Ichedendik 47
47
1Wa Josẹph ubin ọta ọkpaak Phero bẹ́, “Otte kwaam ọttạra ivotte paam kk'abina k'Kenaan akpira ma Goshẹn ọttạra itirakpo pabẹ oseng k'ẹkhaama chabẹ phyibh.” 2Ma wọ, Josẹph orengi ivotte pẹ anạng asen, utima ọta ọkhọkha Phero.
3Phero ọbạbh ivotte mbọ pẹ bẹ́, “Mbạng vọ ode ọbọhktọhm fabạnga?” Abẹ abhin-ẹ bẹ́, Aro, iva pọ ade akkeri-nten, masẹ ab'otte pamạna e. 4Wa abẹ abạra aben Phero bẹ́, “Amạna kk'ankwua bẹ́, ankwu annuk ma Goshẹn k'okpe nwa sạsạkhẹ, ukwuru okwo f'ididen f'uning kha Kenaan, ọbạrẹ osengeden, asạsaarẹ kha dạk kade p'nten m'ichi. Ẹgwọ usi, aro, n'anchin-ọ bẹ́, atte mạna ọbọhk annuk ma Goshẹn.”
5Osenga ma, Phero oben Josẹph bẹ́, “Masẹ atte ọttạra ivotte pọ kk'akwua akhebh-ọ kha, 6isisek s'Ijip phyibh ining k'akhọ k'mbọhk, tekha ibyi s'asong bẹ́, ijibh-ujibh nạng bẹ, abẹ aninga. Tte abẹ aruk k'ukhubha kw'Goshẹn. Ode asong anạng kabẹ k'ngekha p'akke emenka ch'ọtọhm, tạkha nten saam nạng bẹ, abẹ agba akkeri.”
7Ma wọ, Josẹph utim otte ọta ọkhọkha Phero. Jekọb usima Phero, ọyọbh-ẹ itta. 8Masẹ Phero ose bẹ́, Jekọb k'ọtạma, n'ọbạbh-ẹ bẹ́, “Ọmoyeni ade icho iphyaang?”
9Jekọb ubhini Phero bẹ́, “Amma k'icho arạbh asajạnẹ ukuma jobh nnukha, nsanga ọyagbin. Icho s'amma kk'nnukha nisaabha, okhenka ode bẹ́, isaabhẹ ọkhạnkumọ, asẹ icho s'uwa ab'otte paam arukhu nikpira.” 10Jekọb ọbạra ọyọbh Phero itta ottong nden nfa, bạrasẹ n'ofon.
11Mạnna wọ, Josẹph ọtạk ibyi ikkasẹ nnọ s'kk'otekha k'Ijip, k'ẹkhạma ch'Rameses, ọnạng otte ọttạra ivotte pẹ bẹ́, abẹ aruk, k'oche kw'Phero khẹ ẹfa ọnạnga bẹ́, usi. 12Josẹph ọbạra ọtạkha uchiattọhk f'm'obenga otte ọttạra ivotte pẹ, ọttạra ẹchọhmfhạr ch'otte phyibh, ọnạng bẹ otor k'oche kw'ubhik kw'iva pabẹ ade.
Okwo f'ididen uning k'Ijip
13Uchiattọhk mvọ f'uwa nạn ode ma ẹkhạma njọ phyibh, wa usi anạng p'Ijip ọttạra p'Kenaan ase irem sididen. 14Wa Josẹph otobha akpokha phyibh pabẹ akpe, anạng p'Ijip ọttạra p'Kenaan uchiattọhk, utima ofona k'ọvaarchọhm kw'Phero. 15Masẹ akpokha kk'anạng p'Ijip ọttạra p'Kenaan ẹsa k'mbọhk, anạng p'Ijip phyibh abin ata akhebha Josẹph aben-ẹ bẹ́, “Akpokha k'mạna ẹsa k'mbọhk e, ukwuru yạn kw'm'akkeri mạna ampe k'okwo o? Nạng mạna uchiattọhk.”
16Ma wọ, Josẹph ubhin bẹ bẹ́, “Ode akpokha k'bạnga ẹsa k'mbọhk, abạnga atima itirakpo p'abạnga akwu, ọfha anchi nfhona ọttạra uchiattọhk.” 17Mạnna wọ abẹ afon ata atạkha itirakpo p'ạbẹ, nnyạnyaang, ọttạra arạkhạmaan, mvu, ọttạra mmaam, atima akkena Josẹph, ọfha ọnạng bẹ uchiattọhk. Cho ngwọ anạng mbọ atim itirakpo pabẹ achi nfona ọttạra uchiattọhk f'Josẹph n'ọnạng bẹ.
