Ichedendik 29
29
Jekọb ukpir k'Padan Aram
1Wa Jekọb ofon ororo k'osenga kwẹ, tạrr ukpira k'anạng p'arukhu k'ukhubha kw'ududon n'uyin. 2Ma wọ ose isipe ch'abẹ atim ẹtakpa ch'ẹbạrẹ ẹkpa abubha, ọbạra ose ikhaana ittaan s'arạkhạmaan, p'ayim ma isipe njọ ọkhaan-ọkhaan, ch'abẹ akhaabh asi anạng bẹ.
3K'okpe kwidede kw'akkeri-arạkhạmaan m'anạng arạkhạmaan pabẹ asi, abẹ m'abingi ẹtakpa njọ ch'ibubh ma ammakpa p'isipe achok ọkhaan-ọkhaan, akhaabha asi anạng arạkhạmaan, brasẹ abẹ n'abingi adạkhẹ chẹ abubha.
4Jekọb ọbạbh akkeri-arạkhạmaan mbọ bẹ́, “Aye, abạnga abin mạn?”
Abẹ abhina bẹ́, “Amạna ambin Haran.”
5Ọbạra ọbạbh bẹ bẹ́, “Abạnga asong ujunung kw'abẹ ayeri Laban ma, kw'Nahọr ofhonu?”
Abẹ abhina bẹ́, “Uwee, ansong-ẹ mạma.”
6Ma wọ, Jekọb n'ọbạbhọ bẹ bẹ́, “Ma, usi-ẹ yạn yeri?”
Abẹ abhin-ẹ bẹ, “K'udik ọkka, ifor ikpọhkh-ẹ kạkha e. Kkeri uminanwa kwẹ kw'okpen Rachẹl, oche n'ukwu kha arạkhạmaan apyẹ.”
7Ma wọ, Jekọb n'obeni akkeri-arạkhạmaan mbọ bẹ́, “Amma nkkẹ bẹ, s'utim ode ọyakpattem, okpe sạng ma kw'wạra abạnga m'atima arạkhạmaan mbọ akwu akwokha ọyọhng ma ibyi nna. Atera anạng bẹ asi, ọfha abạnga atima pyẹ akpa nnạm, ata anạng uchiattọhk.”
8Ma wọ, akkeri-arạkhạmaan mbọ, abhin Jekọb bẹ́, “Mesese o, amạnamba oche ngwọ kạnánsi, m'antik akkeri-arạkhạmaan adwạkh-ọdwạk, brasẹ n'ambingi ẹtakpa ch'ibubh isipe, ma wọ, n'abạra annạng arạkhạmaan pamạna asi okpe gwạnọ.”
9Masẹ Jekọb utim ọkpaakhẹ udik ọttạra akkeri-arạkhạmaan mbọ, Rachẹl utima arạkhạmaan p'otte ukpira ma isipe njọ. Ẹma Rachẹl wa ode okkeri-arạkhạmaan k'ẹpanạng. 10Rachẹl wa ọbạra ode ocheden-nwa kw'Laban. Laban nwọ, waọbạra ode nnwọkka kw'ọkka kw'Jekọb. Ma wọ, masẹ Jekọb ose Rachẹl, ọttạra arạkhạmaan p'otte p'utim bẹ, ukwu ọnạng asi, ọta ubingi ẹtakpa ch'ibubh k'isipe, ọkhaabha asi ọnạng arạkhạmaan p'nnwọkka kw'ọkka. 11Ma o, Jekọb ọta ọbaakha Rachẹl, ọbạra ọgạma k'ẹrạng-k'ẹrạng. 12N'ode s'uwa Jekọb kk'Rachẹl ọkpaakha bẹ, ẹma ode uchimmanạng kw'otte Laban, ọbạra ode ujunungnwa kw'Rẹbẹka. Ma wọ, Rachẹl ọrạbhọ ọta ọkpaak otte.
13Masẹ Laban ọbhaang idik nnọ s'iten k'Jekọb, kw'ode nnwa kw'nnwọkka kwẹ, ubina ẹbhạr-ẹbhạr ọta okhebh-ẹ kha eden. Masẹ abẹ ase ayok o, Laban ọbaakh-ẹ, ọbạra utim-ẹ ofona kakhẹ ọchọhm. K'ọchọhm wọ wa Jekọb n'ọkpaakhẹ Laban idik phyi-phyibh s'kk'ittia. 14Ma wọ, Laban ọpọhn-ẹ bẹ́, “K'udik ọkka, ọma ade uchimmanạng kwaam, ande anạng bạnọ e.”
Jekọb ọtạk Lea ọttạra Rachẹl k'ọbada
Ma o, masẹ Jekọb kk'ophye wạnọ ukkia k'ọchọhm kw'Laban, 15Laban n'oben-ẹ bẹ́, “Ọbạra ọkwọn ode bẹ́, amma ọttạra ọma ande anạng bạnọ, akwẹma sạng m'usi ọma n'asi ọtọhm anạng-m k'ajakha. Kpaakh-m ọtọhk f'm'n'atạkha k'ọtọhm pfọ.”
