Makidɔniya, fe wa atei yene sɔŋ ne ntun yi Asiya ne liŋ.
Mgbu ne Afisa
23Ne Afisa mgbu ngɔŋ ne lu ne atu ayi lɛ kɛ Yesɔ. 24Ne muɔ ner nuŋ ndi azhɔu te Dimitiriyas, ine lak arik ayi azɔb, ana lak kpa neshir ndi ayak kɛ ne akabaŋkɔŋ ne Atimas, abɛ na ndum kǝŋe ayik azɔb tetɛk. 25Dematros ne zhɔ abɛ na ndum amkpa zhin, bene abɛ lɛb kiyiŋɛ te diba, <<Alulum, izhin ne zhi te tane te yik didik ne ndum ndi ta yik azɔb tetɛk. 26Izhin yik te na wɔ ne atɔŋɔ amin ir keŋ ndi Bulus ne ka lɔm aneshir tetɛk tena sen ba susun ne Afisa bene ntun yi Asiya. Adi arik waŋ ndi anau ne ŋɔk ba yi Arik ba. 27Ayi ki mimin ankyak ba ne gli sak kɛ ndum mɔr yak goŋɔ ba me ankyak ba, akabaŋkɔŋ ne arik ne Aritimas ba tei na yi akpa ne gar ba bene amkpa ne sak ayi ba. Ire maa tei zhaku na ayi aye ntun yi Asiya, bene gɔŋmimi bɔbɔk.>>
28Ndi abɛ na ndumo ne wɔ me, ne tǝ mfu ngɔŋ te bu kɔr te di: Aritimas ne Afisawa a yi arik ngɔŋ!>> 29Ankyak ntuno yatɔŋ bɔbɔk. Aneshir akɔ vuŋ Gayus bene Aristakus, akpa abɛ tsin abɛ Bulus ne Makidɔniya. 30Bulus ne wɔb te iwa abɛ ru kli ndende ne min aneshir, ankyak abɛ zǝu tsin ne yaru ma. 31Angɔŋgɔŋ Anuŋ ne min abɛ zǝ Bulus, ne shar bene bɔu te benu kǝr abɛ ru ne min aneshir ba.
32Ntsan aneshir ne yatɔŋ, anuŋ adi yiŋ anuŋ adi yuŋ, anuŋ adi iyiŋ me. Aneshir tetɛk adi ba aba ne yik kiyiŋ ndi aba ne nyɛ nai ba. 33Yahudawa ne min kɛ aneshir ne tur Iskandari yak ne ti, te lɛ tedi ayi wa ne Gli yatɔŋ yiŋɛ Gli yeme. Iskandari a lɛk aŋɔk na shu te di aneshir bɛ kunu tǝ wa bɛ bla kiyiŋ ndi iyi ne miŋe. 34Fe ndi ntsan aneshire ne yik awɔnǝ Yahudawa, ate ahwa te di: <<arik Atimas ane Afisawa ayi ngɔŋ!>>
35Nǝ klɛ tu ine cɛr ne ntuno aduŋ aneshir kunu te diba: <<Aner bɛ Afisa, kɔ ba gɔŋmimi bɔbɔk ne zhi te di ntun yi Afisawa aba bɛ tɔ akabaŋkɔŋ ne Atimas arik ngɔŋ bene izhu maa ka, ndi ne zhaku are shu ka? 36Ne me, te yi ndi kiyiŋ iyime, duŋ tsik zhin kpaakpa ba, te zhin zee kǝr zhin bɛ na kinuŋ andanda ba. 37Izhin ne Gli aneshir abaŋ Gli nyɛ ayaŋ, bane zhib ne akabaŋkɔŋ ba, bane cɔk sak kɛ arik ne Atimas la ba. 38Ate yi ndi iyi amɛ, Dimitiriyas bene akpa abɛ na ndum amaa atei lɛ kɛ lɛ ne atu yi nuŋ. Ibur kɛ te ambuk ikur bu, abɛ te ambuk ayime abɛ Gli lɛ men te gar amɔ. 39Te yi ndi ikinuŋ yime ndi zhin yime neyi yi lɛ, abɛ glii te gar isɔŋ ngɔŋ. 40Ndi yi amɛ, bate rɛ tabǝ ta lɛ nuŋ te lɛ kɛ yaŋa bane kiyiŋ ndi ne nai aliŋ. Ne me bata te ya lǝlɛ nuŋ ayaŋa ba, ama ba rɛ te abɛ na me ba.>> 41Ndi ne cɛr ne ntun ne ilɛmɛ, ne duŋ aneshir ŋar.
The word for the World International and The word for the World Nigeria