18Masẹ cho ngwọ k'osenga, anạng p'Ijip ata aben Josẹph bẹ́, “Aro kwamạna, udik udubhakwẹ sạng mama-e, udik ubungukwẹ ode bẹ́, masẹ k'akpokha k'mạna ẹsa, itirakpo p'amạna n'ede pọ, oyonga ifor samạna, ọttạra asisek p'amạna mạnkkeni, ọttọhk f'm'ambạra annạng-ọ dạk kode e. 19Totokhạn aro, mạna ọbọhk kátte ampe k'okwo, annik asisek p'amạna. Debh mạna ọttạra asisek p'amạna, ọfha ankhaama uchiattọhk f'm'anchi. K'ifor andia bẹ́, ọvaar Phero ọtạkha mạna masẹ abira pẹ, ọbạra ọtạkha asisek p'amạna ọkhaama. Khenka nạng mạna uchiattọhk f'm'anchi ọttạra ekpo itubhapẹ, ọfha antima annuk akpen, ọfha isisek s'amạna nạngẹ idwukhu ining.”
20Ma wọ, wa okwo f'ididen mvọ ọkpọhkhọ k'Ijip tạrr anạng p'Ijip atạkha asisek pfabẹ phyibh akpe anạng Josẹph, kw'odebhi fhẹ ọnạng ọvaar Phero, 21Wa Josẹph utim anạng mbọma mase abira, nasi ọtọhm k'ẹkhạma ch'Ijip phyibh, anạng Phero. 22Okhẹnka ode bẹ́, asisek p'afọhnẹja mạnkkeni bọ p'uwa nạn odebha, ukwuru bẹ́, wa phero n'ọnạng bẹ okhebh pf'akpokha k'ọtọhm pf'abẹ n'asi, abẹ abạra akhaama uchiattọhk f'obengi bẹ, ọbạra obek. Ẹgwọ usi wa abẹ asisek p'abẹ nákpua.
23Ma wọ, Josẹph n'oben anạng p'Ijip bẹ́, “Chemma, amma k'bạnga ndebha ọttạra asisek p'abạnga phyibh nnạng ọvaar Phero, abạnga atạk eborakpo mba ata atạma tutubh. 24Okpe kw'abạnga asi iphya, akhebh ichiakpo mbọ k'akwung asen, atạkha ukwung gwạnọ achok ọvaar Phero, akwung mbọkha annebung, abạnga achok itubhapẹ, ọttạra ichia-pẹ pabạnga ọttạra iva.”
25Ma wọ, abẹ abhin-ẹ bẹ́, “Iyaa, amạna k'anchera, ọma k'akpen pamạna akkaana e. Tte antạkha ọphyaam k'ititikha s'aro kwamạna, k'anchera bẹ́, m'ande abira p'Phero e.”
26Osenga ma, Josẹph n'ochokhu kwe mase inyina k'isek s'Ijip, tạma ma iwu njọ tạrr kpira chemma, abẹ n'akhebh iphya kpo p'abẹ k'akwung asen, atạkha ukwung gwạnọ achok ọvaar Phero. Asisek p'afọhnẹja mạnkkeni bọ p'uwa nạn p'Phero nadia.
Udik kwa Jekọb ophyemi
27Wa anạng p'Israẹl arukhu k'Goshẹn ma k'Ijip, ma wọ abẹ akhaama ẹkhaama k'ọsaabh, abạra amaan iva k'osaabh.
28Wa Jekọb urukhu k'Ijip icho chikhamfa, phyi-phyibh, wa Jekọb urukhu acho arạbh asenọfa ukuma isenọfa. 29Masẹ Israẹl ọkẹ bẹ obo kwẹ k'ofora, oyeri nnwa kwẹ Josẹph, oben-ẹ bẹ́, “Ode k'ọphyaam nkhaama k'akhọ k'ititikha, ge ọbọhk kwọ k'ntaak saam atạkha echekha bẹ́, ode mpe, khaam ma Ijip mannọhnga, 30tạkha apfura paam bina k'Ijip, ntor ab'otte paam, ata annọhng-m k'ibyi sabẹ annọhng.”
Ma wọ, Josẹph ubhin bẹ, “Attitte kwaam, m'nsi oche kw'abeni.”
31Jekọb n'oben-ẹ bẹ, “Chekhi k'akhaam k'ititikha.” Osenga ma, Josẹph ọtạkha echekha k'otte k'ititikha, Israẹl ọrạkha echo ọnạna k'uchikwura kwẹ, ọnạng Ubinọkpaabyi isima.
Currently Selected:
Ichedendik 47: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
