Ichedendik 49
49
Jekọb ọyọhbhọ iva pẹ itta
1Wa Jekọb oyeri iva pẹ, oben bẹ́, Akwu attonga maa, ọfha ntek bạnga ukhira kw'akpen pabạnga m'ade k'iwu oro.
2Iva p'Jekọb o, abạnga attonga maa akhọhmọ itọhng,
abạnga akhọhmọ atte kw'abạnga Jekọb itọhng.
3Reubẹn, ọma wọ ade ochedennwa kwaam,
abạra ade ẹfa chaam,
ọma wọ ade ẹkhọhkha ch'ijunung chaam,
abạra ade ọnạng kw'n'ntima nkkarẹ ẹmma.
4Ọma m'ade masẹ abokhada p'asi,
ọma ujibhada máse,
ukwuru bẹ́, annukhu ibhikha ch'atte,
ayima ikwanạng kwẹ abẹ.
5Simeọn ọttạra Lẹvi akwu ẹmmaana jạnẹ,
abẹ akwu akpen p'idik khikhibhi.
6Tte amma nạngẹ k'ikhaana sabẹ nttạr,
tte nạngẹ wạnọ k'ininga chabẹ nde,
ukwuru bẹ́, abẹ kk'ottempyibh kwabẹ atima afhọ anạng saabhada,
abẹ abạra asi itirakpo ọgbaan, avạkha pyẹ aphyạkhẹ mfhok oche kw'ọdaakhẹ bẹ.
7M'upyibh ọnạng ottempyibh kwabẹ,
ottempyibh kw'n'utima bẹ ọfhọ anạng k'ẹfa-k'ẹfa.
M'upyibh ọnạng akkaam pabẹ,
akkaam p'n'atima bẹ asi ọgbaan.
Amma m'nsi iva p'iva nạngẹ ibyi rạnẹ arukhu k'ẹkhạma ch'Jekọb.
Mbạra nsi bẹ akhạmọ aruk k'ẹkhạma ch'Israẹl.
8N'ode ọma Juda,
ivatte m'atọhng-ọ.
Ọwawunanạng kwọ kw'm'ọbạra obe abọ kòde,
ivatte pọ phyibh m'asạkha echo anạng-ọ.
9Ọma Juda m'akhaama ẹfa masẹ okke-nwa,
kw'ọfhọ eten uchi, ọbhạkhẹ ọkpa nnạm k'ibyi s'otto ukwu,
masẹ okke-dim, ọkpẹ abạra akhubha k'isisek
masẹ okke-kwa, ọnạng kw'm'okke ọmmyạn-ọ kòde.
10Ẹvaar k'Juda míbina e,
ẹvaarchi k'ntaak sẹ mẹ́bạra ibina,
tạrr etto k'ọnạng kw'achẹ ẹbaan,
idifhon phyibh ibạra isạkha echo inạng-ẹ.
11Ẹma m'ọkpạna ẹnyạnyaang chẹ k'ichi ch'grep,
M'ọkpạna ọnyạnyaang-nwa-kwakwẹ k'ichibọhkha ch'ẹdaakh-ẹ.
Ẹma m'n'utima atwuk okpobhu ọvạra pfẹ,
ọbạra utima agrep-si okpobhu anọhma-baba pẹ.
12Ẹma m'okhor ichen ukwuru atwuk saabhada p'm'ogwo,
asa pẹ m'awur ayong-oyongu ukwuru abasi saabhada p'm'ogwo.
13Zẹbulun m'usi ofhon kwẹ k'ẹraangakha, ch'akkaara-kpaar m'n'attima n'akwokha ọyọhng;
Erem chẹ m'ennemi tạrr ikpira k'ukhubha kw'Sidon.
14“Isaka ode masẹ ẹnyạnyaang ch'ẹkhaam ẹfa,
ch'n'idira mkpa sididen s'ifhu ọttạra ẹtọhkha.”
15Okpe kw'ose oche kw'iyọhngkwokha-byi sẹ ijibhi ikpira,
ọttạra oche kw'isisek sẹ ibạra ijibh ininga,
m'ọsạkha ẹkkaang chẹ ọtọhkha ẹtọhkha,
ọbạra ochera bẹ́, m'usi ọfa-tọhm masẹ ubira.
16Dan m'ode ọkpaar-aponga kw'm'ọdạbh anạng pẹ k'eden ọkkachẹ,
masẹ efonamma jạnẹ ch'Israẹl.