16Wa Laban ọkhaam apanạngva afa, ocheden okpen Lea, ottong afa, okpena Rachẹl. 17Lea, ẹma wa ọkhaam adạdaakha-chen, p'apọhkh-ọpọhkha, okhenka, Rachẹl ẹma ode ifor bẹ, bhạkhẹ-bhạkhẹ, iminava achẹ. 18Wa Jekọb ọkhaam idạdaakha Rachẹl abẹ, oben bẹ́, “Amma m'nsi ọtọhm nnạng-ọ k'icho isenọfa k'echo ch'Rachẹl, kw'ode uminanwa kwọ kwisạsạkhẹ.”
19Ma wọ, Laban obeni bẹ́, “Ode udik kw'ujibh-ujibh bẹ, ntạkh-ẹ nnạng ọma, ọyọhnga bẹ, ntạkh-ẹ nnạng ọnạng ọdwạkh-ọdwạk. Ninga abam maa.” 20Ma wọ, wa Jekọb usi ọtọhm k'icho isenọfa k'echo ch'Rachẹl, okhenka, ukwuru idạdaakha s'Jekọb ọkhaam Rachẹl abẹ, wa icho nnọ isenọfa ikher-ẹ iwu iphyang-iphyang.
21Wa Jekọb ukwu oben Laban bẹ́, “Icho s'ọtọhm saam kk'igba, nạng-m ikwanạng kwaam ọfha nyima abẹ.”
22Ma o, Laban obher anạng p'ibyi nnọ phyibh, abẹ atobha, abẹ asi erobha ch'ọbada. 23Okhenka, masẹ n'ukpir k'irungu, Laban ọtạkha nnwa kwẹ, Lea, ọnạng Jekọb. Jekọb uyima abẹ. 24Wa Laban ọtạk ọtọhmnạng kwẹ, Zilpa, ọnạng nnwa kwẹ Lea, bẹ uruk abẹ.
25Masẹ iwu n'echobh o, Jekọb n'ose bẹ, otera uyima Lea abẹ. Ma wọ, obeni Laban bẹ́, “Bạng udik khira gwọ asi-m ma? Rachẹl sạng kw'nseng abẹ nsi ọtọhm nnạng-ọ? Ọma n'asi yạn abọhr-m?”
26Ma wọ, Laban ubhi bẹ́, “K'ẹmmaana chamạna, nọ́baana bẹ, ọnạng ọtạkha ọkwanạng-nwa kwẹ kw'isạsạkhẹ ọnạng k'ọbada, s'oyok kwididen nạn udim tạm nọ́ba. 27Kera ẹphyawu ch'erobha ch'ọbada ngwa, de kk'akkera, m'annạng-ọ dạkhẹ oyok kw'isạsạkhẹ. Okhemma, bạra asi-m adạkhẹ ọtọhm k'icho isenọfa idwạkh-ọdwạk.”
28Wa Jekọb ocher ọnạng-ẹ. Masẹ kk'ẹphyawu ch'erobha okkera ọttạra Lea, Labanọbạra ọtạkha nnwa kwẹ Rachẹl, ọnạng-ẹ k'ọbada. 29Wa Laban ọtạk ọtọhmnạng kwẹ kw'ikwanạng, kw'okpen Bilha, ọnạng Rachẹl bẹ, uruk abẹ. 30Jekọb ọbạra uyima Rachẹl abẹ. Wa Rachẹl n'ọdaakh-ẹ ọtạm ọyọnga Lea. Ma wọ, usi ọtọhm k'icho isenọfa idwạkh-ọdwạk ọnạng Laban.
Oche kw'iva p'Jekọb
31Masẹ wa Ọvaar Ubinọkpaabyi ose bẹ, Rachẹl ọdaakhẹ Jekọb ọtạm ọyọhnga Lea, ọnạng Lea ọmaan, okhenka, Rachẹl ode ujidim. 32Wa Lea ukwu utima ifhạr, ọmaan ujunungnwa, ukpuẹ-ẹ Reubẹn, oben bẹ́, “Ọvaar Ubinọkpaabyi kk'ikwosi saam usia. K'udik ọkka, napra wọ m'ndaakhẹ udim kwaam e.”
33Lea ọbạra utima ifhạr ọmaan ujunungnwa, ukwu oben bẹ́ “Ukwuru s'Ọvaar Ubinọkpaabyi ọbhaang bẹ, amma udim kwaam nạ́ndaakha, khaam adạkhẹ nnwa ọnạnga.” Ma wọ, ukpuẹ-ẹ Simeọn.
34Leaọbạra utima ifhạr ọmaan ujunungnwa, ọbẹ́, “Iyaa, ẹkpanja udik kwaam bạra n'ọmyẹ-m k'ifor, s'kkẹ ajunungva attaan mmaana.” Ma wọ, ukpuẹ-ẹ Lẹvi.
35Lea utima adạkhẹ ifhạr ọmaan ujunungnwa, ukwu oben bẹ́, “Ẹkpanja, m'ntọhnga Ọvaar Ubinọkpaabyi.” Ma wọ, ukpuẹ-ẹ Juda. Ukwu ukuma ọmaan.
Currently Selected:
Ichedendik 29: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
