Akpaar-aponga 19
19
Ofona-nwa kw'Lẹvi ọttạra oyok kwẹ
1K'okpe ngwọ, wa anạng p'Israẹl ọvaanạng kákhaam.
Ma o, ọkhaam ujunung wạnọ kw'efonamma ch'Lẹvi, kw'urukhu k'ẹtaanga-ẹtaanga kw'ukhubha kw'akpecho p'Ephraim, kw'oyok kwẹ ubin Bẹtẹlẹhẹm k'Juda. 2Okhenkha, wa oyok nwọ kwẹ utim ọmmaana-pyibh utima otor-ẹ. Wa ubin urik udim ọkpa nnạm k'otte k'ọchọhm kha Bẹtẹlẹhẹm k'Juda. Masẹ kk'aphye annebung uninga kha, 3udim ubin, ọtọhmnạng kwẹ abẹ, ọttạra nnyạnyaang sẹ mfa, bẹ́ ọta uchin-ẹ ọkpa nnạm. Mạnna wọ, ikwanạng nwọ utim udim ọnwa k'ọchọhm kw'otte. Masẹ otte kw'ikwanạng nwọ usiẹ-ẹ, orobh-ẹ k'ottennebh. 4Ọnyẹ kwẹ kw'ode otte kw'ikwanạng nwọ, ophyem-ẹ bẹ́ ubhing bẹ abẹ, mạnna wọ ubhingi bẹ abẹ k'iwu ittaan, n'uchi ọbạra ogwo, ọbạra ọttaabha mạma.
5Ottong iwu innebung, abẹ abin k'ekpekpebha ado ifor bẹ́, abẹ afona. Okhenkha, otte kw'ikwanạng nwọ oben udim kw'nnwa bẹ́, “Vạkha ẹfhạr bạrasẹ afona.” 6Mạnna wọ kw'abẹma ncho mfa achi uchiattọhk, abạra agwo atwuk. Masẹ abẹ kk'asa, otte kw'ikwanạng oben bẹ́, “Totokhạn, rebh ettem ninga mama ma k'irungu nja.” 7Okhenkha, k'okpe kw'ujunung nwọ ubin bẹ́ ofona, otte kw'ikwanạng nwọ oden-ẹ tạrr, ohema ma, uyima m'irungu njọ. 8K'ekpebha s'iwu echobh, ch'ettong iwu isen, masẹ ubin bẹ́ ofona, otte kw'ikwanạng nwọ oben bẹ́, “Vạkha ẹfhạr, aninga tạrr, ukpira k'ẹya!” Mạnna wọ abẹ atwạnọ achi ọttọhk.
9Ma o, k'okpe kw'ujunung nwọ, ọttạra oyok kwẹ, ọttạra ọtọhmnạng kwẹ abin bẹ́, abẹ afona, ọnyẹ kwẹ kw'ode otte kw'oyok kw'ikwanạng, oben bẹ́, “Kkeri, iwu n'abạra ipyi e, chi ọttọhk ayima mama, khiri iwu kk'ẹsa. Rebh ettem ninga. Uphyini k'ekpekpebha, abina abhạna k'akhọ k'ọchọhm.” 10Okhenkha, wa aro nwọ dạk kẹ nọ́daakha bẹ́ ọbạra uyima mạma k'irunguwu ẹdwạkh-ọdwạk. Wa odo nnyạnyaang sẹ ininga, utima oyok kwẹ ubina osenga ofona kha ukhubha kw'Jẹbus (kw'ode Jẹrusalẹm).
11Masẹ abẹ kk'Jẹbus abaanga, s'iwu kk'ẹsa, ọtọhmnạng kw'ujunung nwọ oben aro kwẹ bẹ́, “Tte amming ma k'efhondiden ch'anạng p'Jẹbus ma irunguwu nja khadẹ o.”
12Aro kwẹ ubhina bẹ́, “Mma e, amạna k'efhondiden jạnẹ-jạnẹ ch'nạn ch'anạng p'Israẹl nídia mạ́nta. Uttu kw'm'ansi oche ngwọ m'antera anseng amfona kha Gibea. 13Tte ankhonga amkpira kha Gibea, ọbạra ode Rama, ọfha anyima ma ofhon gwạnọ k'ifhon nnọ ifa.” 14Mạnna wọ abẹ afon ororo tạrr, ata abaanga Gibea k'ẹkhạma ch'Bẹnjamin, k'ẹchọhkha-ẹchọhkha. 15Abẹ ata aseng k'Gibea k'oche kw'abẹ m'abhing ma irungu njọ. Abẹ afona ata aninga ẹyạr k'ẹbhama ch'efhondiden. Okhenkha, ọnạng wạnọ-wạnọ kw'oyeri bẹ bẹ́, abẹ ata abhing k'akhẹ k'ọchọhm kòde.
16Ma ẹchọhkha njọ, ọtạmanạng-junung wạnọ kw'ubin k'ukhubha kw'akpecho p'Ephraim, uruk k'Gibea, ubin kha owonu kw'ọta usi ọtọhm ukwuna. Wa anạng p'Gibea p'uwa arukhu ma ibyi nnọ ade anạng p'ẹkhạma ch'Bẹnjamin. 17Okpe kw'ọtạmanạng nwọ udir achen okkeri kha ẹbhama, n'ọbạbhọ bẹ́, “Abạnga abin mạn? Abạnga n'atena njạn?”