17Dan m'ojora masẹ ijọhk s'ining k'eden ọkhaan-ọkhaan,
masẹ ọpfạpfạbhọ kw'uyim k'eden,
masẹ ọpfạpfạbhọ kw'n'ọgaakhẹ ẹnyạnyaang k'afhokkukkọrọ,
kw'usi ọyaar-ẹnyạnyaang ugina otto nnạm-nnạm.
18“O Ọvaar Ubinọkpaabyi, amma nning ntik ẹnnaanga chọ.”
19Ikhaana s'ariribha m'irima Gad abẹ,
okhenka, m'umum bẹ ekpo k'afhokkukkọhrọ sabẹ n'arạbh.
20“Asha m'ọkhaama uchiattọhk ọkkapfẹ f'orebh-orebh,”
ẹma m'usi uchiattọhk ọkkapfẹ f'ọbaan bẹ́, abẹ anạng ọvaarnạng uchi.
21“Naphtali ode masẹ uyibh-kwa, kw'n'osenga kakhẹ k'ifor,
uyibh-kwa kw'n'ọmaan iva p'ajibh-ujibh.”
22“Josẹph ode masẹ ichi ch'n'ẹyạm agrep,
ch'ebe k'efhobh ọkhaan-ọkhaan,
ch'ẹsaabhẹ abọhkha mororo.
23Akke-kkaamankkaam m'atima ottempyibh arima abẹ,
abẹ m'atima iwawuna sididen attẹ-ẹ ayuk.”
24Okhenka, m'akhema bẹ,
s'avạk uyuk kwọ ijunung-ijunung,
ukwuru k'efa ch'Ubinọkpaabyi kw'Ẹfa phyibh, kw'Jekọb okpobh,
usi mbọhk sọ ikpọhkh-ọkpọhkhọ,
ukwuru Okkeri-arạkhạmaan
kw'ode Ẹtakpa ch'Israẹl,
25ukwuru Ubinọkpaabyi kw'atte okpobh, kw'n'ọkkaan-ọ,
ukwuru Ubinọkpaabyi kw'Ẹfa phyibh, kw'udiọ-ọ
ọttạra idia ch'ẹrạng n'ẹnạng,
ọttạra idia ch'asi p'isisek ẹtaanga,
ọttạra idia ch'ọmaan, ọttạra ch'abasi k'ọsaabh.
26Ujibhada kw'atạk k'atte kwọ,
ọbạrẹ ọtạm ọyọhnga ujibhada kw'ubin k'akpecho p'abạrẹ ayọhnga akpecho,
ọyọhnga idik ikkasẹ s'ibin k'akpecho p'uwa.
Tte Josẹph ọtạkha ujibhada nwa phyibh ọkhaama,
tte ẹma ode ocho kw'ivotte pẹ phyibh.
27“Bẹnjamin ode eten ch'ẹkkaam-ọkkaam,
ch'n'ichi ayok nten k'ekpebha,
ẹbạra ekkema okhebh f'm'uchi k'ẹchọhkha.”
28Anạng mbọ phyibh bọ wa asi mfonamma jobh-kamfa s'Israẹl. Maa wọ ode idik s'uwa otte ọkpaakhẹ s'ọyọhbhọ bẹ itta. Wa ọyọhbhọ ọnạng-ọnạng itta s'baan-ẹ.
Obo kw'Jekọb
29Ma wọ, Jekọb ọnạngẹ bẹ ntọhna bẹ́, “Ebowu chaam nạnka efora, ch'mpe ntor abaro paam. Abạnga m'annọhng-m k'ibyi s'uwa abaro paam annọhng, k'ọmma kw'ẹtakpa ch'ining k'owonu kw'Ẹphrọn kw'ubin Het, 30ọmma kw'ẹtakpa ch'ining k'Makpẹla, ọbaanga Mamrẹ k'Kenaan, kw'uwa Abraham odebhi ọttạra owonu k'mbọhk s'Ẹphrọn kw'ubin Het, utima usi innọhng-apfura. 31Ma wọ wa abẹ annọhng Abraham, ọttạra ikwanạng kwẹ, Sara. Ma ibyi nnọ rạnẹ rọ s'uwa abẹ annọhng Isaak, ọttạra ikwanạng kwẹ, Rẹbẹka. Ma wọ kw'uwa mbạra nnọhnga Lea. 32Wa Abraham odebhi owonu ngwọ, ọttạra ọmma kw'ẹtakpa kw'uning ma k'mbọhk s'anạng p'Het.”
33Masẹ Jekọb kk'iva pẹ ntọhna ọnạnga phyibh, oyebh mfhok sẹ ọnạna k'ibhikha, ope otor anạng pẹ.
Currently Selected:
Ichedendik 49: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
