Ichedendik 43
43
Ivotte p'Josẹph atim Bẹnjamin akpa nnạm k'Ijip
1Wa okwo fididen utim uning k'ẹkhạma ch'Kenaan. 2Masẹ Jekọb ọttạra ẹchọhmfhạr chẹ kk'agwu p'uwa abẹ adebhi k'Ijip akkera achi, otte n'obeni bẹ bẹ́, “Abạnga akpa nnạm k'Ijip ata adebh uchiattọhk-nwa atima akwu.”
3Okhenka, wa Juda obeni otte bẹ́, “Ujunung nwọ kw'ọdạbhẹ Ijip, ọtwạrọ mạna itọhng mororo bẹ́, ‘Abạnga khaam k'ititikha kábe, oyonga abạnga m'atima nwotte nwọkha kwabạnga akwu.’ 4De acher bẹ́ nnwotte kwamạna ọtwạn mạna abẹ, m'anta-ọta anta andebh uchiattọhk ankken-ọ. 5Okhenka, de nạn khẹ ọbọhk náttia ọtwạn mạna abẹ, amạna mántta, ukwuru bẹ́ ujunung nwọ obeni mạna bẹ́, ‘Abạnga khaam k'ititikha kábe, kw'oyongu bẹ́ abạnga atima nnwotte nwọkha kwabạnga akwu.’ ”
6Wa Jekọb kw'ọbạra okpena Israẹl, ọbạbhọ bẹ́, “Abạnga asi yạn age-m k'ọmmaphyaangẹ demakwẹ nwa, kw'abạnga akpaakhẹ ujunung nwọ bẹ́ abạnga akhaam nnwotte ọdwạkh-ọdwạk kạkha o?”
7Abẹ abhina bẹ́, “Ujunung nwọ ọbạbhọ mạna idik-saabhada s'iten k'ifor s'amạna, ọttạra ẹchọhmfhạr chamạna bẹ́, ‘Atte kwabạnga utim urukhu akpen kạkha? Abạnga akhaam nnwotte ọdwạkh-ọdwạk kạkha?’ Udik ubungukwẹ kw'amạna ansi ode bẹ́, ampọhn-ẹ idik s'ọbạbhọ mạna phyibh. Wạra m'ansenga yạn ansonga bẹ́ m'oben mạna antima nnwotte kwamạna ankwu o?”
8Ma wọ Juda n'obeni Israẹl bẹ́, “Tte nnwa nwọ ọbọhk anạng-m, ọfha amfona echomajạnẹ anta andebh uchiattọhk antima ankwu, deja, ọma ọttạra amạna mba, ọttạra iva pamạna kk'ampua k'okwo e. 9Amma oyeni wọ m'nkker-ẹ, de aror-ẹ, bạbh-m. Amma m'ntima akpen paam phyibh ntera echo chẹ de nạn khẹ nạ́ntima nkwuna nkken-ọ. 10Wạra nạn ekpekhibha nja núdia, njanna wạra k'ikpe ifa anta ankwuna.”
11Ma wọ otte Jekọb n'obeni bẹ bẹ́, “A o, ma n'ode mạnna, abạnga atekha ẹnạnga k'ekpo ẹkka-pẹ mbyọ py'ankhaam ma isek nna, masẹ ana p'arebhi iruk, ọttạra ọkhọhn, ọttạra amạma p'kashu, ọttạra amạma p'almọn, akkena ujunung nwọ. 12Abạnga abạra atạkha asilva p'ade ikpe ifa k'mbọma p'iwu njọ oge k'mkpa sabạnga. De abạnga akpir kha, arik asilva mbọ p'abạnga ase k'mma s'mkpa sabạnga, khiri okke-okke ode bẹ́ abẹ asi ipina age pyẹ ma. 13Abạnga abạra atima nwotte kwabạnga annemi eden asọhng k'ujunung nwọ. 14Tte njọhm samạna ide bẹ́, Ọvaar Ubinọkpaabyi kw'Ẹfa phyibh, usi ujunung nwọ ose bạnga ikwosi, otte nnwatte nwọkha kwabạnga ọbọhk, ọttạra Bẹnjamin, abẹ atwạn bạnga abẹ akwuna. N'ode amma, de iva paam m'adim-m udimi o, tte abẹ adim-m kadẹ o.”
15Ma wọ ajunung mbọ atạk nnạnga nnọ, ọttạra asilva p'ade ikpe ifa kha mbọ p'uwa abẹ atim, akwu attạra k'Bẹnjamin atima afona. Abẹ asenga k'ẹbhạr-k'ẹbhạr akpira k'Ijip, annemi eden k'Josẹph. 16Masẹ Josẹph ose bẹ Bẹnjamin abẹ, oben ọtọhmnạng kwẹ kw'ọchọhm bẹ́, “Tima anạng mbọ sọhng k'akhaam k'ọchọhm, abạnga afhọ eten atima asi uchiattọhk, khiri abẹ m'achi ọttọhk abaamẹ k'ẹyachẹ.”
17Wa ọtọhmnạng usi oche kw'Josẹph obeni, utima ivotte p'Josẹph ofona k'ọchọhm kw'Josẹph. 18Masẹ abẹ akpir k'ọchọhm kw'Josẹph, ajunung mbọ ojora bẹ, sabẹ akkẹ bẹ́, “Okke-okke ode bẹ́, asilva mbọ p'iwu njọ abẹ akpa nnạm age k'mkpa samạna ẹbọ abẹ aseng akwẹ atima mạna akwu ma ibyi nna e. N'oben bẹ urima mạna abẹ, ọbạra ọna mạna ẹfa, ọbạra ọvạkha mạna nnyạnyaang samạna ọna, ọbạra utima mạna usi abira pẹ.”