18Ofona-nwa nwọ kw'Lẹvi, ubhina bẹ́, “Ambin kha Bẹtẹlẹhẹm kw'ẹkhạma ch'Juda, n'antena ẹttaanga-ẹttaanga kw'ukhubha kw'akpecho p'Ephraim, k'ibyi s'amma nnukhu. Wa nta kha Bẹtẹlẹhẹm k'ẹkhạma ch'Juda, mantọmma, n'abạra mfona k'ọchọhm kw'Ọvaar Ubinọkpaabyi. Ọnạng wạnọ-wạnọ kw'kk'aam utima bẹ́, nta mming k'akhẹ k'ibyi sẹ kòde. 19Amạna ọttọhk vạnọ-vạnọ nánnora. Ankhaam asạsaarẹ-bukhu khakha, ọttạra uchiattọhk f'nnyạnyaang samạna m'ichi. Amạna mba atọhmnạng pọ antim brẹd ọttạra atwuk p'm'abenga amma, ọttạra oyok kwaam, ọttạra udikkobh-nwa kw'ọtwạnọ mạna abẹ.”
20Ọtạmanạng nwọ ọbẹ́, “Abạnga akwu aninga ka akhaam k'ọchọhm. Abạnga ma ẹbhama káninga. Amma m'nnạng bạnga fidede f'abạnga m'aror.” 21Mạnna wọ ọtạmanạng nwọ utim ujunung nwọ ofona k'akhẹ k'ọchọhm, ọbạra ọnạng nnyạnyaang sẹ uchiattọhk. Anạng mbọ akpobhu mfhokpatwạkhọ sabẹ, abẹ achi ọttọhk, abạra agwo atwuk.
22Masẹ abẹ n'achi akpen o, abyibyia-nạng bạnọ p'efhondiden njọ abaabha ọchọhm ngwọ age ngekha, n'ammum ọbọhk k'ukhubh, akwọhrọ ọtạmanạng nwọ kw'ọkhaam ọchọhm ẹmạng bẹ́, “Tima ujunung nwọ kw'ọsạk ma k'akhọ k'ọchọhm yin ka iyaan, ọfha anyima abẹ.”
23Ma wọ oyeni-ọchọhm uyini k'iyaan oben ajunung mbọ bẹ́, “Mma e, ayok-udikkobh paam, abạnga ibyibyia demachẹ nja kási o. Masẹ ujunung nwa ode ukhikhennạng kwaam, abạnga ọgbạrsia-dik demakwẹ ngwa kási. 24Akkeri, uminanwa kwaam ọttạra oyok kw'ujunung nwa aning mama. M'ntima bẹ nkkena bạnga ka iyaan, ọfha abạnga atima bẹ asi oche kw'abạnga akkẹ. De n'ode ujunung nwa, abạnga ọgbạrsia-dik ngwa mási.”
25Okhenkha, ajunung mbọ ọtạmanạng nwọ itọhng nákhọma. Osenga ma, ofona-junung nwọ kw'Lẹvi ọtạkha oyok kwẹ ọnạng ajunung mbọ k'iyaan. Abẹ avạkh-ẹ k'ẹfa ayima abẹ ma irungu njọ kubungu. Masẹ iwu echobh, abẹ attiẹ-ẹ ọbọhk ofona. 26Ma k'ekpekpebha, ikwanạng nwọ ọkpa nnạm ofona k'ọchọhm kw'aro kwẹ n'uninga, otto ma k'ẹttọhmma, uyima mạma tạrr, iwu ekkera ẹttaanẹ.
27K'okpe kw'aro kw'ikwanạng nwọ n'ọphyạbh k'ekpebha, ugwunga ukhubh k'oche kw'm'ofona ororo k'osenga kwẹ, n'ose s'oyok kwẹ kw'kk'utia ma k'ẹttọhmma, ọtạkha mbọhk ọvạkha k'ọmmakhubh. 28Aro kwẹ oben-ẹ bẹ́, “Bina, amfona.” Okhenkha, ẹmạng núsia. Mạnna wọ ujunung nwọ udir-ẹ ọnạna k'ẹnyạnyaang, utima abẹ ọbhạna.
29Masẹ abẹ akpir k'ọchọhm, ọtạkha okkro ọkpaara ikwanạng nwọ k'akhuma-k'akhuma k'ibyi jobhkamfa, ọtọhm ọnạng nkhạma jobhkamfa s'Israẹl. 30Ọnạng kwidede kw'ose kwẹ n'ọbhạkhẹ oben oyok bẹ́, “Amạna udik demakwẹ ngwa tạm nánsia, ọnạng udik demakwẹ ngwa tạm núsia, tạma k'iwu ch'uwa anạng p'Israẹl abin k'Ijip. Udik kk'upyibha ro! Ọbaan bẹ́ anse udik antena mạma e!”
Currently Selected:
Akpaar-aponga 19: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
