Ichedendik 23
23
Obo ọmaana ẹnọhnga ch'Sara
1Wa Sara orukọ icho arọbh achadanẹ okwuma ichenọmfa. 2Ope z'Kiriyat-Arba, kw'mabir ayerẹ, Hẹbrọn, z'ẹbhaakẹ ch'Kenaan. Abraham ọtọka ogbe obhom Sara mawuriji.
3Obhom-ẹ nya o, obina orik ibyi s'kwanọng kwẹ ope, ochina z'anọng p'Het, oben bẹ bẹ́, 4“Kaam nde okikennọng kw'nrukọ ma mmaana bọnga. Ototo, màkpe-m izek s'im'nnọhnga kwanọng kwaam.”
5Anọng p'Het apọhn-ẹ bẹ́, 6“Ttatta, yonga mina itọhng. Moze bẹ́, kọ ade odidennọng kw'okem ẹbara ma; nọhnga kwanọng kwọ m'ẹbhaakẹ chamina k'epekwuk kpenamkpen ch'ẹdaak-ọ. Ọnọng m'amina kode kw'im'ọram-ọ ibyi s'im'anọhnga kwanọng kwọ.”
7Minna kw'Abraham obin ọraka eso ọnang anọng p'Het, 8oben bẹ bẹ́, “Ó̱de bọnga nkk'achera bẹ́, nnọhnga offuranọng kwaam, tte mbir mphyem bọnga odik mawanẹ. Ototo, màphyem Ẹpharọn, kw'ode nnwa kw'Zoha k'kaam k'eso. 9Màben-ẹ bẹ́, ọtọka ọtakpamma kw'Makpẹla okpe-m. Ọtakpamma nwo oning z'ewonọ-so chẹ. Màben-ẹ bẹ́, okpe-m ibyi njo k'ẹphya ch'ẹbaan, ọfha ntima mach'ibyi s'min'nd-nnọhnga affuranọng.”
10Mach'Abraham ọd-ọgbaak odik nwo, kẹ Ẹpharọn kw'ofon Hit, oning ẹwọr nya ọmaana anọng pẹ, ọbhaanga idik s'Abraham. Ọpọhna Abraham odik nwo k'ose kw'anọng mbo maphyir p'nkk'akwa ny'ebhumma ch'obhon nwo, mabhaang. 11Oben-ẹ bẹ́, “Mma e, ttatta kwaam. Yong-m itọhng; kaam nnang-ọ izek njo ọttara ọtakpamma kw'oning nya. Ntte ọbọhk nnang-ọ m'ititika s'anọng paam. Nọhnga offuranọng kwọ nya.”
12Nya o, Abraham obir ọraka eso k'ekpukpobha-maana ọnang anọng p'obhon nwo, 13ọgbaak Ẹpharọn k'ose kw'anọng mbo mm'abhaanga, oben-ẹ bẹ́, “Ototo, yong-m itọhng. Kaam m'nnang-ọ akpuka p'abaan ny'izek njo. Ototo, tọka, ọfha nnọhnga offuranọng kwaam nya.”
14Ẹpharọn ọpọhna Abraham bẹ́, 15“Ttatta kwaam, yong-m itọhng. Ẹphya ch'izek njo m'epyirẹ ashẹkẹl p'silva ẹnọhna, okenaka, akpuka mbo m'ọttọhk-afẹ kabang z'ẹgbaka ch'kaam ọttara kọ moyen. Nọhnga offuranọng kwọ nya.”
16Abraham ochera nttọhna s'Ẹpharọn, oyoma ashẹkẹl p'silva k'ose kw'obenẹ, ọnang-ẹ ny'ikpakaana s'anọng p'Het. Wa adọhbhiji p'silva mbo made ashẹkẹl ẹnọhna, k'ose kw'okpukabhik ode ny'ogbe nwo.
17Ofona nya, izek s'Ẹpharọn s'ining z'Makpẹla, s'inyọm Mamrẹ, ọmaana ọtakpamma kw'oning nya, ọttara nchi maphyir s'ibe ny'enem ch'izek njo, wa nnatte ọbọhk anang Abraham 18mach'izek sẹ ny'ititika s'anọng p'Het maphyir p'nkk'attonga ny'ebhumma ch'obhon nwo. 19Nwonya ọsa nya o, Abraham ọd-ọnọhnga kwanọng kwẹ Sara ny'ọtakpamma nwo ny'izek s'Makpẹla s'inyọm Mamrẹ, z'ẹbhaakẹ ch'Hẹbrọn, z'ẹkọma ch'Kenaan. 20Minna kw'uwa anọng p'Het mazeng asi nttọhna, matọka izek ọttara ọtakpamma nwo kw'oning nya, manang Abraham bẹ́, oyena mach'ibyi s'im'ọd-ọnọhnga affuranọng.
Currently Selected:
Ichedendik 23: mfn-x-ad
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