19Ma wọ abẹ afon ata akhebha ọtọhmnạng kw'Josẹph k'ẹbaakhamma ch'ọchọhm ngwọ, akpaak abẹ. 20Abẹ aben bẹ́, “Totokhạn aro kwạmạna, wa ankwu andebh uchiattọhk maa k'ochedenkpe. 21Masẹ amkpir k'ibyi s'ammingi, ọnạng-ọnạng n'ose ubhik ngwọ kw'asilva p'utim odebh uchiattọhk k'ẹmma ch'ẹkpa chẹ ẹtaanga. Ma wọ antim pẹ maa bẹ́ ankwu annikh e. 22Masẹ nạn ọnạng ansong kw'uwa oge asilva mbọ k'mkpa samạna, antim asilva adwạkh-ọdwạk ankwu, p'm'antima andebh uchiattọhk ma e.”
23Ọtọhmnạng nwọ oben bẹ́, “Tte nạngẹ bạnga ojor, udik ma ẹtaanga kòde. Ubinọkpaabyi kwabạnga, kw'ode Ubinọkpaabyi kw'atte kwabạnga, kk'bạnga akpokha ọnạnga k'mkpa sabạnga. Amma wa k'asilva p'abạnga atim adebh uchiattọhk ntạkha.” Ma wọ utim nnwotte kwabẹ Simeọn, utima uyin k'iyaan, okkena bẹ.
24Ọtọhmnạng nwọ utima ajunung mbọ ọnwa k'ọchọhm kw'Josẹph, ọnạng bẹ asi p'abẹ atim akpobhu mfhok oche kw'ẹmmaana chabẹ ede, ọbạra ọnạng mmaam sabẹ uchiattọhk. 25Abẹ akwu ado ifor ọttạra nnạnga sabẹ atim, atik okpe kw'Josẹph m'ukpira, sabẹ kk'abhaanga bẹ́, abẹ m'aninga ma achi ọttọhk.
26Masẹ Josẹph ukpir k'ọchọhm, abẹ atạkha nnạnga nnọ sabẹ kk'atima akwu ma ọchọhm, anạng-ẹ. Abẹ abạra arạkha attima ititikha sabẹ k'isek, anạng Josẹph ikpukpobha. 27Ọbạbh bẹ bẹ́, “Usi bạnga yạn o? Atte kw'iwu njọkha abạnga akpaakh-m udik akwuru, utim urukhu akpen kạkha o? Usi-ẹ yạn?”
28Abẹ apọhna bẹ́, “Ọtọhmnạng kwọ kw'ode otte kwamạna utim uning akpen kạkha e, ifor ikpọkh-ẹ mạma.” Ma wọ abẹ atwung ncho, abạra aruru ifor sabẹ k'isek, anạng Josẹph ikpukpobha.
29Masẹ Josẹph udir achen ose nnwọkka Bẹnjamin kw'ọkka wạnọ ọmaanẹ bẹ, n'ọbạbhọ bẹ́, “Nwotte nwọ kwabạnga kw'isạsạkhẹ kw'singwọ abạnga akpaakh-m udik atena wọ maa?” N'obeni bẹ, “Nnwa kwaam, tte Ubinọkpaabyi usi-ọ ọphyaam.” 30Masẹ Josẹph ose nnwọkka kwẹ bẹ jọọr, ẹmạng ibir-ẹ, ọttạra k'ikwosi s'ifu-ẹ kha ettem. Ubina k'ẹbhạr-k'ẹbhạr urik bẹ ma, uyin k'iyaan oror ibyi s'm'uninga ọgạma. N'ofon kha ẹmaanggọ chẹ ẹtaanga ọta ọgạma ẹmạng.
31Masẹ kk'ititikha okpobha, ubina kha ẹmangọ uyin k'iyaan, ọvạkha ifor sẹ, ukwu oben bẹ́, “Abera bẹ uchiattọhk.”
32Wa abẹ aber Josẹph uchiattọhk pfẹ ọkhạmọ, abẹ abạra abera f'ivotte pẹ akhạmọ, abạra abera anạng p'Ijip p'aning ọttạra Josẹph uchiattọhk fabẹ akhạmọ. Wa akwẹ ode oche ngwọ ukwuru s'anạng p'Ijip atạk bẹ́, ode unyina-dik bẹ́, abẹ achi uchiattọhk ibyi rạnẹ ọttạra anạng p'Hiburu. 33Wa abẹ achokhu ivotte ẹyạr ator k'ọgbo f'abẹ ade, tạma k'ocheden tạrr ukpira k'okpongannạm kwabẹ. Wa abẹ n'abhạkhẹ akkeri ayok, s'udik okkonu bẹ k'oche kw'abẹ aseng achok bẹ ininga ator k'ọgbọ. 34K'okpe kw'abẹ akhebhi uchiattọhk f'ubin k'okpokkro kw'Josẹph, okhebh f'Bẹnjamin ọbạrẹ nden nsen ọyọhnga f'ayok phyibh. Wa abẹma phyibh achi uchiattọhk, abạra agwo atwuk Josẹph abẹ, tạrr ettem erebh ọnạng kwidede.
Currently Selected:
Ichedendik 43: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
