Akpaar-aponga 10
10
Tola kw'ode ọkpaar-aponga kw'Israẹl
1K'okpe kw'Abimẹlẹk kk'upua, ujunung kw'okpen Tola kw'ubin k'ẹkhạma ch'Isaaka, ọbạra ode nnwa kw'Pua kw'ode nnwa kw'Dodo, ubin bẹ́ ọkkaana anạng p'Israẹl. Wa Tola urukhu kha Shamir, k'ukhubha kw'akpecho p'Ephraim. 2Wa ẹma ode ọkpaar-aponga k'Israẹl icho ẹrạbh ukuma ittaan, bạrasẹ n'ope, abẹ anọhng-ẹ kha Shamir.
Jair kw'ode ọkpaar-aponga kw'Israẹl
3Wa ọnạng kw'onyem-ẹ ode Jair kw'ubin k'ẹkhạma ch'Gilead, kw'uwa ode ọkpaar-aponga k'Israẹl k'icho ẹrạbh ukuma ifa. 4Ẹma wa ofhonu ajunungva ẹrạbh ukuma jobh, p'ayaarẹ nnyạnyaang ẹrạbh ukuma jobh. Wa abẹ adạbhẹ ifhon ẹrạbh ukuma jobh kha Gilead, tạrr ukpira chemma abẹ n'ayeri sẹ Havot-Jair. 5Masẹ Jair ope, abẹ anohng-ẹ kha Kamọn.
Jẹphta kw'ode ọkpaar-aponga kw'Israẹl
6Wa anạng p'Israẹl abạra asi ibyibyia-dik k'ititikha s'Ọvaar Ubinọkpaabyi. Abẹ akpobha ikha s'Baal ọttạra s'Ashtọrẹt, ọttạra s'Aram, ọttạra s'Sidọn, ọttạra s'Moab, ọttạra s'Ammọn, ọttạra s'aPhilistiya. Wa anạng p'Israẹl akpa nnạm avạra Ọvaar Ubinọkpaabyi, abẹ dạk kẹ nákpobha. 7Ọvaar Ubinọkpaabyi ọdwạkh-ẹ anạng p'Israẹl abẹ. Ọtạkha bẹ oge k'mbọhk s'anạng p'Philistiya, ọttạra s'Ammọn, 8p'apfuru bẹ, abạra afhọ bẹ. Wa oge anạng p'Israẹl phyibh k'irem, k'ukhubha kw'okpebha-dudon k'Jọrdan, kha Gilead, kw'ode ẹkhạma ch'anạng p'Amọr k'icho chikhanttaan. 9Wa anạng p'ẹkhạma ch'Ammọn abạra ajekha ọraanga kw'Jọrdan ata arima ẹkhạma ch'Juda, ọttạra ch'Bẹnjamin, ọttạra ch'Ephraim abẹ; wa Israẹl uning k'irem sididen. 10Ma wọ anạng p'Israẹl agạm ayeri Ọvaar Ubinọkpaabyi, aben bẹ́, “Amạna mba kk'ipyibha ansia k'ititikha sọ, amạna kk'nnạm amkpa amvạra Ọvaar Ubinọkpaabyi kwamạna, n'amkpobha ikha s'Baal.”
11Wa Ọvaar Ubinọkpaabyi ọpọhnọ bẹ bẹ́, “K'okpe kw'uwa anạng p'Ijip ọttạra p'Amọr, ọttạra p'Ammọn, ọttạra p'Philistiya, 12ọttạra p'Sidọn ọttạra p'Amalẹk, ọttạra anạng p'Maọn achokhu bạnga k'irem, abạnga agạma ẹkkaana ayer-m, wa amma bạnga nạ́nkkaana nnạbha bạnga k'mbọhk sabẹ? 13Okhenkha, abạnga kk'nnạm akpa avạr-m, n'akpọbha ekpo ẹdwạkh-ọdwạk. Ẹgwọ usi, nạn adạkhẹ bạnga mạ́nkkaana. 14Asọhng ata agạma ẹkkaana ayeri ikha s'abạnga kk'atekha bẹ́, abạnga akpobha. Tte asẹ ikkaana bạnga k'okpe kw'ọmmaphyaangẹ!”
15Okhenkha, anạng p'Israẹl abeni Ọvaar Ubinọkpaabyi bẹ́, “Amạna kk'ipyibha ansia. Ọma si mạna fidede f'ọdaakh-ọ, totokhạn, khenka kkaana mạna e.” 16Ma wọ abẹ avọhkhọ ikha s'ining bẹ abẹ, akpobha Ọvaar Ubinọkpaabyi. Osenga ma, Ubinọkpaabyi ọkkaana anạng p'Israẹl k'irem sabẹ.
17K'okpe kw'anạng p'Ammọn ado ifor s'ekpong ata abhing kha Gilead, anạng p'Israẹl atobh ayok ibyi rạnẹ, abhing kha Mizpa. 18Adecho p'anạng p'Gilead abhạkhẹ aben ayok bẹ́, “Ọnạng kwidede kw'm'uchi eden uyin k'iyaan urima anạng p'Ammọn abẹ, ẹma wọ m'ode ocho kw'anạng p'arukhu k'Gilead phyibh.”
Currently Selected:
Akpaar-aponga 10: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
